shadow
Diocese de Dili > NOTÍCIAS > LETURA DIÁRIA > II Domingo iha tempo Quaresma

II Domingo iha tempo Quaresma

ANO B

 

Primeira Leitura                                                                      Gen. 22, 1-2, 9ª. 10-13. 15-18

Lia husi primeiro livro Génesis

Iha loron hirak nebá, Maromak koko Abraão, hodi dehan ba nia: “Abraão!” Nia hatán: “Ha’u mak ne’e”. Maromak dehan: “Lori ó oan Isaac, ó oan mane mesak, nebé ó hadomi maka’as, ba iha rai Moriá. Iha nebá, ó sei óho hodi hasa’e nia iha foho nebé Ha’u sei hatudu ba ó”. Tan ne’e, sira la’o ba fatin nebé Maromak hatudu. Abraão haríi altar ida iha nebá, tau ai-maran iha leten. Hafoin, nia losu tudik atu óho nia oan. Maibé,  Na’i nia Anjo bolu housi lalehan:  “Abraão,  Abraão!”  Nia hatán: “Ha’u mak ne’e, Na’i”. Anjo dehan: “Ó keta tau liman ba labarik, keta halo aat nia. Ha’u hatene ona katak, ó hamta’uk Maromak, basá, ó la karak ó oan, ó oan mesak mai Ha’u”. Abraão foti matan, haré iha nia kotuk bibi-malae ida, dikur kesi hela iha ai-horis. Nia ba kore bibi ne’e hodi óho, hasa’e iha nia oan nia fatin. Na’i nia Anjo bolu tenik housi lalehan, hodi dehan: “Ha’u jura hodi Ha’u naran rasik – Na’i futar lia – Tan ó di’ak hanesan ne’e, la karak ó nia oan, ó oan mesak, Ha’u sei haraik bensa barak ba ó; Ha’u sei halo ó nia oan no bei-oan sira sai wa’in, hanesan fitun sira iha lalehan, hanesan rai-henek iha tasi ibun; ó nia bei-oan sira sei hadau funu-baluk sira nia cidade sira houtu. Tan ó oan no bei-oan sira, tan ó halo tuir Ha’u lian, nação sira houtu iha rai, sei simu bensa”.

Maromak futar lia.

 

Salmo Responsorial                                                                                                                                                      Sal. 115 (116), 10-15, 16-17, 18-19

Refrão : Ha’u sei la’o iha moris sira rain iha Na’i futar oin!!! Repete-se

 

Ha’u laran metin nafatin, maski dehan:

“Ha’u ema ida iha susar laran”!

Iha Na’i futar oin, folin tebes duni,

Nia belun sira nia mate. Refrão

 

Ha’u Ita atan, Ita atan feto nia oan,

Na’i, Ita silu tohar ha’u besi-dadur.

Ha’u sei hasa’e buat karan hodi fo agradece

temi Ita naran. Refrão

 

Iha povo oin ha’u sei halo tuir duni,

lia sira ha’u hakotu atu halo tuir;

Iha Na’i kadunan oin,

iha ó klaran, Jerusalém. Refrão

 

Segunda Leitura                                                                                                                                                                                              Rom. 8, 31b-34

Lia husi São Paulo nia surat ba sarani sira iha Roma

Maun-alin sira: Maromak hamutuk ho ita, ema sê bele hasouru ita? Maromak la rai nia Oan rasik, maibé, fó Nia ba mate tan ita houtu! Oin sá mak Nia sei la fó mai ita, hamutuk ho Nia, buat tomak? Sê lós mak sei kesar Maromak nia oan sira? Maromak mak dehan katak sira ema di’ak? Sê lós mak sei kastigo sira? Cristo Jesus nebé mate – ha’u dehan tan, nebé moris hi’as – Nia iha Maromak nia sorin kuanan, Nia mak sei husu tulun mai ita?

Maromak futar lia.

 

Aclamação                                                                                                      

Refrão : Hahi no Glória ba Ita, Na’i Jesus Cristo!!! Repete-se

                  Iha kalohan nabilan ema rona Aman lian:,

                  “Ida ne’e Ha’u Oan doben. Imi rona Nia ba”. Refrão

 

Evangelho                                                                                                                                                                                                        Mc. 9, 1-9 (2-10)

Na’i Jesus Cristo nia Evangelho nu’udar São Marcos haktuir

Iha tempo nebá, Jesus lori Pedro, Tiago no João, lori sira mesak ba foho aas tebes ida. Nia nakfilak-An iha sira oin: Nia hena sira nabilan, mutin teb-tebes. Ema ida iha rai ne’e, labele halo mutin liu. Hafoin, Moisés ho Elias mosu ba sira, ko’alia daudaun ho Jesus. Pedro hahú ko’alia, dehan ba Jesus: “Mestre, di’ak oin sá ita horik ona iha ne’e! Ita halo takabaluk tolu: ida ba Ita, ida ba Moisés, ida seluk ba Elias”. Tebes, nia la hatene atu dehan sa ida lós, tan sira ta’uk teb-tebes. Kalohan ida tun mai, taka tiha sira, housi kalohan ne’e, rona lian ida: “Ida ne’e Ha’u Oan doben. Imi rona Nia ba”. Teki-tekil, hateke hale’u, sira la haré tan ema ida, selae Jesus mesak hamutuk ho sira. Tun housi foho mai, Jesus dehan ba sira atu keta haktuir ba ema ida, buat nebé sira haré, wainhira Mane-Maksoyn ladauk moris hias housi mate. Ne’e duni, sira rai nonok buat ne’e ba sira, maibé, sira haksesuk malu, moris hias housi mate katak sá ne’e.

Lia maksoyn

Leave a Reply

Your email address will not be published. Required fields are marked *