shadow
Diocese de Dili > NOTÍCIAS > REFLEXÃO > APRENDE HUSI NICODEMOS

APRENDE HUSI NICODEMOS

DOMINGO QUARESMA IV/Ano B/2018

2Crn 36,14-16.19-23; Ef 2,44-10; Jo 3,14-21

 

Primeira Leitura                                                                                                                                                                          2Crn.  36,   14-16.   19-23   

        Lia husi livro Crónica:

Iha loron hirak nebá, Judá nia na’i-ulun sira houtu, sacerdote no povo, halo sala barak liu tan: sira halo tuir hahalok aat nação gentio sira nian, sira sala hasoru Uma-Oração, nebé, Na’i halo santo iha Jerusalém. Na’i, sira bei-ala sira nia Maromak, haruka lalais, haruka bei-beik ninia manu-ain sira ba hasouru sira, basá, Nia hakarak atu soy nia povo, soy nia horik fatin. Maibé sira hateten aat Maromak nia manu-ain sira, hewai Nia liafuan, mangasáan ninia profeta sira, halo Nia hírus liu tan hasouru Nia povo. Ema Caldeu sira, sira sunu tiha Maromak nia Uma-Oração, sobu Jerusalém nia baki, tau áhi ba nia kadunan sira houtu, halo nabéen nia murak sira. Caldeu sira nia Liurai, lori ba Babilónia sira houtu nebé nia la óho, hodi halo sira sai atan ba nia, ho nia oan sira, to’o loron harí reino persa. Nune’e halo tuir duni lia nebé, Na’i dehan sai housi Jeremias nia ibun: “Rai sei sai aat, sei la kuda fini iha tinan hitu-nulu nia laran, to’o hamaha-an ne’e, selu sábado-sábado nebé la halo tuir”. Iha tinan uluk, Ciro, Liurai pérsia nian, atu sai tuir duni Na’i nia liafuan mai housi Jeremias, Na’i fó hanoin Ciro, Liurai pérsia, nebé haruka fó sai iha nia reino tomak, ho lian maka’as no mos hakerek, liafuan hirak ne’e:“Ciro, liurai pérsia nian, hateten nune’e: Na’i, lalehan nia Maromak, tau iha ha’u liman, reino sira houtu rai ninian. Nia rasik haruka ha’u harí Uma-Oração ida iha Jerusalém, Judá nian. Imi sira houtu nebé pertence ba nia povo, la’o ba! Maromak hamutuk ho imi”.  Maromak Futar Lia.

 

Salmo Responsorial                                                                                                                                                              Sal.  136  (137),  1-2, 3, 4-5, 6

Refrão : JERUSALÉM, HA’U HALUHA TIHA KARIK Ó,      

                  HÁ’U NANAL SEI TO’OS TIHA!!! Repete-se

  • Iha mota sira Babilónia sira ninin

           Ami tur tanis hodi hanoin Sião.

           Iha ai salgueiro be moris mota ninin,

           Ami tara ami cítara. Refrão

 

  • Sira be dadur ami, husu ami hananu,

          Sira be haterus ami, husu ami ksolok.

         “Imi hananu ba sira dehan imi hananu ba

          Sião nian knananuk!”. Refrão

 

  • Oin Sá ami hananu iha ema seluk rain?

           Ha’u liman matek tiha ba,

           Ha’u haluha tiha karik ó, Jerusalém! Refrão    

 

  • Ha’u nanal belit tiha iha ibun laran ba,

          Ha’u haluha karik ó, ha’u la tau karik ó

          Iha ksolok houtu nia leten, Jerusalém! Refrão

 

Segunda Leitura                                                                                                                                                                                                       Ef.  2, 4-10

Lia husi São Paulo nia surat ba sarani sira iha Êfeso:        

Maun-alin sira, Maromak laran luak teb-tebes: tan hadomi ita teb-tebes duni, ita sira be mate tan ita salan, Nia fó hikas moris mai ita hamutuk ho Cristo; imi simu leet Maksoyn! Nia halo ita moris hi’as ho Cristo, ho Cristo,  Nia halo ita tur iha lalehan.  Nune’e,Nia hakarak hatudu iha tempo ikus  nebé sei mai, Ninia graça wa’in  no boot tebes, tan laran luak nebé Nia hatudu mai ita, iha Cristo Jesus. Ne’e duni, hodi graça mak ita hetan maksoyn housi fiar. Ne’e la mai husi imi; ne’e Maromak nia tulun; ne’e Laos tamba hahalok; tan ne’e, ema ida labele foti-an. Maromak hakiak ita iha Cristo Jesus, atu ita halo buat di’ak nebé Maromak hadi’a hela mai ita, nu’udar dalan, ita atu tuir.

Maromak Futar Lia.

 

Aclamação                                                                                                                                                                                                                     Jo.  3,  16

Refrão : Glória ba Cristo, Maromak lian. Repete-se

                   Maromak hadomi tebes mundo Nia fó nia oan mane mesak ba nia.

                   Ema houtu nebé fiar nia, Hetan moris rohan laek.  Refrão

 

 

Evangelho                                                                                                                                                                                                              Jo. 3,  14-21

        †      Na’i  Jesus Cristo nia Evangelho Nu’udar São João haktuir

Iha tempo nebá, Jesus lia tun ba Nicodemos: “Hanesan uluk Moisés foti samean iha rai-fuik maran, nune’e mos mane Maksoyn ema sei foti, atu ema houtu nebé fiar, bele hetan moris rohan laek iha Nia. Maromak hadomi teb-tebes mundo, to’o fó nia oan mane mesak, atu ema houtu nebé fiar iha Nia labele lakon, maibé hetan moris rohan laek. Basá, Maromak la haruka oan mane mai iha mundo atu fó terus mundo,maibé atu hodi Nia tulun, mundo hetan Maksoyn. Ema nebé fiar iha Nia, la hetan todan, maibé ema nebé la fiar, hetan ona kastigo, basá la fiar Maromak oan mane mesak nia naran. Hetan todan tamba ne’e: Roman mai iha mundo, ema sira hadomi nakukun liu fali roman, tamba sira nia hahalok aat. Ema houtu nebé hahalok aat, hewai roman, la besik ba roman, atu ema keta haré nia hahalok. Maibé, ema nebé moris tuir lialós, hakbesik na ba roman, atu mosu momos katak buat houtu nebé nia halo, halo iha Maromak”.

Lia Maksoyn.   

 

 

Reflexão :

APRENDE HUSI NICODEMOS

 

São Paulo hakerek Carta ba comunidade sarani iha Êfeso dehan:”Nia halo ita moris hi’as ho Cristo, ho Cristo,  Nia halo ita tur iha lalehan”.    Iha ninia motto nebe reflecte ba Santo Agostinho nia pensamento, São Anselmo de Canterbury (1033-1109) hatete lia murak ida nee:”Fides quaerens intellectum (a fé necessita/procura a inteligência/fiar precisa matenek). Motto ida nee São Anselmo fo sai hodi motiva ita nudar sarani buka no compreende ita nia sarani nian. Domingo semana nee, Nicodemos sei fo exemplo mai ita hodi compreende saida mak ita fiar.

Domingo semana nee, Evangelho sei relata mai ita kona ba dada-lia (diálogo/entrevista) klean entre Jesus ho Nicodemos. Nicodemos nudar figura religioso boot ida nebe ema considera hanesan mestre boot ao mesmo tempo Jesus mos povo barak considera hanesan mestre ida mos. Evangelho relata katak; Nicodemos mai hasoru malu ho Jesus iha kalan. Nicodemos nee hola knaar hanesan Conselheiro iha conselho religioso judaico nian (Sanhedrin). Encontro ida nee nudar conversa eh acontecimento boot ida iha Testamento Foun nian. Lia menon saida mak ita bele hetan husi diálogo entre Jesus ho Nicodemos nee? Mai ita le hodi reflecte hamutuk.

Iha vida religiosa eh moris hanesan ema fiar nain, ema hotu hatene no fiar duni ba Maromak. Ema nia fiar ba Maromak laos atu halo ema aumenta ninia conhecimento kona ba Maromak maibé, fiar nee atu halo ita hatene-an no bele haraik-an iha Maromak nia futar oin. Experiência no história mundo nian hatudu ona katak; ema nebe nebe la haraik-an nia sei hatudu-an nudar ema nebe la precisa Maromak. Exemplo mak dictator hirak nebe mosu iha história universal. Jesus nia lalaok fase apóstolo sira nia ain iha quinta feira santa hanorin ita katak; ho humildade (haraik-an) deit mak halo ita sai boot. Ita nia haraik-an halo ita buka hatene ita nia fiar no tulun ita atu halo tuir Maromak nia hakarak. Iha citação badak husi Evangelho São João Capítulo 3 (versículo 14-31); Jesus hatete ba Nicodemos nunee:”Hau hatete ba o, tebes duni se ema ida la moris hikas fali, nia sei la bele haré Reiono Maromak nian”.

Nicodemos, ema nebe idade avançada ona, matenek boot, membro Sanhedrin, nia rona kona ba Jesus maibé, nia seidauk conhece didiak Jesus. Atu keta hamosu desconfia iha comunidade nia leet, inclui iha Sanhedrin rasik, Nicodemos decide atu ba hasoru malu ho Jesus iha tempo kalan. Iha visita nee, Nicodemos hakarak conhece diak liu tan Jesus. Maibé, infelizmente, iha encontro nee, Jesus sadik Nicodemos hodi hatete katak:”o precisa moris hikas fali” (versículo 7). Liu tan, Jesus lia tun ba Nicodemos: “Hanesan uluk Moisés foti samean iha rai-fuik maran, nune’e mos mane Maksoyn ema sei foti, atu ema houtu nebé fiar, bele hetan moris rohan laek iha Nia”.

Atu Nicodemos bele reconhece nia-an didiak, Jesus utiliza istória sira iha Antigo Testamento kona ba povo Israel iha rai fuik maran (deserto) nebe hetan susar/mate tanba samea tata (Nm 21,4-9). Tanba nee mak Moises halo estátua samea husi riti hodi tara iha ai leten. Ema ruma nebe samea tata kanek, wainhira fihir ai-rin nee, nia sei la hetan susar. Jesus rasik ema tara iha Cruz. Nunee, ema terus todan eh terus kaman  (pecador) nebe fihir Cruz nee, sei hetan salvação.

Iha conversa entre Jesus ho Nicodemos nee, saida mak ita bele foti hanesan bukae fiar nian? Nicodemos nia lalaok nee loke ita sarani balu nebe sente-an matenek, riku, estudioso, posição boot, osan barak, riku-soin wain, conhecido, nst, hatene-an hodi moris haraik-an buka soin Maromak nian. Nicodemos nia lalaok buka lialos nee halo nia hetan motivação hodi entende Jesus nia ai-knanoik kona ba sentido Moris Fali. Nicodemos dúvida ho explicação Jesus nian kona ba lalaok moris fali nee atu tama Reino Lalehan. Nicodemos hatene katak nia idade avançada ona, nia nudar membro Sanhedrin, será que nia tem que fila fali ba inan nia knotak hodi moris fali? Maibé, sentido moris fali nebe Jesus hanorin ba Nicodemos mak moris fali espiritualmente (simu we baptismo) no hetan salvação iha Cruz Jesus Cristo nian.

Nudar ema sarani nebe dala barak sempre dúvida ho realidade oioin iha moris nee, Nicodemos nia dúvida kona ba moris fali, sai mos ita nia dúvida fiar iha moris sarani nian. Dala barak ema matenek balu considera-an hatene buat barak, ema riku balu considera-an iha buat hothotu, ema religioso balu considera-an besik liu Maromak,…nst. Maibé, afinal sira la consciente katak saida mak sira iha, saida mak sira hatene, saida mak sira halo, nudar parte kiik ida husi universo ida nee. Iha buat wain nebe ita seidauk descobre didiak iha moris nee. Dalaruma ita mos precisa banati tuir Nicodemos nia lalaok hodi buka tuir lialos. Maske matenek boot, idade avançada hetan experiência barak iha moris maibé, nia sente-an seidauk hatene buat barak. Tanba nee mak nia ho haraik-an hodi buka Jesus no buka entende didiak Jesus nia explicação kona ba moris fali iha we baptismo.

Saida mak acontece ba Nicodemos depois de diálogo ho Jesus? Liu tiha momento encontro nee nee, Nicodemos ikus mai acompanha rasik saida mak Jesus halo ba povo Judeu relaciona ho Lia fuan moris foun. Ponto culminante husi Jesus nia ai-knanoik nee mak wainhira Nicodemos acompanha processo julgamento Jesus nian, terus no mate iha Cruz. Husi acontecimento nee mak Nicodemos foin compreende completamente Jesus nia explicação sira. Tanba nee mak iha debate ida entre Fariseu no amululik sira nebe ataca Jesus, Nicodemos mosu hodi defende Jesus nia lalaok iha sociedade (Jo 7,51). Wainhira Jesus husik iis iha Cruz tutun, Nicodemus mak lori mina morisn hodi kose ba Jesus iha cerimônia funerária (hakoi mate) Jesus nian (Jo 19,39). Nee mak vida exemplar husi processo fiar nebe extra-ordinário husi ema matenek boot no religioso hanesan Nicodemos nebe conhece ona Jesus.

Hanesan experiência Nicodemos nian, Evangelista João mos hakarak  convida ita nudar Cristão  Católico katak; Jesus nia explicação kona ular iha rai fuik maran (Deserto) no Jesus nebe ema hedi iha Cruz fo imagem kona ba ema nia pecado sira. Maibé, além de condição pecadora ema nian nee, Maromak nia domin sei boot nafatin ba ema atu ema hotu hetan opotunidade hanesan hodi hetan salvação husi Maromak. Husi Nicodemos nia experiência encontro ho Jesus fo tulun ita atu durante tempo Quaresma nee, ita bele hamate egoismo sira, hatene haraik-an, hatene haré hetan ita nia fraquesa/kelemahan sira atu husi lalaok nee, ita bele fihir Jesus nia Cruz nudar sinal Salvação. Assim Seja e Bem Haja. (ignaslopes)

Leave a Reply

Your email address will not be published. Required fields are marked *