shadow
Diocese de Dili > NOTÍCIAS > LETURA DIÁRIA > Quarta-Feira, I Semana tempo Quaresma

Quarta-Feira, I Semana tempo Quaresma

ANO B

 

Primeira Leitura                                                                                     Jon. 3. 1-10

Lia husi Profeta Jonas nian

Na’i lia tun ba Jonas ho liafuan hirak ne’e: “Ó hamriik, la’o ba cidade boot Nínive hodi haklaken ba nia lia Ha’u atu dehan ba ó”. Jonas hamriik la’o ba Nínive tuir Na’i futar lia. Iha Maromak futar oin Nínive cidade boot ida; hodi loron tolu atu la’o housi rohan ba rohan. Jonas tama iha cidade, la’o liu tiha loron ida, nia hahu hanourin ho liafuan hirak ne’e: Loron hatnulu tan, Nínive sei rahun”. Ema sira tur iha cidade Nínive fiar Maromak; sira fó sai jejum ida. Ema hotu, housi boot liu to’o kiik liu, hatais hena maha-mahar. Wainhira notícia ne’e to’o iha liurai Nínive, nia hamriik tiha housi trono, hasai tiha nia kapa, hafalun nia-an ho hena mahar ida hodi tur iha ahi-kdesan. Hafoin, liurai ho nia ministro sira haruka tiha surat ida ba rai Nínive tomak hodi dehan nune’e: “Ema hot-hotu no balada sira hotu, bibi mala’e no bibi-timur sira hotu la bele koko aihan, la han no la hemu wé. Ema hot-hotu no balada sira hotu, sei hafalun-an ho hatais mahar sira. Sira husu maka’as ba Maromak; ida-idak hadook-an housi dalan áat no hahalok áat wa’in be halo tiha. Sé mak hatene, Maromak hanoin hikas fali karik hodi la fó castigo; hamalirin Nia laran hirus atu ita la bele mate”. Maromak haré tiha oinsá mak sira halo atu sira bele hadook-an housi sira nia hahalok áat. Nia hasai tiha castigo nebé atu haterus sira.

Maromak Futar Lia

 

Salmo Responsorial                                                                                                                                           Sal. 50(51). 3-4, 12-13, 18-19 (R. 19b)

Refrão : Maromak, keta heuwai ami fuan be haraik-an no neon nakraik!!! Repete-se

 

Na’i, sadi’a ha’u, tan Ita laran-luak!

Tan Ita laran di’ak tebes, kasu ha’u salan.

Fase ha’u áat tomak, hamos ha’u salan hotu. Refrão

 

Maromak, haraik fuan mós ida mai ha’u,

Halo foun hikas kbiit ha’u klamar.

Keta soe ha’u ba dook housi Ita futar oin,

Keta hadook Ita Espírito housi ha’u. Refrão

 

La’os sacrifício mak haksolok Ita,

Ha’u hasa’e karik sacrifício ba Ita,

Ita sei la simu.

Sacrifício haksolok Maromak mak

Espírito hakribi salan.

Maromak, Ita heuwai espírito haraik-an no neon nakraik. Refrão

 

Aclamação                                                                                                                                                                                                            Joel. 2. 12-13

Refrão : Maksoyn, glória no kbiit ba Jesus Cristo, ami Na’in!!! Repete-se

                  Na’i dehan, fila imi laran ho neon tomak mai Ha’u tan!

                  Ha’u laran di’ak no laran-luak tebes. Refrão

 

Evangelho                                                                                                                                                                                                              Lc. 11. 29-32

Na’i Jesus Cristo nia Evangelho nu’udar São Lucas haktuir

Iha tempo nebá, ema lubun-lubun ba hamutuk no Jesus hahu dehan, “Ema otas ida ne’e mak otas laran áat nian: hakarak sinal ida, maibé sei la fó sinal ida ba nia, se la’e Jonas nian. Tan Jonas hanesan sinal ida ba povo Nínive nian; hanesan ne’e mós Mane Maksoyn sei sai ba ema otas ida ne’e nian. Liurai feto tasi mane nian sei hamriik iha loron ikus iha justiça oin ho ema sira otas ne’e nian; nia sei halakon sira basá mai housi rai nia rohan atu rona Salomão nia matenek no iha ne’e, iha hela ema nebé liu fali Salomão. Ema sira Nínive nian sei hamriik iha justiça oin loron ikus nian ho ema otas ida ne’e nebé sei lakon basá halo tiha penitência wainhira Jonas haklaken tiha no iha ne’e iha ema ida nebé liu fali Jonas”.

Lia Maksoyn

Leave a Reply

Your email address will not be published. Required fields are marked *