shadow
Diocese de Dili > NOTÍCIAS > LETURA DIÁRIA > Sabado, II Semana tempo Quaresma

Sabado, II Semana tempo Quaresma

ANO B

 

Primeira Leitura                                                                                                                                                                                   Miq. 7. 14-15, 18-20

Lia housi Profecia Miqueias nian

Na’i, hodi ai kanoa lori Ita Nia povo, luhan laran nebé Ita ukun. Nia moris mesak iha ai-laran, rai tetuk bokur hadulas. Nia bele han du’ut iha Basán no Galaad hanesan iha tempo houri uluk nian; hanesan iha loron nebé imi sai housi Egipto hodi halo ami haré hahalok boot nian. Maromak ida nebé mak hanesan Itaboot nebé kasu salan hodi perdua salan restu ne’e nian nebé Ita ukun, Maromak ida nebé la rai hirus nafatin; haksolok tan hatudu laran-luak? Na’i sei sadi’a ami! Sama ami salan ba rai; so’e ba tasi okos ami nia salan tomak. Hatudu ba Jacob Ita nia laran metin, ba Abraão Ita Nia laran kmanek hanesan Ita jura tiha ona ba ami nia bei-ala sira iha tempo houri uluk liu.

Maromak futar lia.

 

Salmo Responsorial                                                                                                                                     Sal. 102(103). 1-2, 3-4, 9-10, 11-12, (R. 8)

Refrão : Na’i laran kmanek no laran-luak!!! Repete-se

 

                  Ha’u nia klamar hahi Na’i;

                  Ha’u nia-an tomak hahi Nia naran Santo.

                  Ha’u nia klamar hawélok Na’i;

                  La haluha Nia tulun. Refrão

 

                  Nia perdia ó nia sala tomak;

                  Nia halo di’ak ó nia moris hotu.

                  Soi ó nia moris housi mate laran;

                  Hafutar ó ho graça no laran-luak. Refrão

 

                  Hanesan rai dook housi Lalehan,

                  Nune’e mós Nia laran-luak

                  Ba sira be hamta’uk Nia.

                  Hanesan loro-sa’e dook housi loro-monu,

                  Nune’e mós Nia hadook ita sala housi Ita. Refrão

 Aclamação                                                                                                                                                                                                                  Lc. 15. 18

Refrão : Hahi no glória ba Ita, Jesus Cristo, ami Na’in!!! Repete-se

                  Ha’u la’o ona; ha’u ba ha’u aman hodi dehan ba nia:

                  “Ha’u aman, ha’u sala hasouru Lalehan, sala hasouru ita”. Refrão

               

Evangelho                                                                                                                                                                                                       Lc. 15. 1-3, 11-32

Na’i Jesus Cristo nia Evangelho nu’udar São Lucas haktuir

Iha tempo nebá, ema publicano no maksalak sira hakbesik ba Jesus, atu rona. Maibé ema fariseu no ema escriba sira hateten ba malu: “Ema ida ne’e simu maksalak sira hodi han ho sira”. Tan ne’e, Jesus dehan aiknanoik ida ne’e ba sira.

Ema ida iha oan mane na’in rua. Ida kiik dehan ba nia aman; ‘Ha’u aman, fó mai ona buat hirak nebé ha’u nian!’ Aman ne’e fahe sasan tomak ba sira na’in rua. Liu tiha loron ruma, oan kiik ne’e halibur hamutuk nia sasan tomak, hodi la’o tiha ba rai dook ida; iha neba, nia halo naben nia soi tomak, hodi moris áat liu.

Hamohu tiha nia sasan tomak, rai nia hela ba hamlaha boot. Nia hahu hetan ona susar. Iha oras ne’e, nia serbisu ba ema rai-na’in ida. Rai-nain ne’e haruka nia ba to’os hein fahi. Nia hakarak teb-tebes han ho fahi sira, maibé, ema ida la husik. Iha oras ne’e nia hanoin: ‘Ha’u aman iha ema barak, maibé aihan la kuran; ha’u fali iha ne’e mate hamlaha! Ha’u la’o ona! Ha’u ba ko’alia ho ha’u aman hodi dehan: ‘Ha’u aman, ha’u sala hasouru Lalehan, sala hasouru ita. Ha’u la so’i ona ita atu bolu nafatin ha’u ita oan. Haré de’it ha’u nu’udar ita nia serbisu na’in ida’. Nune’e, nia hamriik ba ko’alia ho nia aman.

Nia sei dook hela, nia aman haré ona nia. Nia aman hanoin nia teb-tebes; halai hasouru nia; hako’ak nia; rein nia. Nia dehan: ‘Ha’u aman, ha’u sala duni hasouru Lalehan, sala hasouru ita. Ha’u la so’i ona ita bolu ha’u oan’. Maibé, nia aman lia tun ba atan sira: ‘Imi ba lori mai lalais hatais furak liu hodi fó hatais nia. Tau kadeli ida iha nia liman; sapatu iha nia ain. Ba dada karau bokur oan ida mai atu oho. Ita sei han hemu; ita sei festa duni, basá, ha’u nia oan ida ne’e mate tiha ona, maibé moris fali! Nia lakon tiha ona, mosu fali’. Hotu, sira hahu festa.

Maibé, oan mane boot sei iha hela to’os. Fila housi to’os, hakbesik dadaun uma, nia rona ema hananu no dansa. Nia bolu atan ida hodi husu sáida mak iha uma! Atan ne’e hatan: ‘Ó nia alin mak to’o ona mai. Ó nia aman haruka oho karau oan bokur ne’e, basá, nia haré ó nia alin fila ho isin di’ak’. Nia hirus boot; lakohi tama. Tan ne’e, nia aman mai hasouru nia, hamaus nia atu tama. Maibé, nia dehan ba nia aman: ‘Tinan hira ona mak ha’u serbi ita; ha’u halo tuir nafatin ita nia hakaran. Maibé, ita la da’uk fó bibi oan ida mai ha’u atu halo festa ho ha’u nia belun sira; ita nia oan ida bé halakon tiha nia soi ho feto áat sira, nia foin to’o mai; ita oho kedas ba nia karau oan bokur ne’e.

Nia aman hatan ba nia: ‘Ha’u oan, ó hôrik lor-loron ho ha’u; sasan tomak ha’u nian ó nian. Maibé ita sei festa duni, ita sei haksolok duni, basá ó nia alin ida ne’e mate tiha ona, moris fali; lakon tiha ona, mosu fali’.

Lia maksoyn.

Leave a Reply

Your email address will not be published. Required fields are marked *