shadow
Diocese de Dili > NOTÍCIAS > LETURA DIÁRIA > Quarta, IV Semana tempo Quaresma

Quarta, IV Semana tempo Quaresma

ANO B

 

Primeira Leitura                                                                                      Is. 49. 8-15

Lia  housi Profeita Isaias nian

Na’i lia tun nune’e: “Iha tempo di’ak nia laran, Ha’u rona ó; iha loron maksoin, Ha’u tulun ó. Ha’u mak halo ó, fihir ó atu ó sai povo nia moruk; hafoun ó rain hodi fahe sasan sira be naksobu; Ha’u dehan ba ema dadur sira, ‘imi sai mai li’ur’. Ba sira nebe hela iha nakukun laran; ‘Imi mosu mai!’. Sira sei han, iha fatin hot-hotu sira sei hetan aihan iha fatuk laran tomak. Sira sei la hamlaha ka hamrook; sira sei la terus loro-manas ua’in tan ida nebe sadi’a sira, nia mak sei dada dalan ba sira atu lori sira ba we matan. Iha foho sira tomak, ha’u sei halo dalan; luron sira sei sai tetuk; sira balu mai husi dook, balu husi Tasi-mane no housi Loro-monu, seluk fali housi rai Siim. Lalehan sira, haksolok ba; rai-klaran hahi ba; im foho sira hananu ho ksolok. Na’i atu hato’o lia di’ak ba Nia povo, atu sadi’a Nia emar sira nia susar. Tan Sião hateten: ‘Na’i, husik tiha ona ha’u mesak; Na’i haluha tiha ona ha’u. Bele ka feto ida haluha kiik-oan be nia fó susu, ou bele haluha tau matan ba nia oan be iha nia knotak? Maski nia bele haluha karik mós, Ha’u sei la haluha ó”.

Maromak Futar Lia.

 

Salmo Responsorial                                                                                                                                        Sal. 144(145). 8-9, 13cd-14, 17-18 (R. 8a)

Refrão :   Na’i laran di’ak no laran maus!!! Repete-se

 

Na’i laran di’ak, laran maus,

La hirus, laran di’ak tebes.

Na’i di’ak ba ema hotu,

Nia laran-luak ba criatura tomak. Refrão

 

Na’I halo tuir lós duni,

Nia liafuan sira tomak.

Nia di’ak tebes iha nia hahalok sira tomak;

Na’i tahan sira hotu nebe ema hanehan. Refrão

 

Na’i lós iha Nia dalan sira tomak,

Di’ak tebes iha Nia hahalok sira hotu.

Na’i besik ba sira be harohan ba Nia,

Ba sira be harohan tebes ba Nia. Refrão

 

Aclamação                                                                                                                                                                                                              Jo. 11. 25, 26

Refrão : Glória ba Ita, Na’i, Maromak moris Nia Oan Mane. Repete-se

                   Ha’u mak moris hi’as no moris.

                   Ema nebe fiar Ha’u, la mate tan. Refrão

 

Evangelho                                                                                                                                                                                                                  Jo. 5. 17-30

Na’i Jesus Cristo nia Evangelho tuir São João Haktuir

Iha tempo neba,judeu sira hateten hasouro Jesus tan Nia halo milagre iha sábado. Maibe Jesus hatan ba sira: “Ha’u Aman serbisu nafatin, Ha’u mós serbisu”. Buat ne’e halo judeu sira atu oho Nia, la’os tan deit halo hasouro sábado, maibe tan mós Nia hanaran Maromak, Nia Aman rasik, hodi tanesan Nia-An ba Maromak. Ne’e duni, Jesus koalia hodi fó hateten ba sira: “ Ha’u dehan lialós ba imi, Oan la bele halo buat ida hodi nia-An rasik, maibe halo de’it buat be nia Aman halo, tamba buat nebe Aman halo, Oan mós halo hanesan. Tamba Aman hadomi Oan hodi hatudu ba nia buat hotu be nia rasik halo; Nia sei hatudu ba nia hahalok boot liu tan hirak ne’e. Imi sei hakfodak. Hanesan Aman be halo mate sira moris hi’as, halo ema sira moris, nune’e mós Oan halo moris sira be nia hakarak. Aman la tesi lia ba ema ida, saran ba Oan atu tesi lia tomak atu ema hotu hahi Oan, hanesan hahi Aman. Ema sé la hahi Oan, Nia la hahi Aman nebe haruka nia mai. Tebes duni Ha’u dehan ba imi: Ema sé rona Ha’u nia lia hodi fiar Ida be haruka Ha’u mai, iha moris rohan laek; nia la hetan castigo; nia liu ona housi mate ba moris. Tebes duni, Ha’u dehan ba imi: oras sei to’o, oras to’o ona, mate sira sei rona Maromak Oan nia lian; sira be rona Nia, sei moris. Tanba, hanesan Aman be iha moris iha nia-An rasik; nune’e mos Nia haraik ba Oan, moris iha nia-An rasik; fó ba Nia ukun atu tesi lia, tan Nia, Oan-Mane. Imi keta hakfodak ho buat ne’e; tan sei to’o oras nebe ema hotu iha rate laran sei rona Nia lian; sira be hahalok di’ak sei moris hi’as ba moris; sira be hahalok áat, sei moris hi’as ba castigo. Ha’u la bele halo buat ida tamba Ha’u-An rasik. Nu’udar Ha’u rona mak Ha’u tesi lia, H’au nia lia tesi lós, tan Ha’u la buka halo tuir Ha’u hakaran, maibe Ida be haruka Ha’u mai nia hakaran”.

Lia maksoyn.

Leave a Reply

Your email address will not be published. Required fields are marked *