shadow
Diocese de Dili > NOTÍCIAS > LETURA DIÁRIA > Sexta-Feira, I Semana tempo Quaresma

Sexta-Feira, I Semana tempo Quaresma

ANO B

 

Prmeira Leitura                                                                                      Ez. 18. 21-28

Lia husi profecia Ezequial nian

Na’i Maromak lia tun, dehan nune’e: “Ema sala-na’in hakribi karik nia hahalok áat sira hotu nebé halo tiha, moris tuir karik Ha’u Nia ukunfuan sira hodi halo tuir direito no lialós, nia sei moris, sei la mate. Nia sei la monu tan ba sala ida nebé nia halo tiha ona; sei moris tan lialós nebé nia halo”. Na’i dehan: “Sala-na’in nia mate ne’e fó ksolok Ha’u? Uluk knana’in la’os husik tiha nia hahalok áat, hafoin bele moris? Maibé, ema justo hadook-an housi lialós karik, buka halo buat áat, halo hahalok áat sira karik hanesan ema sala-na’in halo ne’e, nia sei bele moris nafatin? La’os tan hahalok lialós nian nebé nia halo tiha ne’e mak nia sei hatan, maibé, tan laran áat no sala nebé nia halo mak  nia sei mate”. Imi dehan tan: ‘Na’i nia hahalok ne’e la lós’? Uma-kain Israel rona mai: Ha’u nia hahalok ne’e mak lós? Uluk knana’in la’os imi nian mak sala? Wainhira ema justo ida hadook-an housi moris lialós nian hodi halo buat áat wainhira to’o mate, nia sei mate tan buat áat be halo tiha ne’e. Wainhira sala-na’in ida hadook-an housi sala nebé nia halo tiha, hodi moris tan direito no lialós, nia sei soi nia moris. Loke matan hodi hakribi karik hahalok áat sira nebé halo tiha, nia sei moris, sei la mate”.

Maromak futar lia.

 

Salmo Responsorial                                                                                                                                             Sal. 129(130). 3-4, 5-7ª, 7b-8, (R. 3)

Refrão : Na’i, Ita hanoin karik ami salan,

                 Sé mak bele soi-an!!! Repete-se

Na’i, housi kle’an nakukun, ha’u bolu Ita,

Na’i, rona ha’u lian ba!

Ita sée tilun ba ha’u lian harohan nian. Refrão

 

Na’i, Ita hanoin karik ami salan,

Sé mak bele soi-an?

Maibé, iha Ita iha perdua

Tan ne’e, ami hamta’uk Ita. Refrão

 

Ha’u klamar hein Na’i;

Ha’u fiar metin iha Nia liafuan.

Ha’u klamar hein Na’i

Liu fali sentinela sira hein rai-hun mutin. Refrão

 

Basá, laran-luak hôrik iha Na’i,

Ho Nia, iha maksoyn.

Nia sei soi Israel

Housi nia hahalok áat sira hotu. Refrão

 

Aclamaçào                                                                                                                                                                                                                   Ez. 18. 31

Refrão : Glória ba Ita, Na’i Jesus Cristo,

                  Matenek Aman Maromak Nian!!! Repete-se

                   Hakribi ba imi sala hotu, Na’i dehan; hakiak fuan foun

                   Ida no espírito foun ida. Refrão

 

Evangelho                                                                                                                                                                                                              Mt. 5. 20-26

Na’i Jesus Cristo nia Evangelho nudar São Mateus haktuir

Iha tempo nebá, Jesus dehan ba nia escolante sira: “Imi nia justiça la lós liu karik escriba no fariseu sira nian, imi sei la tama iha reino Lalehan. Imi rona dehan ba bei-ala sira nune’e: ‘Ó keta oho. Ema nebé oho, sei hetan justiça’. Maibé Ha’u dehan ba imi: Ema nebé laran nakali hasouru nia maun-alin, sei hatan lia justiça. Ema nebé bolu nia maun-alin ‘beik-ten’, sei tama iha tribunal Sinédrio nian. Sé bolu nia maun-alin ema áat, sei hetan terus ahi. Ne’e duni, ó atu hasa’e daudaun karik ó nia buat-karan iha altar fohon, ó hanoin kona katak ó áat malu ho maun-alin ruma, husik hela ó nia buat-karan; ba uluk dame malu ho nia; hafoin mai hasa’e ó nia buat-karan. Ó dame lalais tiha ho ema nebé imi na’in rua haksesuk malu molok imi tama iha tribunal; keta halo be, nia fó ó ba juíz, juíz fó ó ba guarda, guarda hatama ó ba cadeia. Ha’u dehan ba ó, ó sei la sai housi neba to’o ó selu hotu.”

Lia maksoyn.

 

Leave a Reply

Your email address will not be published. Required fields are marked *