shadow
Diocese de Dili > NOTÍCIAS > LETURA DIÁRIA > Quinta, IV Semana tempo Quaresma

Quinta, IV Semana tempo Quaresma

ANO B

 

Primeira Leitura                                                                                      Ex. 32. 7-14

Lia  housi Livro Êxodo

Iha loron hirak neba, Na’i koalia ba Moises nune’e: “Tun ba, tan ó nia povo halo sala, povo nebe o lori mai husi rai Egipto. Lalais de’it sira la’o sala dalan hodi sai housi dalan nebe Ha’u hatudu ba sira. Sira fui besi hodi halo karau oan ida, hakru’uk iha nia oin, hasa’e sacrifício ba nia hodi dehan: ‘Israel, ida ne’e mak ó nia maromak ida be hasai ó housi rai Egipto’”. Na’i hateten mós ba Moises: “Ha’u tau matan ba povo ne’e; povo ida be ema kle’uk tós. Oras ne’e, husik Ha’u halo; Ha’u hirus manas hasouro sira; Ha’u sei halakon tiha sira hodi halo ó sai nação boot ida”. Tan ne’e, Moises buka hamaus Na’i, nia Maromak hodi hateten: “tansá los, Na’i, Ita sei hirus manas hasouro Ita Nia povo, povo be Ita hasai housi rai Egipto ho biit maka’as ho liman beran boot? Tamba Egipto oan sira sei hateten: ‘Ho hanoin áat mak Na’i hasai sira, halo sira mate iha foho hodi halakon sira housi rai-klaran?’ Hatun tiha Ita laran nakali; husik tiha kastigo nebe Ita hakarak haraik ba Ita povo. Ita sei hanoin Abraão, Isaac no Israel, Ita atan sira, nu’udar Ita fó hatene sai ba sira hodi jura ba Ita-An rasik: ‘Ha’u sei halo imi nia derasaan sai wain hanesan fitun lalehan; rai tomak nebe Ha’u haktuir ba imi, Ha’u sei fó ba imi nia derasaan sira nu’udar nia lima-rohan ida ba nafatin’. Tan ne’e, Na’i la castigo Nia povo.

Maromak Futar Lia.

 

Salmo Responsorial                                                                                                                                            Sal. 105(106). 19-20, 21-22, 23 (R. cf. 4a)

Refrão :     Na’i, soi ami tan glória Ita naran nian. Repete-se

Sira halo karau oan ida iha Horeb;

Sira adora Maromak falso

Be sira halo ho osan.

Sira hatrica tiha Ita glória

Hodi foti fali ilas karau ida

Be han du’ut maran. Refrão

 

Sira haluha Maromak be soi sira,

Nebe halo buat foun iha Egipto;

Halo di’ak oi-oin iha rai Cam,

Halo buat mesak boot iha Tasi Mean. Refrão

 

Nia hanoin ona atu halakon sira;

Moisés be Nia fihir

La harohan karik ba Nia tan sira,

La halo malirin karik Nia hirus,

Atu halakon sira.. Refrão

 

Aclamação                                                                                                                                                                                                                      Jo. 3. 16

Refrão : Hahi ba Ita, Jesus Cristo, Liurai glória rohan laek nian. Repete-se

                   Maromak hadomi tebes mundo, to’o fó Nia Oan-Mane-Mesak

                   atu ema hotu nebe fiar iha Nia hetan moris rohan laek. Refrão

 

Evangelho                                                                                                                                                                                                                  Jo. 5. 31-47

Na’i Jesus Cristo nia Evangelho tuir São João Haktuir

Iha tempo neba, Jesus dehan ba judeu sira: “ Ha’u fó sasin ba Ha’u-An rasik karik, Ha’u nia sasin sei la sai nu’udar lós. Ida seluk mak fó sasin mai Ha’u, Ha’u hatene katak sasin ne’e lós nebe Nia fó kona mai Ha’u. Imi haruka manu-ain sira ba João Baptista no nia fó tiha sasin lós nian. La’os husi ema ida nian mak Ha’u simu sasin, maibé Ha’u dehan ne’e ba imi atu imi soi imi-an. Nia mak lâmpada ida nebe leno no nabilan tiha; imi hakarak atu haksolok-an oras uit-oan ho nia naroman. Maibe Ha’u iha sasin ida boot liu João nian, basá buat hotu nebe Ha’u Aman fó mai Ha’u atu hala’o, buat hirak ne’e duni mak Ha’u hala’o, sira hatudu kona ba Ha’u katak Ha’u Aman haruka Ha’u mai. Aman nebe haruka Ha’u mai, Nia rasik fó tiha sasin kona mai Ha’u. Imi seida’uk haré Nia ilas no imi seida’uk iha Nia liafuan atu hôrik iha imi tan imi la fiar iha nebe Nia haruka tiha mai. Imi buka iha Escritura sira, tan iha neba, imi bele hetan moris rohan laek. Sira mak fó sasin kona ba Ha’u. Maibé, imi lakohi mai Ha’u atu hetan moris. La’os housi ema sira mak Ha’u simu glória; maibe, Ha’u hatene momós imi; imi seidauk iha Maromak Nia domin. Ha’u mai hodi Ha’u Aman Nia naran, imi la simu Ha’u. ida seluk mai hodi nia naran rasik karik  imi sei simu nia. Oinsá imi bele fiar, imi be simu malu glória no imi lakohi buka glória nebe mai de’it housi Maromak? Imi keta hanoin katak Ha’u ba kesar imi ba Aman. Iha ema sei kesar imi: Moises, ida nebe imi rai imi laran ba. Imi fiar iha Moisés karik, imi sei fiar iha Ha’u, basá nia hakerek tiha kona mai Ha’u. Maibe, imi la fiar karik iha nia hakerek sira, oinsá imi bele fiar iha Ha’u nia liafuan sira”?

Lia maksoyn.

Leave a Reply

Your email address will not be published. Required fields are marked *