shadow
Diocese de Dili > NOTÍCIAS > REFLEXÃO > ”Imi sei la buka halo diak atu ema seluk hahí imi!” (Mt 6,1)

”Imi sei la buka halo diak atu ema seluk hahí imi!” (Mt 6,1)

(Tema: CONVERSÃO MOTIVA ITA ATU HALO CARIDADE HO HARAIK AN)

 

Saudação! Tinan-tinan Igreja Católica mundo rai-klaran liuhusi liturgia santa celebra beibeik Quarta-feira das Cinzas. Quarta-Feira das Cinzas sai nudar momento especial nebe Uma Kreda propõe ho hakarak ida atu bolu no convida hikas sarani sira katak odamatan husi tempo Quarezma nian hahú nakloke ona hodi taka hikas tempo baibaim nian. Quarezma significa momento preparação nian nebe halao durante semana haat. Husi preparação nebe diak sei lori sarani hotu bele hadia an hodi celebra didiak Festa Páscoa Nai Jesus Cristo nia Terus, Mate no Moris-hias.

Saudação! Leitura sira nebe baibaim ita rona iha celebração Quarta-Feira das Cinzas hakarak fanun no fo-hanoin mai ita konaba assunto conversão ka pertobatan. No atu ita nia conversão bele la’o ho diak mak liuhusi Evangelho São Mateus nian, Jesus hakarak fo-hanoin ba nia Apóstolo sira no ba ita hotu konaba oinsá atu sai pessoa autêntica eh sai ema lolós, hodi evita atitude fingimento nian atu bele alcança conversão lolos nian. Atu evita atitude fingido ida ne’e mak Jesus propõe elemento principal tolu: esmola, oração no jejum.

Saudação! Partilha ida ne’e sei especifica ita nia reflexão konaba Primeiro elemento nian: Esmola. Jesus hateten: “Wainhira o fó esmola, lalika dere gon, hanesan ema laran makerek sira halo iha uma kreda ka iha luron, atu ema seluk hahí sira. Maibe, buka fó subar: o nia liman karuk lalika hatene o nia liman los halo saida”. Esmola tuir matan cristão nian considerado nudar hahalok concreto obra misericórdia nian. Ne’e significa esmola ne’e obrigação ida. Nune’e ema ida-idak sei pratica esmola iha nia moris tomak tuir sasukat eh capacidade nebe Maromak haraik ba nia, nudar Amu Papa Emérito Bento XVI tenik ho nia lia-menon simples nebe dehan: esmola ne’e hanesan capacidade de partilha. Oinsá no husi nebe ema bele fo esmola ou pratica caridade? Atu ema bele fo esmola ou halo karik caridade, preciso tebes haraik an.  Nune’e, fundamento husi acção fo esmola mak haraik-an. Iha ne’e Maromak la hare ba quantidade maibe qualidade fuan ema nian nebe nakonu ho intenção mos no haraik an wainhira pratica caridade. Basá, Haraik-an mak inan ba vertude hot-hotu, humildade é a mãe de todas as virtudes, declara Santa Teresa de Ávilla. Ita bele hateten mos katak Jesus hakarak Nia Apóstolo evita hahalok foti an nian hodi hakiak humildade eh haraik an. Nudar passagem evangélica balun nebe fo-sai katak “Se mak foti an, Nai sei hatun nia, se mak hatun an, Nai sei foti nia” .

Saudação! Jesus hakarak nia Apóstolo sira cumpri obrigação ida ne’e hanesan mos ema judeu sira seluk; maibe ho critério ida katak laos halo hodi hetan louvor no kolen, maibe halo tanba ema seluk nia diak liuliu kiak sira nebe precisa tebes ema seluk nia lolo liman. Ba questão ida ne’e S. Paulo afirma, ‘Nudar hau buka atu fó ksolok ba ema hotu-hotu, la hodi buka hau rasik nia diak maibe ema barak nian atu sira bele hetan maksoin”(1Cor 10,33). Houri uluk kedas to’o agora, Igreja hakat tuir beibeik Jesus nia Ain-Fatin. Igreja hadomi ema mukit sira, ne’e tradição Uma Kreda nian”(Centesimus Annus 57).

Saudação! Husi leitura sira nebe ita fo-sai ona iha leten, pelo menos ita bele foti netik lição balun nudar bukae ba ita nia moris:

1)Nai Jesus liuhusi Doutrina Católica hakarak hanorin ita katak: Esmola nudar obrigação no hahalok kmanek obra misericórdia nian. Ba ne’e mak Jesus recomenda atu ita nia liman lós fo karik esmola ba ema ruma buka hakas an atu ita nia liman karuk labele hatene. Masque, tinan-tinan, ita mai tuir missa Quarta-Feira Cinzas no rona bebeik Jesus nia recomendação ne’e, maibe ita seidauk hatur iha realidade moris ita nian. Ita sarani balun ohin loron, por exemplofo karik subsídio eh tulun hanesan osan ou material ruma ba maluk seluk nebe tane hela liman, iha tempo nebe hanesan ita mos tane hela ita nia tilun, loke hela ita matan atu ema seluk bele temi hikas ita nia naran ita televisão, rádio no jornal ou boletim sira. La temi karik, ita sei reage ho liafuan mur-mura iha ita laran. Aprende husi Jesus, wainhira ita fo tulun ba ema seluk masque iha ema nia matan ema la valoriza ita nia tulun maibé ita Aman iha Lalehan nebe hare no hatene buat sa mak ita halo nia sei fo recompensa mai ita.

Saudação! 2)Iha tempo quarezma, Igreja propõe mai ita atu hadera-an, hamulak liliu fo esmola. Maibé ita sarani balun sei hakiak nafatin atitude fingido nian, hatan sim iha oin maibé iha kotuk ita halo festa sub-subar iha fatin leet sira, han-hemu resin hodi taka matan ba maluk sira nebe sei moris iha linha kiak nian. Ita taka metin ita fuan ba maluk seluk nebe han etu bikan ida no hemu be kopu ida mós mukit tebes. Ita la halo karik caridade, ne’e significa ita sai hanesan corruptor. Ba ida ne’e São João Crisóstomo afirma: La fahe karik ó nia rikusoin ho ema kiak sira, ne’e significa ó liman lais no ó naok o nia moris husi sira. basá, buat nebé ita iha la’os ita nian, ne’e sira nian

Saudação! Ho ahu-kdesan ou rai-rahun nebe ita simu iha ita nia ren-tos, nudar símbolo kmanek nian nebe hakarak convida teni ita nobun atu halo conversão eh dada an husi hahalok foti an nian no haburas hikas atitude haraik an nian wainhira ita halo oração, hadera-an no liliu fo esmola iha tempo quarezma nian nebe hahú ho celebração Quarta-Feira das Cinzas tinan ida ne’e.

 

Pe. Francisco da Costa

Leave a Reply

Your email address will not be published. Required fields are marked *