shadow
Diocese de Dili > NOTÍCIAS > LETURA DIÁRIA > III Domingo iha tempo Quaresma

III Domingo iha tempo Quaresma

ANO B

 

Primeira Leitura                                                                                                                                                                                                   Ex. 20, 1-17

Lia housi primeiro livro Êxodo

Iha loron hirak nebá, Maromak dehan lia-fuan hirak ne’e houtu: “Ha’u mak Na’i, ó nia Maromak; Ha’u mak hasai ó housi Egipto rain, housi uman atan fatin. Ó la iha tan maromak seluk, mak Ha’u de’it. Ó la bele badaen naran íilas buat lalehan tutun nian ida, eh rai nian, eh wé rai-okos nian. Ó keta tuku-tur ba rai hana’i ba sira. Ha’u ó Na’i, ó Maromak, Maromak nebé hakarak hana’i de’it ba Nia. Ema sira be hewai Ha’u, Ha’u sei kastigu oan ho bei-oan ba bei-oan sira, tan aman-inan sira salan;  maibé,  sira  nebé  hadomi  Ha’u,  halo  tuir  Ha’u  nia ukun-fuan, Ha’u sei hatudu laran luak ba sira nia bei-oan rihun ba rihun. Ó keta temi Na’i, ó nia Maromak naran, atu tahan lian nebé, hun-ábut la iha, basá, Na’i fó kastigu ba ema nebé temi Nia naran hanesan ne’e. Ó sei hanoin nafatin loron sábado, atu ó bele halo nia sai santo. Iha loron neen nia laran, mak ó sei kaer ó knaar, hodi halo buat houtu nebé ó iha atu halo. Maibé, bain-hitu, loron hamaha-an nian, loron ó Na’i, ó Maromak nian. Ó, ó nia oan mane eh oan feto, ó atan mane eh atan feto, ó nia balada dian sira, eh ema rai seluk be hourik ho ó, labele halo naran serviço ida. Basá, Maromak halo lalehan, rai, tasi no buat houtu nebé sira iha, iha loron neen nia laran; maibé, to’o bain-hitu nia hamaha-An. Tan ne’e, mak Na’i haraik bensa, hodi halo santo loron sábado. Ó sei hamta’uk ó aman no inan; halo nune’e, ó nia moris sei naruk iha rai nebé Na’i, ó nia Maromak atu haraik ba ó. Keta óho, keta halo adultério. Keta na’ok, keta foti lia bosok hodi kesar ema. Keta ka’an ema nia uman, keta ka’an ema nia káben no ema nia atan mane eh atan feto, karau eh kuda, naran buat ida nebé ema nia soin”.

Maromak futar lia.

 

Salmo Responsorial                                                                                                                                                                          Sal. 18 (19), 8, 9, 10, 11

Refrão: Na’i, Ita Boot iha liafuan moris rohan laek!!! Repete-se

 

                  Na’i nia ukun-fuan lós liu,

                  Nia halo di’ak ba klamar.

                  Na’i fó sasin lós,

                  Ba kiik sira nia fó matenek. Refrão

 

                  Na’i ukun-fuan sira lós tebes, mós duni.

                  Sira haksolok fuan,

                  fó roman ba ita matan. Refrão

 

                  Na’i nia hakaran mós tebes,

                  hela ba nafatin;

                  Na’i tesi lia lós tebes. Refrão

 

                  Sira furak liu osan mean,

                  sira midar liu wani wén. Refrão

 

Segunda Leitura                                                                                                                                                                                               1 Cor. 1, 22-25

Lia husi São Paulo nia surat ba sarani sira iha Corinto

Maun-alin sira: Judeu sira husu milagre, Grego sira buka matenek. Maibé, ami hanourin ba imi Cristo mate iha Cruz, nebé Judeu sira hanoin aat, Grego sira hanoin bulak; maibé ba sira nebé Maromak bolu, Judeu ka Grego, Cristo Maromak nia kbiit, Maromak nia matenek. Basá, ida nebé Maromak nia bulak, matenek liu ema sira; ida nebé Maromak nia kbiit laek, maka’as liu ema sira.

Maromak futar lia.

 

Aclamação                                                                                                                                                                                                                      Jo. 3. 16

Refrão : Hahi ba Ita Boot Jesus Cristo glória rohan laek nia liurai!!! Repete-se

                  Maromak hadomi teb-tebes mundo, To’o fó Nia Oan Mane-Mesak ba nia.

                  Ema houtu nebé fiar Nia, sei hetan moris rohan laek. Refrão

 

Evangelho                                                                                                                                                                                                                Jo. 2, 13-25

Na’i Jesus Cristo nia Evangelho nu’udar São João haktuir

Iha tempo nebá, besik daudaun ona Judeu sira nia Páscoa; Jesus sa’e ba Jerusalém. Nia hetan iha Uma-Oração ema fa’an karau, bibi ho manu falur sira, ho ema sira nebé troka osan tur hela iha banku. Nia bobar tali hamutuk, hodi duni sai sira houtu housi Uma-Oração, hamutuk ho bibi no karau sira. Nia halo namtate ba rai, bankeiro sira nia osan troka, no taka fila mesa sira; Nia lia tun ba sira be fa’an falur: “Hasai buat ne’e housi ne’e; imi keta halo Ha’u Aman nia uman, uma kontratu nian”. Escolante sira hanoin kedas liafuan be hakerek: “Tan badinas tau matan ba Ó uman, Ha’u lakon Ha’u-an”. Judeu sira hahú ko’alia, hodi husu ba Nia: “Sinal nebé mak Ó hatudu mai ami, katak Ó bele halo hanesan ne’e?” Jesus hatán ba sira: “Imi sobu tiha Uma-Oração ida ne’e, Ha’u harí fali nia iha loron tolu laran”. Judeu sira dehan: “Uma-Oração ne’e, ema halo iha tinan hatnulu resin neen nia laran, Ó, iha loron tolu nia laran bele harí?” Maibé, Jesus dehan tiha kona ba Uma-Oração nebé Nia isin rasik. Tan ne’e, wainhira Jesus moris hi’as housi mate, Escolante sira hanoin kedas katak, uluk Nia dehan nanis; nune’e, sira fiar Escritura no lia hirak nebé uluk Nia dehan. Wainhira Jesus sei hela iha Jerusalém, iha festa Páscoa, ema barak fiar iha Nia naran, tan haré buat foun hirak nebé Nia halo. Maibé, Nia la fiar sira, basá, Nia hatene máten sira. Nia la kuran atu ema fó hatene ba Nia, kona ba naran ema ida nia hahalok: Nia hatene didi’ak buat sá mak iha ema laran.

Lia maksoyn

Leave a Reply

Your email address will not be published. Required fields are marked *