shadow
Diocese de Dili > NOTÍCIAS > LETURA DIÁRIA > Quinta-Feira, III Semana tempo Quaresma

Quinta-Feira, III Semana tempo Quaresma

ANO B

 

Primeira Leitura                                                                                     Jer. 7. 23-28

Lia housi livro Jeremias nian

Na’i lia tun nune’e: “Ha’u fó hatene ona ba Ha’u nia povo nune’e: ‘Imi rona Ha’u lian ba. Ha’u sei sai imi nia Maromak, imi Ha’u nia povo. Imi sei tuir lolos dalan nebe Ha’u hatudu ba imi atu imi bele hetan ksolok’. Maibe sira la rona, sira la fó laran. Sira tuir buat áat hirak nebe sira laran hakarak; sira fila kotuk; sira la la’o mai hasoru Ha’u.  Hahu ba loron nebe sira nia bei-ala sira sai housi rai Egipto, to’o ohin loron, H’au haruka ba to’o sira profeta sira hotu, Ha’u nia atan lor-loron, dader-dader. Maibe sira la rona Ha’u, sira la fo laran ba Ha’u; sira ulun fatuk tós, sai áat liu fali sira nia bei-ala sira. Ó dehan karik hirak ne’e hotu ba sira, sira sei la rona ó; ó bolu karik sira, ne’e mos sira sei la hatan ba ó. Ne’e duni ó sei dehan ba sira: ‘Povo ida ne’e la rona nia Na’i Maromak futar lia, lakohi mós hanourin-an. Nia dehan: Laran la metin tan ona’”.

Maromak Futar Lia.

 

Salmo Responsorial                                                                                                                                                     Sal. 94(95). 1-2, 6-7, 8-9 (R. cf. 8)

Refrão : Ohin imi rona karik Na’I nia lian, keta taka imi fuan. Repete-se

 

Mai, ita hahi, haksolok iha Na’i,

Mai haklalak ba Maromak, ita Maksoi.

Ita ba Nia futar oin hodi agradece,

Hodi knanauk haklalak ba Na’i. Refrão

 

Mai ita monu taka oin ba rai

Hodi adora Na’i be halo ita.

Basá, Nia mak ita nia Maromak;

Ita mak Nia povo, ita mak Nia bibi sira. Refrão

 

Imi rona karik ohin Nia futar lian:

“Keta taka imi fuan, hanesan iha Meribá,

Hanesan loron iha massa iha rai fuik maran,

Iha nebe imi aman sira babeur Ha’u, koko Ha’u,

Maski sira hare ona Ha’u nia hahalok sira”. Refrão

 

 Aclamação                                                                                                                                                                                                            Joel. 2. 12-13

Refrão :  Hahi ba Ita, Jesus Cristo, Liurai glória rohan laek nian. Repete-se              

                    Na’i dehan, fila imi laran no neon tomak mai Ha’u,

                    tan Ha’u laran diak no laran luak tebes! Refrão

 

Evangelho                                                                                                                                                                                                               Lc. 11. 14-23

Na’i Jesus Cristo nia Evangelho nudar São Lucas haktuir

Iha tempo neba, Jesus duni sai daudaun demónio ida, ema ne’e monok. Demónio sai tiha husi nia, ema monok ne’e koalia kedas. Ema lubun boot sai hakfodak hotu. Maibe sira balun hateten: “ Hodi Belzebu, demónio sira nia ulun, mak nia duni sai demónio sira”. Sira seluk atu koko Jesus, husu sinal ida housi Lalehan ba Nia. Maibe Jesus, nebe hatene hela sira nia laran, dehan: “Reino hot-hotu nebe fahe-an, funu hasoru nia-an rasik, sei sai mohu no uma hot-hotu sei monu ida-idak iha ida seluk nia leten. Satanás mos fahe-an karik, funu hasoru nia-an rasik, oinsa ninia reino bele hari metin? Imi hateten katak hodi Belzebu, mak Ha’u duni sai demónio! Ha’u duni sai karik demónio hodi Belzebu, hodi sé fali mak imi nia maluk sira duni sai demónio? Ne’e duni sira rasik sei tesi lia ba imi. Maibe, Ha’u duni sai karik demóio hodi Maromak Nia biit, ne’e katak, Maromak nia reino to’o ona iha imi leet. Uainhira ema biit-nain ida, ho kro’at iha liman, hein nia uma, nia sasan sira sei la lakon. Maibe, uainhira ema ida biit liu fali nia, mai manan nia, hasai tiha kro’at iha nia liman, hadau nia sasan hotu hodi fahe ba malu.

Ida nebe la hamutuk ho Ha’u, hasouru Ha’u, no ida nebe hasouro Ha’u, sei la’o namkari, sei mohu”.

Lia Maksoyn

Leave a Reply

Your email address will not be published. Required fields are marked *