shadow
Diocese de Dili > NOTÍCIAS > LETURA DIÁRIA > Quinta-Feira, II Semana tempo Quaresma

Quinta-Feira, II Semana tempo Quaresma

ANO B

 

Primeira Leitura                                                                                                                                                                                                  Jer. 17. 5-10

Lia husi livro Jeremias nian

Na’i lia tun nune’e: “Malisan ba ema nebé laran metin no sadere ba ema seluk hodi haketak-an housi Maromak. Nu’udar ai-horis iha rai tetuk maran, nia la hatene tuir wainhira mak rahun di’ak to’o mai; nia nu’udar ai-horis iha rai masin maran, iha rai fuik maran nebé ema ida la hela. Rahun di’ak ba ema nebé tau laran ba Na’i. Ema nebé laran metin ho Na’i , nu’udar ai-hun kudan besik wé ninin; nia so’e abut to’o mota laran; nia sei la ta’uk loron manas. Nia tahan sei buras matak nafatin. Bele tinan tomak ida la udan, nia laran sei la taridu, fuan tebar nafatin. La iha buat ida kleuk no áat liu fuan. Nia la bele di’ak. Sé lós bele hatene nia? Ha’u bele, Ha’u mak Na’i: Ha’u tama to’o fuan sira laran, to’o liu sira hanoin atu haraik ba idak-idak tuir nia hahalok, tuir folin nebé housi sira nia serbisu rasik”.

Maromak Futar Lia.

 

Salmo Responsorial                                                                                                                                                   Sal. 1. 1-2, 3, 4, 6, (R. Sal. 39. 5ª)

Refrão : Rahun di’ak ba ema nebé tau neon iha Na’i!!! Repete-se         

 

                  Ksolok ba ema nebé la tuir ema áat nia lia,

                  La tuir dalan maksalak.

                  Ksolok ba sira bé la hadulur ho ema áat.

                  Maibé haksolok ho Na’i nia ukunfuan,

                  Hodi hanoin nia kalan-loron. Refrao

 

                  Nia hanesan ai-kudan ida iha wé-inan ninin;

                  Nafuan tuir nia tempo, nia tahan la namlaik;

                  Buat hotu nebé nia halo, sai di’ak de’it. Refrao

 

                  Maibé, ema áat sira nia moris oin seluk;

                  Sira hanesan haré-kain be anin lori.

                  Na’i hatene ema lós nia dalan,

                  Dalan ema áat sira nian, lori ba rahun áat. Refrão

 

Aclamação                                                                                                                                                                                                                     Lc. 8. 15 

Refrão : Na’i, hahalok Ita futar liman, boot no kmanek tebes!!! Repete-se

                   Ksolok ba sira nebé rona Maromak Nia liafuan ho neon

                   No laran hodi fó fuan, tan sira laran metin. Refrão

 

Evangelho                                                                                                                                                                                                               Lc. 16. 19-31

Na’i Jesus Cristo nia Evangelho nudar São Lucas haktuir

Iha tempo nebá, Jesus lia tun ba fariseu sira: “Ema riku ida hatais mesak mean furak ho kábas lan lotuk. Lor-loron nia halo festa boot. Iha nia odamatan, toba hela kiak ida naran Lázaro, isin tomak mesak kanek.

Kiak ne’e hakarak hili etu-mumun iha riku nia mesa okos; asu sira belo hela nia kanek. Loron ida, kiak ne’e mate; Maromak nia Anjo sira mai lori tiha nia ba hamutuk ho Abraão. Riku ne’e mós mate; ema hakoi tiha nia ba rai. Terus barak duni iha inferno; riku ne’e foti matan haré housi dook Abraão hamutuk ho Lázaro. Iha oras ne’e, nia hasa’e lia, dehan; “Ha’u aman Abraão, sadi’a atan ha’u! Haruka netik Lázaro habokon nia liman fuan ba wé hodi halo malirin ha’u nanal basá ahi han ha’u maka’as teb-tebes iha ne’e!” Abraão simu hodi dehan, “Oan, hanoin ba, ó nia di’ak ó simu ona iha ó nia moris tomak; Lázaro fali simu mak susar iha nia moris tomak. Oras ne’e, Lázaro haksolok iha ne’e, maibé, ó fali hetan terus maka’as. Hafoin, housi ami ba imi mós rai-horun naruk boot haketak ita. Ema ida hakarak karik liu ba ami, sei la bele; imi ida hakarak hakat mai ami, mós sei la bele!”

Nia hatan fali hodi dehan: “Ne’e sá, ha’u aman, ha’u hasa’e lia ba ita atu haruka Lázaro ba ha’u nia uma, basá, ha’u iha alin na’in lima. Haruka Lázaro fó hatene sira atu la bele mai tan fatin áat ida ne’e!” Abraão dehan ba nia: “Sira iha Moisés ho profeta sira iha neba, rona sira ba!” Maibé, nia simu hodi dehan: “La’e, ha’u aman Abraão! Matebian ruma ba ko’alia ho sira karik, sira sei hakribi sira salan”. Abraão dehan: “Sira la sée tilun karik ba Moisés ho profeta sira, maski matebian ruma moris hi’as housi mate, sira sei la hakribi salan liu!”

Lia maksoyn.

Leave a Reply

Your email address will not be published. Required fields are marked *