shadow
Diocese de Dili > NOTÍCIAS > LETURA DIÁRIA > Quarta-Feira Cinzas

Quarta-Feira Cinzas

Primeira Leitura                                                                                                                                                                                                  Joel. 2, 12-18

Lia husi primeiro livro Profeta Joel

Oras ne’e Maromak hateten: “Fila imi laran ho neon mai Ha’u, hodi hadera-an, hodi tanis no halerik. Hakanek imi nia laran; lalika lés imi nia unuk. Fila imi laran ho neon tomak ba imi Na’in, ba imi nia Maromak, tan Maromak di’ak no laran luak tebes! Tan Maromak la hatene rai hirus, la hatene hanoin fó todan… Huu karau dikur iha foho Sião tutun, hodi fó hatene loron hadera-an nian, hodi halibur povo tomak: katuas no férik, boot no labarik sei susu! Sira nebé foin kaben, hadook malu lai! Housi oda-matan to’o Altar, sacerdote sira nebé servisu iha Uma Kreda, tanis dadaun hodi hateten: “Na’i, sadia Ita nia povo! Keta halo Ita nia povo moe lerek iha ema seluk sira leet! Tan sá mak povo sira seluk hateten: ‘Sira nia Maromak iha nebé?’ Na’i Maromak hanoin, hodi hakarak tebes nia povo. Tan ne’e, mak Nia sadia nia povo”…

Maromak Futar Lia

 

Salmo Responsorial                                                                                                                                                                           Sal. 50. 3-6ª. 12-14. 17

Refrão : Na’i, ami sala: Hanoin ami!!! Repete-se

 

Na’i, tan Ita laran luak, sadia ha’u;

Tan hanoin tebes ha’u, kasu ha’u salan;

Hamós ha’u hahalok aat,

Fase ha’u salan tomak. Refrão

 

Ha’u hatene ha’u salan,

Ha’u salan mosu nafatin iha ha’u oin;

Na’i, ha’u salan hasouru Ita,

Ita matan haré katak sala, ha’u ata halo. Refrão

 

Na’i, haraik laran mós mai ha’u,

Fó fali kbiit ba ha’u klamar;

Keta soe ha’u dook housi Ita futar oin,

Ita Boot Espírito keta dook housi ha’u. Refrão

 

Haraik fali ksolok Maksoyn mai ha’u,

Hametin iha ha’u hakaran, di’ak;

Na’i loke ha’u ibun,

Ha’u ibun sei hananu Ita nia kmanek. Refrão

 

Segunda Leitura                                                                                                                                                                                              2Cor. 5, 20-6, 2

Lia husi São Paulo nia surat ba sarani sira iha Corinto

Maun-alin sira: Ami, Cristo nia saseluk; hodi ami, mak Maromak hanourin imi. Ne’e duni, ami husu ba imi, hodi domin Cristo nian; “Badame malu ho Maromak!” Cristo, maski sala laek, Maromak halo Nia maksalak, tan hadomi ita, atu iha Cristo, ita bele hetan Maromak nia di’ak. Nu’udar Maromak nia saseluk, ami hanourin imi, atu la bele simu leet de’it Maromak nia graça. Tan Maromak hateten: “Iha tempo di’ak, Ha’u rona ó!” Oras ne’e dadaun mak tempo di’ak, oras ne’e dadaun mak tempo Maksoyn.

Maromak Futar Lia

 

Aclamação                                                                                                 

Refrão : Na’i, Jesus Cristo, ami hahí hawelok Ita!!! Repete-se

                  Oras ne’e daudaun mak, tempo di’ak no loron Maksoyn!

                  Na’i lia-fuan : “Hakribit imi salan, Reino lalehan besik dadaun!” Refrão

 

Evangelho                                                                                                                                                                                                       Mt. 6, 1-6. 16-18

Na’i Jesus Cristo nia Evangelho nu’udar São Mateus haktuir

Iha tempo nebá, Na’i Jesus Cristo hateten sai ba escolante sira: “Imi sei la buka halo di’ak atu ema seluk hahí imi. Imi halo di’ak karik, atu ema seluk hahí imi, Aman Maromak sei la haraik prémio ba imi, iha Lalehan. Nune’e, wainhira ó fó esmola, lalika dere gon, hanesan ema laran makerek sira halo, iha Uma Creda ka iha luron, atu ema seluk hahí sira. Ha’u hateten lós ba imi: ema sira ne’e, simu ona sira kólen. Wainhira ó fó esmola, buka fó subar: Ó nia liman  karuk lalika hatene ó nia liman lós halo sá ida. Nune’e, ó nia Aman iha Lalehan, tan Nia haré hotu, Nia mak fó ó nia kólen. Wainhira ó ba hamulak, la bele halo hanesan ema laran makerek sira. Ema sira ne’e mak hamriik, hodi hamulak iha Uma Creda ka iha luron, atu hatudu katak, sira hamulak. Ha’u hateten lós ba imi: “Sira ne’e, simu ona sira kólen. Maibé ó, wainhira hamulak, buka tama iha uma laran, taka oda-matan, hafoin, hahú hamulak iha lia sumik ba ó nia Maromak. Tan ó nia Aman iha Lalehan haré no hatene hotu,  Nia mak sei fó ó nia kólen. Wainhira ó hadera-an, keta halo oin nakraik, hanesan ema laran makerek sira halo, atu hatudu katak, sira hadera-an. Ha’u hateten lós ba imi, katak, sira ne simu ona sira kólen. Maibé, wainhira ó hadere-an, ó sei fase oin, tau mina morin ba ulun, atu ema la bele hatene katak, ó hadera-an; atu Aman Maromak de’it mak hatene ó nia hahalok; nune’e, Aman Maromak mak sei selu ó nia kólen.

Lia Maksoyn

Leave a Reply

Your email address will not be published. Required fields are marked *