shadow
Diocese de Dili > NOTÍCIAS > Notícias > SANTA BRÍGIDA

SANTA BRÍGIDA

1 de Fevereiro

 

Brígida moris iha rai Irlanda. Nia inan aman naran Brocca no Duthac. Hahu husi vida adolocênte, Brígida nia domin ba Jesus Cristo klean teb-tebes. Brígida hare Cristo liu husi ema kiak no mukit sira. Brígida sempre lori roupa no aihan sira halo caridade hodi ba fahe ba ema kiak sira. Iha loron ida, Brígida distribui kusi nebe nakonu ho susuben ba ema kiak sira. Hafoin Brígida sente laran tauk ho nia inan Brocca ho susu ben nebe nia fahe ona ba ema hotu, basá nia la fo hatene ba nia inan. Hahu husi tempo ne’e, Brígida hahu hasae oração ba Nai Maromak atu tulun nia atu nunee kusi nebe antes nee nakonu susu wen maibe nia halo caridade hodi tulun ema kbiit laek sira, nia deseja atu ho oração nebe nia hasae atu Maromak hakonu hikas fila fali ho susuwen. Iha dalan Brígida sente tauk tebes, maibe, molok Brígida to’o iha uma Maromak hatudu milagre ida ba Brígida katak pedido nebe nia hasae ba Maromak acontece duni ba Brígida. Kusi nebe nia hodi antes nee mamuk, maibe, nakonu hikas fila fali ho susuwen. Brígida feto ida nebe oin furak tebes. Nia aman Duthac hanoin katak to’o ona nia tempo atu Brígida hari família ida, maibe, Brígida iha hanoin nebe diferente ho nia aman nia hakarak. Significa Brigida reseita atu forma família. Ba Brígida nia hakarak atu oferece nia-an ba deit Nai

Maromak hodi rezeita nia aman nia hakarak. Brígida ho nia oin furak no fuan diak hadomi ema hotu, husi tempo ne’e mane klosan barak mak laran monu ba Brígida. Tamba ne’e, atu hases-an husi atitude ne’e, Brígida halo oração ba Nai Maromak atu hasai tiha nia oin furak ne’e husi niaan. Iha tempo nebe Brígida husu ba Nai Maromak no Maromak rona nia oração sira hodi nakfilak tiha Brígida nebe uluk oin furak no kapaz sai tiha fali oin nebe la furak iha nia-an, hodi halo ema hewai tiha nia husi sociadade. Como nia aman Duthac hare ba nia oan nia oin hahu la furak tan ona, nian aman aceita no tuir saida mak Brígida hakarak atu moris tuir ba. Tamba ne’e, Brígida hahu moris nuudar ema Consagrada ida. Hahu husi ne’e, Brígida consagra nia moris ba deit Nai Maromak hodi sai Religiosa diak ida.

Brígida halao nia moris iha Comvento, maibe, nia mos hakasan teb-tebes hakarak dada hikas tan nia feto maluk sira hodi moris tuir no entrega-an deit ba Maromak. hahu tempo Brígida Consagra nia moris tomak ba deit Maromak iha Comvento, nia oin nebe la furak muda fila fali sai furak ka Bonita. Brígida sempre fo hanoin ba ema seluk kona ba Nain Feto Virgem Maria. Brígida hatudu nia laran luak no diak ba ema hotu. Hahu husi ne’e ema hotu hanaran nia Maria husi Irlandia. Brígida hakotu is por volta 525. NGL

Leave a Reply

Your email address will not be published. Required fields are marked *