shadow
Diocese de Dili > NOTÍCIAS > REFLEXÃO > Leitura no Reflexão

Leitura no Reflexão

DOMINGO IV DA QUARESMA

ANO B

 

Lia housi Livro Crónica :                                                                                                                                                                2 Crn. 36, 14-16. 19-23

Iha loron hirak nebá, Judá nia na’i-ulun sira houtu, Sacerdote sira no povo, halo sala barak liu tan: sira halo tuir hahalok aat nação gentio sira nian, sira sala hasouru Uma-Oração, nebé, Na’i halo Santo iha Jerusalém. Na’i, sira bei-ala sira nia Maromak, haruka lalais, haruka bei-beik ninia manu-ain sira ba hasouru sira, basá, Nia hakarak atu soy nia povo, soy nia horik fatin. Maibé sira hateten aat Maromak nia manu-ain sira, hewai Nia liafuan,  mangasáan ninia Profeta sira, halo Nia hírus liu tan hasouru nia povo. Ema  Caldeu  sira, sunu tiha Maromak nia Uma-Oração, sobu Jerusalém nia baki, tau áhi ba nia kadunan sira houtu, halo nabéen nia murak sira. Caldeu sira nia liurai, lori ba Babilónia sira houtu nebé nia la óho, hodi halo sira sai atan ba nia, ho nia oan sira, to’o loron harí reino Persa. Nune’e, halo tuir duni lia nebé, Na’i dehan sai housi Jeremias nia ibun: “Rai sei sai aat, sei la kuda fini iha tinan hitu-nulu nia laran, to’o hamaha-an ne’e, selu sábado-sábado nebé la halo tuir”. Iha tinan uluk, Ciro, liurai Pérsia nian, atu sai tuir duni Na’i nia liafuan mai housi Jeremias, Na’i fó hanoin Ciro, liurai Pérsia, nebé haruka fó sai iha nia reino tomak, ho lian maka’as, no mos hakerek, liafuan hirak ne’e: “Ciro, liurai Pérsia nian, hateten nune’e: Na’i, lalehan nia Maromak, tau iha ha’u liman, reino sira houtu rai ninian. Nia rasik haruka ha’u harí Uma-Oração  ida iha Jerusalém, Judá nian. Imi sira houtu nebé pertence ba nia povo, la’o ba! Maromak hamutuk ho imi”.

 

Salmo Responsorial                                                                                                                                                                 Sal. 136 (137), 1-2, 3, 4-5, 6

Refrão:       Jerusalém, ha’u haluha tiha karik ó, ha’u nanal sei to’os tiha! Repete-se

Iha mota sira Babilónia nian sira ninin

ami tur tanis hodi hanoin Sião.

Iha ai salgueiro be moris mota ninin,

ami tara ami cítara. Refrão

 

Sira be dadur ami, husu ami hananu,

sira be haterus ami, husu ami ksolok.

“Imi hananu ba – sira dehan – imi hananu ba

Sião nian knananuk!” Refrão

 

Oin sá ami hananu iha ema seluk rain?

Ha’u liman matek tiha ba,

ha’u haluha tiha karik ó, Jerusalém! Refrão

 

Ha’u nanal belit tiha iha ibun laran ba,

ha’u haluha karik ó, ha’u la tau karik ó

iha ksolok houtu nia leten, Jerusalém! Refrão

 

Lia housi São Paulo nia surat ba sarani sira iha Êfeso :                                                                                                                            Ef. 2, 4-10

Maun-alin sira: Maromak laran luak teb-tebes: tan hadomi ita teb-tebes duni, ita sira be mate tan ita salan, Nia fó hikas moris mai ita hamutuk ho Cristo; imi simu leet Maksoyn! Nia halo ita moris hi’as ho Cristo; ho Cristo, Nia halo ita tur iha lalehan. Nune’e, Nia hakarak hatudu iha tempo ikus nebé sei mai, Ninia graça wa’in no boot tebes, tan laran luak nebé Nia hatudu mai ita, iha Cristo Jesus. Ne’e duni, hodi graça mak imi hetan Maksoyn housi fiar. Ne’e la mai housi imi; ne’e Maromak nia tulun; ne’e laós tamba hahalok; tan ne’e, ema ida labele foti-an. Maromak haki’ak ita iha Cristo Jesus, atu ita halo buat di’ak nebé Maromak hadi’a hela mai ita, nu’udar dalan, ita atu tuir.

 

Na’i Jesus Cristo nia Evangelho nu’udar São João haktuir :                                                                                                                   Jo. 3, 14-21

Iha tempo nebá, Jesus lia tun ba Nicodemos: “Hanesan uluk, Moisés foti samean iha rai-fuik maran, nune’e mos Mane Maksoyn ema sei foti, atu ema houtu nebé fiar, bele hetan moris rohan laek iha Nia. Maromak hadomi teb-tebes mundo, to’o fó nia Oan Mane mesak, atu ema houtu nebé fiar iha Nia labele lakon, maibé hetan moris rohan laek. Basá, Maromak la haruka Oan mai iha mundo atu fó terus mundo, maibé, atu hodi Nia tulun, mundo hetan Maksoyn. Ema nebé fiar iha Nia, la hetan todan, maibé ema nebé la fiar, hetan ona kastigo, basá, la fiar Maromak Oan Mane mesak nia naran. Hetan todan tanba ne’e: Roman mai iha mundo, ema sira hadomi nakukun liu fali roman, tanba sira nia hahalok aat. Ema houtu nebé hahalok aat, hewai roman, la besik ba roman, atu ema keta haré nia hahalok. Maibé, ema nebé moris tuir lialós, hakbesik an ba roman, atu mosu momós katak buat houtu nebé nia halo, halo iha Maromak”.

 

Hanoin kona ba ó rasik nia fiar: 

Iha Evanjéliu ohin nian Joaun ko’alia kona ba Maromak nian domin boot mai ita. Atu hatudu Nian domin boot mai ita, Nia haruka Nia Oan Mane mesak Jezus mai iha ita mundu. Evanjéliu ne’e, dehan mai ita katak, Jezus mai la’ós atu kondena ita maibé, atu dada dalan naroman nian ba ita, so’i ita, hodi hadame ho Maromak.  La’ós ema hotu hakarak moris/la’o iha naroman. Ema nebé halo sala, sira hadook-an hosi naroman, sira lakohi atu ema tomak hatene sira nian hahalok aat. Sira ta’uk katak iha naroman sira bele haree ba sira rasik nian salan no sei presiza muda sira-an. Ita tomak bele ba la’o iha naroman laran hodi haree di-di’ak ba ita nian hahalok sira hodi ita bele mudaan/hakfila-an. Ema sira nebé moris ho tebes, la subar/taka buat ida, sira sei ba la’o iha naroman laran. Sira nebé tuir Jezus, hanesan sira nian naroman, sira hetan salvasaun. Sira sei sai fali hanesan naroman ba ema seluk sira, ezemplu lakan nabilan ba ema tomak atu haree oinsá mak Maromak uza sira.  Evanjéliu ohin nian Jezus dehan, “Naroman mai iha mundu rai klaran.”  Mak ita hakarak duni ita sei fihir rasik hodi la’o iha nakukun laran eh iha naroman hodi bele sai liu tan hanesan Jezus, naroman ba ema seluk. Kuaresma tempu atu ita fihir ita nian dalan ba hadamen-an ho Maromak.   Ó ahi oan lakan nabilan ba ema sira nebé moris hale’u ó? Ó hatudu tutan Maromak Nian Liafuan Di’ak hosi ó nian hahalok? Ó hadi’a-an ba Páskua hodi simu Sakramentu Rekonsiliasaun?

 

EVANGELHO – Jo 3, 14-21 

Ita-nia testu pertense ba sesaun introdutória Evanjellu Dahaat nian (kf. Jo 1,19-3,36), ihane’ebé personajen oioin mosu atu aprezenta kona-ba sé mak Jezús. Testu ohin nian halo parte konversa entre Jezús no “xefe judeu nian ida” naran Nicodemos (kf. Jo 3,1). Nicodemos bá vizita Jezús iha “kalan” (kf. Jo 3,2), karik atu hatudu katak nia lakohi tau nia pozisaun iha estrutura relijiza judaika iha perigu. Membru Sinédrio nian, Nicodemos ikusmai sei mosu, atu defende Jezús iha xefe farizeu sira nia oin (kf. Jo 7,48-52). Ita mós hetan nia iha altura ne’ebé ema hatuun Jezús husi krús no tau iha rate (kf. Jo 19,39). Konversa entre Jezús no Nicodemos aprezenta etapa tolu. Dahuluk (kf. Jo 3,1-3), Nicodemos rekoñese Jezús nia autoridade, tanba nia obra sira; maibé Jezús hatutan katak ida-ne’e la sufisiente: esensiál mak rekoñese Jezús nu’udar Aman nia manu-ain/enviadu. Daruak (kf. Jo 3,4-8), Jezús anunsia ba Nicodemos katak, atu komprende ninia proposta, presiza “moris husi Maromak” no esplika katak moris foun ne’e mak moris “husi bee no Espíritu”. Datoluk (kf. Jo 3,9-21), Jezús deskreve ba Nicodemos projetu salvasaun Maromak nian: ne’e mak insiativa ida Aman nian, sai prezente iha mundu no ema sira nia moris liuhusi Oan-Mane no konkretiza ho krús/ezaltasaun krús nian. Ita-nia testu pertense ba parte datoluk ne’e.

 

MENSAGEN 

Jezús hahú hodi esplika ba Nicodemos katak Mesias tenke “foti sa’e aas”, hanesan “Moisés foti sa’e samea” iha rai-fuik (samea riti Moisés halo atu kura sira ne’ebé samea tata – kf. Nm 21,8-9). Ilas “foti-sa’e nian” Jezús uza refere ba krús – nesesáriu atu to’o ba vida definitiva. Iha krús mak Jezús hatudu nia domin no hatudu ba ema sira dalan atu sira liu nune’e hetan salvasaun (vers. 14). Sira presiza fiar iha “Mane Makso’ik” foti sae iha krús, atu la lakon maibé hetan moris rohanlaek. “Fiar” iha “Mane Makso’ik” signifika adere ba Nia no ba nia proposta moris nian; signifika aprende lisaun domin nian no halo hanesan Jezús, don totál moris rasik nian ba Maromak no maluk sira (vers. 15). Maibé, katak sá, Jezús nia krús? Oinsá mak krús fó moris definitivu ba ema? Jezús, “Oan-Mane mesak” ne’ebé Aman haruka atu lori vida definitiva, mak don boot domin Maromak nian ba umanidade. Espresaun “Oan-Mane mesak” fó hanoin “Isaac nia sakrifísiu” (kf. Gn 22,16): Maromak nia hahalok hanesan Abraaun nian, nia iha kapasidade atu husik nia oan rasik tan domin (iha Abraaun, domin ba Maromak; iha Maromak, domin ba ema sira)… Jezús, Maromak nia “Oan-Mane mesak”, mai iha mundu atu kumpre Aman nia planu ba ema sira nia di’ak. Tan ne’e mak nia inkarna iha ita-nia istória umana, asume ita-nia frajilidade, partilla ita-nia umanidade; nu’udar konsekuénsia ba luta hasoru nakukun ne’ebé halo ema sai atan, ema kaer nia, tortura nia no oho nia iha krús. Krús mak hahalok ikus moris ida iha domin, iha doasaun, iha saran an. Nune’e, krús mak espresaun aas liu Maromak nia domin sukat-laek ba ema sira hodi oferese salvasaun (vers. 16). Sá loos Maromak nia objetivu atu haruka nia Oan-Mane mesak? Atu liberta sira husi egoízmu, moris-atan, alienasaun, mate, no fó moris rohan-laek. Ho Jezús, ema sira aprende katak moris definitivu konsiste iha obediénsia ba Aman nia planu no iha don moris nian ba maluk sira. Mesias mai iha mundu la’ós atu halo justisa hodi tesi lia; Nia mai atu oferese ba ema hotu moris definitivu, hodi hanorin sira atu hadomi lahó sasukat no haraik ba sira Espíritu ne’ebé nakfilak sira iha Ema Foun (vers. 17). Maromak la haruka nia Oan-Mane mesak atu buka ema di’ak, santu, perfeitu; maibé Nia haruka nia Oan-Mane mesak atu buka ema maksalak sira, egoísta sira, autosufisiente sira, atu aprezenta proposta foun moris nian… Jezús nia domin – nune’e mós Espíritu ne’ebé Jezús husik mai ita – mak nakfilak ema sira ne’e no hatama sira iha dinámika moris foun no moris nakonu nian. Iha Maromak nia oferta salvasaun nia oin, ema tenke halo nia hilin. Se nia aseita Jezús nia proposta no adere ba Nia, nia hili vida definitiva; se nia prefere kontinua sai atan ba eskema sira egoízmu nian no auto sufisiénsia nian, nia hasai nia an husi salvasaun. Salvasaun no kondenasaun la’ós prémiu ne’ebé Maromak fó ba ema tanba ninia komportamentu di’ak eh aat; maibé rezultadu husi ema nia hilin livre, iha Maromak nia oferta inkondisionál salvasaun nia oin. Responsabilidade ba vida definitiva eh ba mate rohan-laek, la monu ba Maromak maibé ba ema (vers. 18). Tuir perspetiva João nian, la eziste mós julgamentu ida abanbairua, iha tempu nia rohan, ihane’ebé Maromak tetu iha dasin ema nia salan sira, atu haree se salva eh kondena nia: juízu realiza iha-ne’e no agora no depende ba atitude ne’ebé ema asume hasoru Jezús nia proposta. Iha parte ikus testu nian (vers. 19-21), João repete tema opsaun ba moris (Jezús) eh ba mate. Nia konstata katak, dalaruma ema rejeita Maromak nia proposta no prefere moris-atan no nakukun nian (egoízmu, injustisa, orgullu, autosufisiénsia, buat hotu ne’ebé impede ema atu haksolok no iha asesu ba vida definitiva). Ema ne’ebé pratika hahalok domin nian (Jezús nia obra sira) hili naroman, identifika an ho Maromak no fó sasin kona-ba Maromak iha mundu.

Leave a Reply

Your email address will not be published. Required fields are marked *