shadow
Diocese de Dili > NOTÍCIAS > LETURA DIÁRIA > Sexta-Feira, II Semana tempo Quaresma

Sexta-Feira, II Semana tempo Quaresma

ANO B

 

Prmeira Leitura                                                                                                                                                                     Gen. 37. 3-4, 12-13ª, 17b-28

Lia housi livro Génesis

Jacob hadomi José lia oan sira seluk, tan nia katuas ona mak oan ne’e moris. Nia haruka halo unuk ida be liman naruk ba José. Nia maun sira haré katak nia aman hadomi José liu fali sira hotu. Tan ne’e, sira hahu rai kunan ba nia; sira lakohi ko’alia di’ak ho nia.

Loron ida, sira ba Siquém atu hein sira nia aman nia bibi. Jacob dehan ba José, “Ó nia maun sira hein hela bibi iha Siquém. Ne’e duni, ó mai, ha’u atu haruka ó ba hasouru sira”. José ba hodi buka nia maun sira; hetan sira iha Dotain.

Sira haré nia housi dook, molok nia atu to’o besik sira, sira futu lia atu oho nia. Sira hateten ba malu: “Mehi na’in mak mai dadaun ne’e. Ita ba oho nia hodi so’e tiha nia ba rai kuak ida; hafoin ita sei haktuir katak asu-fuik ida mak han tiha ona nia. Nune’e ita sei haré nia mehi sira sei sai lós oinsá”.

Maibé, Rúben rona, hakarak buka atu soi nia housi sira liman. Ne’e duni nia hateten ba nia-an rasik: “Ita keta oho nia”. Hafoin nia dehan ba nia maun sira: “Imi keta halo ran fakar. Imi so’e nia ba rai kuak nebé iha rai-fuik maran, maibé imi keta tau liman ba nia”. Rúben hakarak hasai nia housi nia maun sira liman atu lori hikas fali ba nia aman. Wainhira José to’o besik nia maun sira, sira kolu tiha unuk naruk be nia taka. Sira káer nia hodi hatama ba rai kuak, rai kuak mamuk ida nebé wé la iha. Hafoin, sira tur atu han.

Maibé, wainhirasira foti matan, sira haré Ismaelita lubun ida mai housi Galaad. Ismaelita sira nia kuda-kamelu lori naha nakonu ho mina morin, mina bálsamo ho ai-wen morin atu lori ba Egipto. Nune’e, Judá dehan ba nia maun-alin sira: “Sá mak ita manan hodi oho ita alin no subar nia ran? Ita ba faan nia ba ema Ismaelita sira, maibé ita la bele tau liman ba nia. Nia ita alin, isin ida hanesan ita”. Nia maun sira lia tuir malu tiha.

Nune’e ema balun Madiã nialiu housi neba hodi la’o ba basár; sira hasai José housi rai kuak hodi faan tiha nia ba Ismaelita sira ho osan mutin ruanulu. Ema sira ne’e lori José ba Egipto.

Maromak futar lia.

 

Salmo Responsorial                                                                                                                                    Sal. 104(105).16-17, 18-19, 20-21, (R. 5ª)

Refrão : Imi sei hanoin fali kmanek be Na’i halo!!! Repete-se

 

                  Na’i, haraik hamlaha ba rai neba,

                  Halo sira la iha aihan atu han.

                  Iha sira oin haruka mane ida,

                  José, nebé sira faan hanesan atan. Refrão

 

                  Sira kesi nia ain ho korenti,

                  Hadulas nia kakorok ho besi leu,

                  To’o loron nebé halo tuir ona buat hotu,

                  Na’i futar lia dehan nia sala laek. Refrão

 

                  Ne’e duni liurai kore nia,

                  Na’i ulun povo nian fó liberdade ba nia;

                  Halo nia ukun nia uma laran,

                  Ukun mós nia rain tomak. Refrão

 

Aclamaçào                                                                                                                                                                                                                      Jo. 3. 16

Refrão : Maksoyn, Glória no kbiit ba Jesus Cristo, Ami Na’in!!! Repete-se

                  Maromak hadomi teb-tebes mundo hodi haraik Nia Oan Mane-Mesak.

                  Ema nebé fiar iha Nia sei hetan moris rohan laek. Refrão

 

Evangelho                                                                                                                                                                                               Mt. 21. 33-43, 45-46

Na’i Jesus Cristo nia Evangelho nudar São Mateus haktuir

Iha tempo nebá, Jesus dehan ba boot sacerdote sira nian no ba ema katuas sira povo nian: “Imi rona tan aiknanoik ida ne’e: To’os na’in ida kuda to’os ida mesak uvas de’it; hale’u tiha ho lutu, nia halo fatin ida atu sama uvas hodi hari loho ida iha to’os ne’e. Hafoin, nia fó ba ema balun atu tau matan, nia la’o tiha ba dook. To’o ona loron atu ku’u, nia haruka atan sira ba ema nebé káer to’os a tu simu ai-funan nebé monu ba nia. Ema sira ne’e káer tiha atan sira, baku balun, oho seluk, tuda balun, oho balun. Nia haruka fali atan seluk wa’in liu sira uluk. Ema sira ne’e halo ba sira hanesan buat nebé sira halo ba sira uluk. Ikus mai, nia haruka nia oan rasik hodi hanoin ba nia an: ‘Sira sei hamta’uk ha’u oan’. Maibé, haré tiha nia oan, ema sira ne’e dehan ba malu: ‘Ida ne’e mak liman-rohan na’in; oho tiha nia, ita sei hela ho buat hot-hotu’. Kaer tiha nia, sira lori nia ba to’os ninin hodi oho tiha nia. Wainhira to’os na’in mai, nia sei halo lós sá ba ema sira ne’e?” Boot sacerdote no kbahen povo nian hatan ba nia: “Tan sira áat nune’e, nia sei halo sira mate áat teb-tebes. Nia sei fó to’os ne’e ba ema seluk káer, ba ema nebé to’o loron sei lori ai-funan mai hasa’e”. Jesus dehan ba sira: “Imi la da’uk haré iha escritura: ‘Fatuk nebé badaen sira hewai, sei nakfila ba fatuk inan. Buat sira ne’e Maromak halo nebé halo kmanek tebes ba ita matan?” Tan ne’e, ha’u dehan ba imi: Maromak nia reino sei hasai housi imi hodi fó fali ba povo ida nebé bele nafuan liu”.

Wainhira sira rona Jesus nia aknanoik, sacerdote boot ho fariseu sira hateten katak nia ko’alia kona ba sira; maibé, molok sira hanoin atu káer nia, sira ta’uk ema lubun boot nebé simu nia hanesan Profeta.

Lia maksoyn.

Leave a Reply

Your email address will not be published. Required fields are marked *