shadow
Diocese de Dili > NOTÍCIAS > LETURA DIÁRIA > Segunda-Feira, I Semana tempo Quaresma

Segunda-Feira, I Semana tempo Quaresma

ANO B

 

Primeira Leitura                                                                                Lev. 19. 1-2, 11-18

Lia housi livro Levítico

Na’i lia tun ba Moisés, dehan: “Ó dehan ba Israel oan sira hotu: ‘Imi buka sai santo, basá Ha’u, Na’i, Maromak, Santo!’

Imi keta na’uk, keta dehan lia bosok, no la bele bosok ema seluk. Keta jura falso hodi temi Ha’u naran. Keta hafo’er imi Maromak, nebé Ha’u mak Na’i ne’e, nia naran! Keta hasai, keta na’uk ó maluk sira. Keta tahan ba to’o loron tuir mai, ema nebé serbisu ne’e nia osan. Keta dehan áat ema tilun diuk ida no mós la bele tau netik buat ruma iha ema matan-delek ida nia oin. Imi sei hamta’uk imi Maromak, nebé Ha’u mak Na’i!

Imi tesi lialós, la bele tesi ho lia la lós nian; la bele mesa-mesak liu housi ida be fraku eh liu housi iha ida be haré ba iha kbiit wa’in. Tesi lia ba imi maluk ho justiça. Imi keta foti lia falso hasouru imi parenti sira no mós keta hakarak ó maluk nia mate. Ha’u mak Na’i! Imi keta rai kunan iha laran hasouru imi maun-alin; maibé, imi buka hanourin imi nia maluk, atu imi keta monu ba sala tanba nia. Imi keta rai kunan, keta rai hirus hasouru imi nia povo maluk. Imi hadomi imi maluk nu’udar imi-an rasik. Ha’u imi nia Na’in!”.

Maromak Futar Lia.

 

Salmo Responsorial                                                                                                                                            Sal. 18(19), 8, 9, 10, 11, (R. Jo. 6. 63C)

Refrão : Na’i, Ita Nia liafuan, espírito no moris!!! Repete-se

 

Na’i Nia lei lós tebes, hamoris ema nia laran.

Na’i Nia haruka metin tebes,

Fó matenek ba ema haraik-an sira. Refrão

 

Na’i Nia ukufuan lós tebes,

Sira haksolok fuan.

Na’i Nia lei sira mós tebes,

Leno ita nia matan. Refrão

 

Hamta’uk Na’i, mós tebes,

Hela metin tinan-ba-tinan,

Na’i tesi lia ho lialós tebes;

Nia hanoin sira hotu mesak lós duni. Refrão

 

Nia liafuan folin boot liu osan mean,

Osan mean nebé kmook liu.

Sira midar liu wani ben,

Wani ben nebé midar tebes. Refrão

 

Aclamação                                                                                                                                                                                                              2Cor. 6. 2b

Refrão : Hahi ba Ita, Jesus Cristo, Liurai glória rohan laek nian!!! Repete-se

                  Ohin mak tempo di’ak; ohin mak loron maksoyn. Refrão

 

Evangelho                                                                                                                                                                                                             Mt. 25. 31-46

Na’i Jesus Cristo nia Evangelho nudar São Mateus haktuir

Iha tempo neba, Jesus dehan ba Nia escolante sira: “Wainhira Oan Mane mai ho nia Nia kbiit, hamutuk ho Anjo sira hotu, iha loron ne’e, Nia sei hatodan-An iha Nia fatin ho glória. Reino hotu sei halibur iha Nia oin. Nia sei haketak ema sira hanesan bibi-atan haketak bibi-mala’e housi bibi-timur. Nia sei tau bibi-mala’e iha sorin kuana; tau bibi-timur sira iha karuk. Liurai sei dehan ba sira nebé iha sorin kuana: “Mai, Ha’u Aman nia doben sira, mai simu, nu’udar liman-rohan, reino nebé hadia kedas ba imi, molok mundo foin halo. Tan Ha’u hamlaha, imi fó han Ha’u; Ha’u hamrook, imi fó wé mai Ha’u; Ha’u mai housi dook, imi simu Ha’u; Ha’u laiha hena, imi fó hatais Ha’u; Ha’u moras, imi ba haré Ha’u; Ha’u iha cadeia, imi ba haré Ha’u”. Ho ida ne’e, ema di’ak sira sei hatan ba Nia: “Na’i, wainhira ami haré Ita hamlaha, ami fó han eh hamrook, ami fó wé? Wainhira ami haré Ita mai housi dook, ami simu eh Ita la ho hena, ami fó hatais? Wainhira ami hare Ita moras eh iha cadeia, ami ba haré Ita?” Liurai sei simu teni: “Ha’u dehan tebes ba imi: Wainhira imi halo ba Ha’u Nia alin ruma, maski nia kiik liu, imi halo mai Ha’u”.

Nia sei dehan mós ba sira nebé iha sorin karuk: “Dook tiha housi Ha’u, imi ema áat; ba hela iha ahi nebé la nahas, ahi nebé hadi’a hela ba demónio no anjo sira: tan Ha’u hamlaha, imi la fó han; Ha’u hamrook, imi la fó wé; Ha’u mai housi dook, imi la simu Ha’u; Ha’u la iha hena, imi la fó hatais Ha’u; Ha’u moras, Ha’u iha cadeia imi la ba haré Ha’u”. Ho ne’e, sira mós sei hatan: “Na’i, wainhira ami haré Ita hamlaha eh hamrook; mai housi dook eh laiha hena; moras eh iha cadeia, maibé ami la tau matan ba Ita?” Nia sei hatan ba sira: “Ha’u dehan tebes ba imi: Wainhira imi la halo ba Ha’u nia alin ruma, maski nia kiik liu, imi mós la halo mai Ha’u”. Sira ne’e sei ba terus to’o la nahas; sira nebé di’ak sei ba moris nafatin”.

Lia Maksoyn

Leave a Reply

Your email address will not be published. Required fields are marked *