shadow
Diocese de Dili > NOTÍCIAS > OPINIÃO > TIMOR LESTE “QUO VADIS” (Ó BA NE”EBÉ)

TIMOR LESTE “QUO VADIS” (Ó BA NE”EBÉ)

(Nor G. Cardoso)

 

INTRODUÇÃO

                  Timor Leste, rai lafaek, rai ida ne’ebé iha tinan barak nia laran hetan opressão hosi rai barak. Maibé iha momento ne’ebé Timor hahú determina nia jati diri, Timor oan hamutuk hodi hakilar: “viva ukun rasik an”. Timor ida deit, lao iha dalan ida deit, dalan ba ukun rasik an, kilat fuan ikus nian mak ita nia ukun rasik an tenik Sr. Nicolao Lobato, matebian. Luta nafatin keta tauk, keta hakiduk, maske ita sira ne’e mate mohu mos, labaraik ki’ik ida foin moris mai mos kaer bandera, Timor tenke hetan ukun rasik an tenik Sr. Xanana Gusmão. Maibé ida ne’e deit la to’o, ita buka atu reza nafatin no bei-beik atu Timor tenke hetan ukun rasik an, tenik Bispo Dom. Alberto Ricardo da Silva, matebian.     

                  Timor oan sira ida deit, lao iha dalan ida mesak, hae dalan ukun rasik an. Iha Timor oan nia moris ita labele haketak, se mak povo, se mak sarani. Buat rua ne’e sai ida deit, sai ona isin no ran. Iha realidade ohin loron, ita lao hosi sikun ida ba iha sikun ida, hosi sorin ida ba sorin seluk, Timor moris buras to’o naksaren ho hahalok: corrupção, individualismo, hedonismo, materialismo, egoismo nst… uluk luta atu halakon tiha buat sira ne’e hotu. Maibé afinal buat sira ne’e, hanesan diábo ne’ebé hatais hela unuk festa ukun rasik an nian, depois hetan ukun an moris buras hikas fali. Ho realidade hirak ne’e, ita bele husu Timor “quo vadis” (Timor para onde vais-Timor ó ba ne’ebé)? Timor agora lao hela iha dalan perdição. Tamba Timor oan sira nia moris ohin loron, compara karik ho “SODOMA no GOMORA”, sira sei diak liu fali. Rai lafaek ne’e iha tinan hirak tuir mai nia oan sira la muda an, Timor nia moris atu ba los ne’ebé? Timor nia vida sei sai haesan Sodoma no Gomora eh nação sira iha continente África.

 

1.1. Timor Leste, molok ukun rasik an VS ukun rasik an

                  Timor molok ukun rasik an, nia emar sira moris iha unidade, dame, domin, moris iha fuan compaixão (fuan be sente lisuk), fraternidade, harmonia, nst… Nia emar sira hotu hakilar ba mundo unidade nascional, Timor “ida deit”. Liafuan “ida deit” hatudu iha: mate ka moris, ita mate hamutuk; moris mos, moris hamutuk; terus mos, terus hamutuk. Ita bele halo compração ba Timor ida uluk hanesan, ISIN LOLON. Wainhira parte ruma hosi isin lolon ne’e kanek eh tohar ka moras, isin lolon tomak sente hotu moras ne’e. Eh ita bele dehan wainhira liman ruma kanek, matan tanis hodi lelir, no wainhira matan ben sai, liman hamos. 

                  Molok ukun an, Timor nia emar sira nia moris hanesan exemplo iha leten ne’e. Eh ita bele dehan Timor nia moris besik los hanesan anjo sira iha lalehan. Missa la falta, ema domin nain, fuan nakfuan no nakburas ho compaixão, laran kmaus no laran luak. Buat hirak ne’e, buat sira ne’ebé anjo sira nian, maibé ema Timor ida uluk buat sira ne’e iha no sira halao duni iha sira nia moris. Ita haré ema Timor oan sira hanesan los anjo sira ne’ebé lao hela iha rai ne’e.

                  Timor oan sira nia moris uluk moris iha unidade iha diversidade, amizade no fraternidade nia laran. Carácter balu ne’ebé hatudu unidade no fraternidade mak “gotong royong”, la iha diferença iha raça, iha cor, iha lian. Timor iha raça ida deit, cor ida mesak. La  iha funu baluk entre Timor oan, iha funu baluk ida mesak mak opressor, mak colonizador. Timor oan sira hotu-hotu iha mehi ida mesak, “ukun rasik an, duni sai opressor, duni sai colonizador, halakon corupção, sunu motuk individualismo, hedonismo, materialismo, egoismo” ntst…

                  Espírito ida uluk ne’e lakon, buat sira ne’e hotu sai hanesan história. Timor hetan tiha ukun rasik an, sira ne’ebé uluk aventura deit agora sai fali veteranos. Timor oan sira sai fali “bode expiatório” (kambing hitam) no sai traidor ba nia nação rasik. Papa Francisco hatete: “diak liu pecador, do que traidor”. Diak liu laos veteranos, do que uluk traidor ikus mai sai veteranos. Ho ema sira traidor berwajah malaikat, maibé nia fuan no laran hanesan mate isin iha rate laran. Hodi haburas corrupção, individualismo, hedonismo, materialismo, egoismo iha Timor. Halakon identidade no santidade rai lulik, rai Timor nian, ne’ebé ema tomak hatene: “Timor terra de Santa Cruz e terra de Santa Maria”.

                  Hetan ukun an Timor hili dalan democracia, ne’ebé nakonu ho liberdade total. Liberdade ida ne’ebé ikus mai halo ema lakon nia “dever no obrigação”. Sira haluha katak uluk ema barak ran fakar suli ba rai, isin asu mak dada, luta atu hetan ukun rasik an. Maibé iha realidade hatudu ukun rasik an para deit iha democracia. La hanoin ona katak buat ida luta ne’e tenke halo nafatin, luta atu keta iha corrupção, individualismo, hedonismo, materialismo, egoismo iha nação ida ne’e. Maibé Timor oan sira barak luta to’o deit atu hetan democracia, hodi hari partido, hanesan ema sira hadau malu fatin hodi faan kankung.

                  Democracia halo Timor oan barak monu iha laço liberdade irracional. Liberdade be lori Timor lao ba dalan “perdição”. Liberdade lao ba libertinagem, hodi ukun rasik an lao ba perdição. Timor nia liberdade ba libertinagem, “sai ópio” ne’ebé halo Timor oan sira, liu-liu ukun nain sira lori Timor lao ba perdição. Hahalok “ópio” nian hatudu iha: individualismo, egoísmo, opressão, corrupção, violência, aborto, divórcio, hedonismo, materialismo nst… halo ema Timor oan barak haluha sira nia an rasik, Timor oan barak lakon ona fuan compaixão. Ita bele haré bainhira ema ruma hetan acidente ka ema ruma nia uma hetan sunu ka ahi han, ema barak ba hobur hodi hatete liafuan “kasian” no pior liu ba hasai “foto” hodi hatama iha SOSMED (social média), em vez de ba tulun ema ne’e maibé lae, hobur lisuk deit hodi buka atu hatama iha média sira. Timor oan sira para deit iha liafuan “kasian”, laos lolo liman hodi tulun ema ne’e.

                  Hahalok ida tulun malu ne’e ita hetan deit wainhira Timor seidauk ukun rasik an, maibé hetan tiha ukun rasik an buat sira ne’e sai sampah, hanesan sampah sira iha Dili laran ne’ebé ema lori ba soe iha Tibar. Dili hanesan capital Timor nian, maibé iha realidade Dili hanesan capital ba prática: individualismo, egoísmo, opressão, corrupção, moris aat, divórcio, hedonismo, materialismo nst…corrupção moris buras-nakfunan-nakfuan-to’o naksaren, família rahun, moral hahu lakon. Uluk ema Timor badinas atu serviço, maibé ohin loron lae ema hetok badinas liu atu naok.  

                  Timor nia moris compara ho cidade SODOMA no GOMORA nia moris. Cidade rua ne’e sei diak liu. Buat sira individualismo, egoísmo, opressão, corrupção, moris aat, divórcio, hedonismo, prostituição, impureza, libertinagem, idolatria, feitiçarias, ódios, discórdias, ciúmes, iras, rixas, dissensões, divisões invejas, bebedeiras, orgias… sira ne’e sei la halo ita hetan liman rohan reino lalehan nian (cf. Gal. 5:19-21). Buat sira ne’e mos mak cidade rua ne’e halo, ida mos mak Timor oan sira halo. Se ita la halakon buat sira ne’e, keta halo ba Jesus dehan fali lia makaas ba ita: “imi hanoin imi tama reino lalehan, imi sei tun liu ba inferno nia okos liu ba”.  Timor oan sira la reflete hodi hanoin didiak, Timor nia destido sei aat liu fali cidade “SODOMA no GOMORA”.

 

1.2. Sodoma no Gomora sei diak liu Timor (cf. Gen. 19, 1-29)

                  Rai lafaek nia moris ohin loron hanesan los ho Sodoma no Gomora. Maibé cidade rua ne’e sei diak netik, tamba wainhira Maromak atu haruka ahi tun hosi lalehan, atu sunu motuk tiha cidade ne’e, maibé iha ema ida ho naran Abraão ne’ebé brani hodi halo discussão ho Maromak. Cidade rua ne’e Maromak atu sunu motuk tamba iha cidade ne’e nia laran moris buras ho hahalok “individualismo, egoísmo, opressão, corrupção, hedonismo, injustiça, materialismo, moris aat, divorcio nst… hanesan mos buat ne’ebé mak buras los iha Timor.

                  Maske molok Maromak atu harahun no sunu motuk cidade ne’e, iha ema fiar nain no hamtauk Maromak, Abraão ne’ebé ho aten brani hodi halo diálogo ho Maromak, dehan: Na’i iha karik ema justo limanulu, Ita Bo’ot sei harahun nafatin ka lae? Na’i hatan: Há’u sei perdoa cidade ne’e. Maibé Abraão husu tenik: se iha deit ema hatnulu-resin lima, Na’i sei harahun nafatin cidade ne’e? Na’i hatan: Há’u sei la harahun. Abraão husu: ema nain rua nulu deit? hafoin Abraão hatutan hodi husu: keta iha karik ema nain sanulu, Ita Bo’ot sei haruhun cidade ne’e? Na’i hatan: Há’u sei la harahun. maske ikus mai Maromak harahun duni cidade ne’e, tamba ema justo la to’o ho buat ne’ebé Abraão hatete. Maske nune’e Maromak sei salva netik ema justo nain tolu: Lot, ho nia oan feto nain rua.

                  Oinsá ho Timor? Iha ka lae ema fiar nain ho aten brani hodi halo diálogo ho Maromak? Iha Timor laran ita dolar hosi sikun ida to’o lidun ida, su’u hosi ohak to’o leten, Abraão nia saseluk sira [sira hotu ne’ebé simu ona batismo (leigos, consagrados, ordenados)] barak los. Wainhira Maromak atu harahun cidade Timor karik sira ne’e bele eh lae koalia hasoru Maromak hanesan Abraão koalia?

                  Timor nia moris ohin loron, moris buras ho buat aat no buat dodok, mate isin nia nia is mos sei diak liu. Se Timor oan sira la hakribi sala hodi fila laran ba Maromak, Timor nia moris sei aat liu fali cidade rua ne’e. Maromak laos deit lori ahi bai-bain mak sunu motuk rai Timor hanesan sunu cidade rua ne’e, maibé Maromak sei hatun “ahi inferno” nian ne’ebé sei la mate hodi sunu rai Timor.

 

 1.3. Lori Timor ba hakribi salan hanesan cidade Nínive (Jonas. 3, 1-10; 4, 1-11)

                  Cidade Nínive nia emar sira mos moris aat, hanesan lolos Timor nia emar sira nia moris. Maske iha tempo ne’ebá Maromak iha ona hanoin atu harahun cidade ne’e, tamba cidade ne’e la moris tuir ona Maromak nia ukun fuan no Maromak nia hakaran. Maibé tamba cidade ne’e nia emar sira, ho tulun Profeta Jonas nian sira fila laran ba Maromak total no radical hosi hahalok sira individualismo, egoísmo, opressão, corrupção, moris aat, divórcio, hedonismo, prostituição, impureza, libertinagem, idolatria, feitiçarias, ódios, discórdias, ciúmes, iras, rixas, dissensões, divisões invejas, bebedeiras, orgias… Sira halo Jejum no abstinência nascional, hahú hosi liurai tun to’o ba povo kiik sira hotu, no laos deit ema maibé animal sira hotu mos halo Jejum no abstinência. Ikus mai cidade ne’e Maromak la consegue hatun desgraça ba sira, maibé Maromak fó hikas fali graça no benção ba sira. Ba sira nia rai, sira nia moris, no buat moris tomak iha rai ne’e.

                  Timor atu labele hetan desgraça hosi Maromak hanesan Sodoma no Gomora, tamba ne’e iha tempo Quaresma ne’e Timor oan hotu, liu-liu hahú hosi Na’i ulun sira hotu to’o ba povo kiik sira hotu atu fila laran ba Maromak, fiar iha Maromak, hakribi sala, confessa sala ba Maromak. Atu Timor labele hetan maldição ne’e. Wainhira tan, se laos loron ohin, wainhira tan se laos agora?

                  Tempo Quaresma fó biban ba ita atu fila fuan no laran tomak ba Maromak (cf. 2 Cor 6,1-2). Maromak fó ona graça ukun rasik an nian ba ita, tamba ita nia moris uluk moris ida ne’ebé nakonu ho domin, dame, paz, unidade, laran sadia, moris tuir Maromak Nia hakaran no ukun fuan sira. Hanesan uluk Israel sira moris iha fatin exiliado, Maromak liberta sira tamba sira nia moris hanesan ho ita nia moris uluk molok ukun rasik an. Keta halo ba aban bainrua ita Timor nia moris hanesan fali, Israel nia moris, wainhira Maromak lori sira ba tiha Jerusalém, sira haluha tiha Maromak hodi adora fali Maromak seluk (osan, poder, materialimos, individualismo, hedonismo nst…), no ikus mai hetan desgraça hosi Maromak hodi exilia fali sira ba Babilónia (cf. Ez 4,6). Se buat ne’e mosu ba Timor, Timor nia emar sira atu exilia ba los ne’ebé?

                  Atu Timor nia moris labele acontece tan buat ne’ebé hanesan acontece ba Israel. Buka ba atu ita Timor oan sira nia moris, buka atu adora Maromak mesak ida deit. Fiar ba Maromak mesak ida deit, moris tuir Maromak nia ukun fuan domin no Maromak nia hakarak. Atu desgraça hirak ne’e Maromak hadook tiha hosi ita, no haraik fali mai ita graça no benção.

                  Timor oan buka atu halo confissão no halo introspeção ba ita ida-idak nia an rasik. Hanesan Profeta Joel iha nia profecia terik katak hatete: “agora, diz o Senhor, voltai para mim com todo o vosso coração, com jejuns, lágrimas e gemidos; rasgai o coração e não as vestes; e voltai para o Senhor, vosso Deus; ele é benigno e compassivo, paciente e cheio de misericórdia, inclinado a perdoar o castigo” (Joel 12, 12-13).

                  Iha tempo loron hatnulu nia laran ne’e buka atu halakon tiha ita nia maromak falsu sira hanesan: “osan, poder, hedonismo, individualismo, egoísmo, opressão, corrupção nst…” (cf. 1 Reis 19,1-8). Buka atu hakribi buat sira ne’e hotu liu hosi halo “penitência, jejum, abstinência, caridade no oração” (cf. Mt 4,2). Fiar ba katak wainhira ita halo buat hirak ne’e, katak halo conversão no fiar iha Evangelho (cf. Mc 1,15), Maromak sei la hatun desgrça ba Timor oan sira, maibé sei hatun graça wain, moris-buras ba Timor, ita nia rai doben.

 

CONLUSÃO

                  Tempo Quaresma tempo diak, Santa Creda fó mai ita Timor oan sira hotu, dalan conversão, katak fila fuan no laran ba Maromak hodi fiar iha Nia Evangelho. Conversão katak muda moris, muda hosi moris ida ne’ebé moris hela iha nakukun sala nia laran no diabo nia ukun. Lori ba hetan moris iha naroman Cristo nian, moris iha Maromak Nia Graça no domin.

                  Jesus Cristo mak meta final ema sarani sira. Ho dalan conversão buka atu moris iha comunhão íntima ho Maromak no ho ita nia maluk sira ho domin Cristo nian. Saran ita nia moris tomak ba Maromak. Ho ida ne’e ita bele lori hikas no hari hikas fila fali ita nia rai doben Timor Leste, rai lulik, rai Santa Cruz no Santa Maria, moris-buras, klean iha fiar, dame no domin, tuir Maromak Nia hakaran. No buka atu hari civilizão Timor iha domin. Ida ne’e mak ita hotu hein no ita hotu buka.

 

REFERÊNCIA

BÍBLIA SAGRADA, Difusora Bíblica, Franciscanos Capuchinos, Lisboa/Fátima, 2000.

Compêndio Da Doutrina Social da Igreja/Pontifício Conselho “Justiça e Paz”, Tradução Conferência Nascional dos Bispos do Brasil (CNBB), – 7. Ed. – São Paulo : Paulinas, 2011.

Leave a Reply

Your email address will not be published. Required fields are marked *