shadow
Diocese de Dili > NOTÍCIAS > LETURA DIÁRIA > Terça-Feira, V Semana tempo Quaresma

Terça-Feira, V Semana tempo Quaresma

ANO B

 

Primeira Leitura                                                                                    Num. 21. 4-9

Lia  housi segundo Livro Números nian

Iha loron hirak neba, Israel oan sira sai housi foho Hor, tuir dalan ba Tasi Mean, hodi hadulas rai Edom. Iha dalan, povo lakon paciência hodi ko’alia hasouru Maromak no Moisés: “Tansá halo ami sai housi rai Egipto atu ami mate iha rai fuik maran ne’e? Ai-han no wé la iha; ami laran kabeik ona ho ai-han mihis ida ne’e”. Nune’e, Na’i haruka hasouru povo samea manas nebé tata ema; Israel nia emar barak mate. Povo ba ko’alia ho Moisés hodi dehan: “Ami sala tan ko’alia hasouru Na’i no mós hasouru ita. Husu ba Na’i atu hadook tiha samea sira housi ami”. Moisés harohan duni tanba povo.

Ne’e duni, Na’i lia tun ba Moisés: “Halo samea manas ida hodi tara ba ai-riin ida. Ema hotu nebé, samea tata tiha nia, hamatan ba, hetan moris”. Moisés halo samea ida ho riti hodi tara ba ai-riin. Ema nebé samea ruma tata karik, hateke samea riti ne’e, nia la mate.

Maromak Futar Lia.

 

Salmo Responsorial                                                                                                                                           Sal. 101(102). 2-3, 16-18, 19-21 (R. 2)

Refrão : Nia bei-oan sira sei hela metin ba nafatin!!! Repete-se

 Na’i, rona ha’u nia hamulak,

Ha’u lian sa’e to’o Itaboot.

Keta subar Ita futar oin,

Iha loron ha’u terus.

Sée tilun mai ha’u,

Iha loron nebé ha’u bolu Itaboot,

Sei hatan mai ha’u ho lalais. Refrão

 

Na’i, povo sira sei hamta’uk Ita futar naran,

Liurai tomak rai-klaran nian

Hamta’uk Itaboot nia glória.

Wainhira Na’i hari fali Sião

Hodi hatudu Nia glória,

Sei rona ema susar harohan;

Sei la hewai nia hamulak. Refrão

 

Sei hakerek buat hirak ne’e hotu

Ba derasaan be tuir mai atu,

Povo nebé sei mosu, sei hahi Na’i.

Hakruuk-An housi Nia uma iha leten áas,

Housi Lalehan Na’i hamatan mai Rai-klaran,

Atu rona ema dadur sira nia halerik,

Atu hasai sira be ema fó ba mate. Refrão

 

Aclamação                                                                                                                                                                                                                     Jo. 8. 12

Refrão : Glória ba Ita, Jesus Cristo, Aman Nia liafuan!!! Repete-se

                  Na’i dehan: Ha’u mundo nia roman; ema sé tuir Ha’u, la la’o iha nakukun,

                  Maibé, sei hetan roman moris nian. Refrão

 

Evangelho                                                                                                                                                                                                                Jo. 8. 21-30

+ Na’i Jesus Cristo nia Evangelho tuir São João Haktuir

Iha tempo neba, Jesus lia tun ba fariseu sira: “Ha’u atu ba ona! Imi sei buka Ha’u, imi sei mate ho imi salan. Imi la bele ba fatin nebé Ha’u atu ba”. Nune’e, judeu sira hateten: “Nia atu oho-an karik? Tan nia dehan: ‘Imi la bele ba fatin nebé ha’u atu ba!’” Maibé Jesus lia tun teni ba sira: “Imi rai ne’e nian; Ha’u Lalehan nian; imi rai ne’e nian; Ha’u la’os rai ne’e nian. Ha’u dehan ba imi: ‘Imi sei mate ho imi nia salan’. Tebes duni, imi la fiar karik katak, ‘Ha’u mak Ha’u’, imi sei mate ho imi nia salan”. Ne’e duni sira husu ba Nia: “Ó sé lós?” Jesus hatan ba sira, dehan: “Lolós duni buat hotu nebé Ha’u dehan dadaun ba imi. Ha’u iha buat barak atu dehan no tesi lia kona ba imi. Maibé, Ida be haruka Ha’u mai, Nia mak lós; Ha’u fó hatene ba mundo buat nebé Ha’u rona housi Nia”. Sira la hatene katak Nia ko’alia kona ba Aman. Nune’e Jesus lia tun ba sira: “Wainhira imi hari Mane Maksoyn, iha loron ne’e imi sei hatene katak: ‘Ha’u mak Ha’u’. Ha’u mesak la bele halo buat ida, maibé Ha’u dehan buat hirak ne’e ba imi nu’udar Aman hanourin Ha’u. Ida nebé haruka Ha’u mai, Nia hamutuk ho Ha’u; Nia la husik Ha’u mesak, tan Ha’u mesak, tan Ha’u halo tuir nafatin buat nebé fó ksolok ba Nia”. Wainhira Jesus hateten liafuan hirak ne’e, ema barak fiar Nia.

Lia maksoyn.

Leave a Reply

Your email address will not be published. Required fields are marked *