shadow
Diocese de Dili > NOTÍCIAS > REFLEXÃO > JEJUM NO ABSTINÊNCIA

JEJUM NO ABSTINÊNCIA

Maun alin sira dala balun wainhira rona liafuan JEJUM NO ABSTINÊNCIA halo ita barak hanoin kedas ba haterus-an no hasusar-an karik, hau prefere liu uza liafuan HANORIN-AN. Katak iha tempu ida ne’e ita hanorin-an atu moris iha buat diak ka hahalok ou toman diak sira be ikus mai lori buat diak mai ita nia-an no ba ema seluk. Hanorin an liu husi dalan han hemu sukat. Tuir tradição ema sarani sira nian JEJUM kata khan no hemu sukat, la han barak liu, han hemu sukat hodi la estraga hahan sira no ABSTINÊNCIA katak la han na’an iha lorn nebe Santa Igreja husu atu labele han, comunmente loron iha tradição sarani sira nian loron ne’e monu iha Quarta feira Cinzas no Sexta feira Santa. Tuir Santa Igreja ninia hanorin loron rua ne’e obrigatoriamente sarani ida tem que halo jejum no abstinência. Liu tan fali ida ne’e tamba hakarak moris klean liu tan iha tempo graça quaresma ninian ne’e hodi la lakon graça tomak quaresma nian iha sarani barak mos mak durante tempo ida ne’e halo nafatin jejum no abstinência iha loron quarta no sexta, balun ate halo loro-loron durante tempo quaresma ne’e tomak.

 

Mai ita Timor oan sira be maioria sarani católica liafuan rua ne’e associa ho quaresma, tempo prepara-an molok tama ba tempu pascoa be katak vitoria ba moris ne’e. Husi ne’e ita hatene ona katak ita nia jejum no abstinência nebe ita halo laos atu hasusar an maibe atu hanorin an no tahan an iha moris ne’e hodi lao ba vitoria moris nian. Ita hatene katak tamba ne’e mak ita ema sarani sira halo jejum no abstinência iha tempo quaresma no iha ita nia moris loro-loron wainhira ita hakarak. Maski nune’e ita mos tem que hatene katak JEUJM NO ABSTINÊNCIA laos ema sarani sira deit mak halo, ema laos sarani sira mos halo. Iha maluk barak nebe hola parte iha religião seluk no mos sira nebe la professa fiar iha religião ida halo Jejum no Abstinêcia. Sira halo jejum no abstinência atu comcerteza lori buat diak ruma ba sira nia an iha sira ninia moris. Ao menus to’o ohin loron hau seidauk rona katak ema halo Jejum no abstinência atu halo terus an fila fali. Ao contrário ema halo hahalok rua ne’e atu luta hasoru realidade moris nian sira nebe satan netik ita nia moris ksolok nian. Nune’e ita luta atu manan obstakulu ou dificuldade moris nian sira ne’e hodi hetan ksolok. Iha moris concreta mak luta sira hanesan luta para atu manan moras, atu manan toman at, atu manan insucesso sira, atu manan reino Lalehan no seluk seluk tan. Ne’e duni Jejum ho abstinência ita halo atu hetan vitória iha moris ne’e.

De modo especial mai ita ema sarani sira concretamente iha tempo quaresma nian ida ne’e ba ita luta atu uluk nanain besik ba Maromak be kbiit nain ba vitória lolos iha moris ne’e no we matan moris diak no ksolok lolos nian. Hodi hakbesik an fila fali ba Maromak mak hamutuk ho nia ita bele ultrapassa dificuldade ka barreira moris ksolok nian hodi seim dúvida to’o duni iha moris ksolok lolos ida nebe garantida no haraik mai gratuitamente. Wainhira ita hetan moris ida hanesan ne’e hatudu duni katak ita hetan VITÓRIA, Vitória ida be lori diak mai ita ida-idak ninia-an no ba maun alin sira tamba Nai Maromak ninia tulun.

 

Ita jejum no abstinência lori consequência diak uluk nanain mai ita nia-an rasik no tuir fali mai ita hatene katak lori mos benefício ba maluk sira seluk wainhira ita nia hahalok ida ne’e ita halo ho espírito atu laos deit tulun ita nia an maibe mos tulun ema seluk, atu laos deit lori diak mai ita-an maibe mos lori diak ba ema sira seluk, liu liu ema sira nebe kuran hahan, ema sira nebe ita hare iha mundo barak mak la hetan netik buat ruma atu han. Ita han no hemu sukat atu tuir mai bele mos fahe ba ema seluk buat ruma hodi sira bele han no hemu netik. Iha prática jejum no abstinência nian bele foti mos ita neon ba hamutuk ho ema sira nebe terus no hamlaha tamba hahan laiha, tamba funu no tamba buat seluk seluk tan. Hodi halo nune’e bele hamosu no haburas iha ita le’et espírito laran luak, laran maus no laran sadia hodi halo ita bele moris hamutuk duni nudar Maromak ninia oan sira nebe wainhira hamlaha no hamrok ba aihan no buat hemu nian fahe ba malu ho neon no laran tomak buat nebe ita iha. Iha ne’e ita sei hetan duni ksolok lolos moris nian.

 

Maun alin sira hare fila fali mai ita nia realidade wainhira ita lao iha cidade dili nia laran ka iha cidade no fatin barak iha Timor laran ne’e ita hateke karik ba lixo sira ita bele hare katak buat nebe ita hetan laos lixo ka foer deit maibe iha lixo ou foer ne’e mos ita hetan hahan barak tebes. Hahan sira ne’e resto ka hahan sira ne’e estraga, hahan sira ne’e restu ka hahan sira ne’e naresin tamba ita han no hemu la sukat? Ita hotu hatene tamba sa mak hahan sira ne’e ba para iha neba. Ita la percisa justifica ita-an maibe hau hanoin factos hahan sira barak iha lixo fatin ne’e hatudu tiha ona ita nia estraga hahan sira tamba ita han no hemu la sukat no mos tamba ita la hanoin ema barak nebe kuran ba aihan no susar atu hetan aihan moris nian tamba situasaun funu no rai hamlaha. Iha realidade ida ne’e ninia oin dala balun ita em nome de direito ita bele dehan ne’e direito ita ida idak nian atu han hemu oinsa no atu estraga ka sukat ka ne’e direito ida idak nian no la percisa hanoin ema sira seluk. Jusitficação pessoal ida hanesan ne’e hatudu deit ita nia atitude egoista la hatudu ita nia hahalok altuismo iha hakarak ema seluk nia diak no hanoin maluk sira seluk mos atu sai diak no han hemu naton hanesan ita iha, la hatudu ita ninia hahalok socialmente diak nebe nudar ema hahalok ida ne’e sempre hela metin iha ita-an.

 

Wainhira ita hanoin ema sira seluk ne’e mos katak ita hanoin ita nia-an, wainhira ita han hemu fahe ho ema seluk ne mos katak ita fahe ba ita-an rasik. Hodi hakarak diak mos ba ema seluk, fahe ho ema sira seluk, hanoin mos ema seluk nebe kuran ba ainhan no buat hemu ita sei hetan ksolok lolos moris nian. Ksolok ida nebe la mai hanesan resultado fabricado ou resultado condicional nian ida maibe ksolok ida nebe mai kedas husi ita ninia fuan no laran basa ksolok ida ne’e mai tamba ita moris duni iha dalan Maromak nian nebe lori ita ba moris ksolok ne’e duni. Ksolok ida ne’e so Nai Maromak deit mak bele kuda iha ita ninia fuan no laiha ema ida bele fokit sai husi ita ninia fuan laran. Ksolok ne’e ksolok rohan laek nebe tamba Maromak ninia hakarak horik iha ita no sei suli mos ba maun alin sira seluk be ita moris hamutuk ba.

 

Ne’e duni maun alin sira mai ita loron ba loron luta nafatin iha hanorin ita ida-idak nia-an liu husi jejum no abstinência atu manan barreira ka obstakulu moris nian nebe satan netik ita atu hetan moris diak no ksolok lolos ida. Nudar sarani mai ita buka aproveita didiak tempo graça nian iha quaresma ne’e atu halo duni jejum no abstinência. Jejum no abstinência la significa bando atu han no hemu maibe significa hanorin an atu han no hemu naton, atu fahe ba malu hahan no buat hemu itoan nebe ita iha ba maluk sira seluk hodi nune’e ita hotu la sente kuran ba buat ida maibe ita completa malu nafatin iha buat hotu hodi ita bele moris no moris ksolok lolos. Ida ne’e fo ksolok tebes duni mai ita. Ne’e duni maun alin sira hotu,  husi hahalok rua jejum no abstinência ne’e hatudu katak quaresma laos tempo triste nian neim tempu susar nian tamba ita han no hemu sukat maibe quaresma ne’e mos tempo ksolok nian tamba quaresma lori ksolok, lori laran metin ba ita nia moris, ksolok no laran metin nafatin ida nebe halo ita bele besik liu tan ba Maromak no maun alin sira, halo ita moris ksolok lolos nian duni iha moris ne’e hamutuk ho Maromak no maun alin sira. Amen.

 

Catedral, Casa de Dom. Jaime Garcia Goulart, 21.02.18

Por: Pb.

One comment on “JEJUM NO ABSTINÊNCIA

  1. Carmelita Cruz

    Furak Tebes refleksaun ne. Obrigada ba liafuan murak Sira nebe tilun ne nungka rona.

Leave a Reply

Your email address will not be published. Required fields are marked *