shadow
Diocese de Dili > NOTÍCIAS > HOMILIA DO BISPO > Maromak Mak Sei Uza Ita Atu Sai Instrumento Ida Hodi Servi Ita Nia Maluk Sira.

Maromak Mak Sei Uza Ita Atu Sai Instrumento Ida Hodi Servi Ita Nia Maluk Sira.

Deseja rahun diak Festa Iha solenidade São José nian ba ita hotu. Ohin ita hotu haksolok halibur hamutuk iha ne’e ho sentido ida, uluk nanain atu agradece ba Na’i Maromak ba graça oi-oin, particularmente graça rua ne’ebé hakarak sublinha; primeira atu agradece ba Maromak ba São José. E Devoção ba São José ba ita laos devoção foun, maibé Santa Creda continua convida ita atu buka continua, explora, haklean liu tan ita nia devoção ba Santo ida ne’e, ita sei descobre rikusoin pontual lubuk ida husi São José. Ida ne’e mak obriga mos Papa Pio IX iha 8 de Dezembro 1870 nia fo título foun ida ba São José “Mahein Uma creda Universal” tanba razão Uma Creda iha Século hirak liu ba ne’e hasoru momento sira hirak ne’ebé difícil hasoru pressenções oi-oin hasoru Uma Creda. Ida ne’e mosu Papa fiar metin katak São José desde uluk Maromak tau iha nia liman atu bali no tau matan ba Jesus wainhira sei iha rai. Ohin mos apelo ida ne’e ha’u bele dehan serve mos mai ita ohin atu hafoun nafatin particularmente mai ita Timor oan, mai ita sarani no Creda Timor ninian wainhira iha perigo laran atu la kole, la baruk buka tulun husi São José. Perigo sira ne’ebé mai husi laran nune’e mos husi liur ne’ebé mai atu estraga Uma Creda, perigo sira ne’ebé mai sobu dau-daun Creda Doméstica, perigo sira ne’ebé estraga Uma Creda no nação, labarik, adolecênte no foin sae sira. Tan ne’e mak razão mai ita atu agradece no continua harohan husu São José nian tulun.

 

Segundo; ita agradece ba Maromak tanba ita continua koko Na’i Maromak nia domin hanesan ema dehan wainhira Maromak sei bolu foin sae ida no sei iha foin sae ida laran luak saran an ba Maromak ida ne’e manifestação concreto ida kona ba Maromak nia domin iha ita nia le’et. Ohin sai concreto liu los mai ita ho foinsae nain lima(5) hatudu sira nia SIM maske iha buat barak ne’ebé sira koko no hasoru iha sira nia formação maibé sira pronto atu saran an ba Maromak tanba sira descobre ksolok no furak oinsa atu saran an tomak ba Maromak. Certamente molok mai too iha momento ida ne’e atu sia bele saran an iha tempo lubuk ida ne’ebé sira liu husi tulun oi-oin sira nian; Inan-Aman, Formador sira, Doscente no Professor sira, Diretor espiritual, husi ema hirak nia tulun mak ohin lori sira mai too iha momento ida ne’e.

 

Ita hotu hatene katak São José hanesan ohin ita rona iha Evangelho; Ema ida ne’ebé sukat nia liafuan, Ema nonok la koalia barak. Amo Papa Francisco iha devoção boot ida ba São José ne’ebé dehan ‘Sleeping Joseph’ (José ne’ebé Toba). Haré kona ba ida ne’e ita dehan katak tanba sa mak São José ema ida ne’ebé la koalia barak maibé nia iha devoto, nia atrai ema barak ne’ebé admira hodi buka nia segrdo ne’e iha los ne’ebé? São José iha nia maun-alin nazareno sira nia le’et ema conhece José hanesan ema serviço nain ida ’simplesmente um pobre trabalhador. Maibé iha Maromak nia futar matan José ne’e homem justo. Ida ne’e fo esplicação mai ita tanba sa mak Na’i Maromak hili nia atu servi ka atu sai instrumento Na’i Maromak nian. Karik ita bele husu ‘em que sentido era justo’ Ninia ema los ne’e ninia sentido saida? karik ninia hakarak atu haketak an husi Maria wainhira descobre katak ita nain Feto kous ona, maibé José wainhira momento hirak ne’e reflecte kona ba buat ne’ebé mosu ba nia. Na’i Maromak revela ba José projecto no missão ida. hanesan ita rona; José David nia oan keta tauk simu Maria ba ó nia káben basá nia kous hodi Espírito Santo nia kbiit tan ne’e kosok oan ne’e hanaran duni Jesus, Nia mak sei hasai povo husi sala, nune’e Maria nia Oan mos iha direito tomak hola parte iha família David ninian hanesan Paulo ohin dehan iha Segunda Leitura.

 

São José ema justo tanba nia decide no tau nia an iha fatin ne’ebé los no la sai obstáculo ba Maromak nia plano maske nia la compreende. Ne’e laos buat foun. Se ita ohin tuir ituan Primeira Leitura ita rona Liurai David, David iha tempo mos iha nia história, nia mos iha ambição hakarak harí templo ida ba Maromak, hakarak ida ne’e nia projecto ida pessoal hodi halo buat ruma hodi hanin katak nia mos bele tanba nia an haré katak nia ida ne’ebé ho kbiit Maromak ninian hela iha uma ida ne’ebé halo ho fatuk no osan mean, maibé Na’i Maromak nia templo ida deit tentan Na’i Maromak nia naran iha deit tembok oan ida. ida ne’e mak halo David la hakmatek hakarak atu harí templo ida ba Na’i Maromak. Maibé molok atu harí nia hakbesik ba Profeta Natán atu husu se ida ne’e bele kalae, tanba profeta Natán iha autoridade moral atu bele dehan ba ema hodi bele colabora hodi realiza plano ida ne’e. Maibé Natán rona tiha David nia plano ida ne’ebé nakonu ho ambição pessoal ida ne’e; Natán nonok no harohan e loron tuir mai nia dehan ba David ‘David maske o hakarak maibé o nia liman ne’e mean/ran ne’ebé liu husi história ema barak mate, ne’e duni o sei la hari uma ida mai ha’u, maibé husi o nia oan sira sei mai oan ida ne’ebé diak, oan ida ne’ebé dame nain nia mak sei hari uma ida ne’e. David rona liafuan Profeta ninian, nia mos preocupa. Profeta Natán haré katak buat ida ne’e aumenta David nia terus, nia reino no nia futuro, ikus mai Profeta Natán aumenta dehan ‘Laos ó mak atu harí uma ba Maromak maibé Maromak mak sei harí uma ba ó, uma ida ne’ebé metin, uma ida ne’ebé la nakdoko no uma ida ne’ebé rohan laek’. Uma ida ne’e laos hanesan uma ida ne’ebé ita entende hari ho fatuk, ai no kalen, maibé uma ida ne’ebé refere ba linhagem, prosperiadade, assendência, geração família David ninian. Husi ó nia família no geração mak sei mai oan ida. profeta hodi Mromak nia naran garante katak husi David nia leet sei iha ida mak sei harí. David maske Maromak fihir maibé ikus mai wainhira iha ona poder dalabarak nia haluha Maromak, moris sabraut, buat ida ne’ebé garante nafatin nia iha Maromak nia oin mak nia hatene rona, nia hatene reconhece Maromak nia precença iha Profeta sira, hatene reconhece ninia an hanesan instrumento ida. ne’e hotu tanba David nia fiar metin, nia fiar la nakdoko hanesan Paulo dehan iha Segunda Leitura. Hanesan David, São José mos hanourin ita atu fo tempo wainhira iha momento hirak ne’ebé ita lahatene atu ba iha ne’ebé, iha momento hirak ne’ebé ita iha dilema nia laran ita halai ba ne’ebé! Ita halai ba buka tulun husi Na’i Maromak? Ka ita halai ba matan dook?

 

Maluk doben sira festa São José nian ne’e comvida ita atu lao iha dalan ne’ebé los, dalan justo, comvida ita atu hatene tau ita nia an, ita nia capacidade no buka atu colabora ho Maromak atu labele sai obstáculo ba Maromak nia plano iha ita nia moris basá iha Maromak deit mak ita bele hetan buat ida ne’ebé los. São Paulo iha nia história salvação nian buat hotu ne’ebé Maromak halo ona mai ita laiha tan razão ba ita atu dúvida kona ba Maromak ne’ebé atu fiar, atu iha fiar ida ne’ebé la mamuk e ida ne’e mak mensagem dahuluk ne’ebé São José hakarak tatoli mai ita hotu ne’ebé ohin halibur hamutuk iha ne’e atu celebra no agradece ba Na’i Maromak tanba São José continua fanun ita mos maske ita nia limitações ita bele hakasan mos atu lao iha dalan ne’ebé los.

 

Ohin ita hotu mai iha ne’e hodi haksolok hamutuk ho Frater nain 5 nudar loron ida ne’ebé especial tanba momento ida ksolok nian ida tanba ohin marca tan passo ida, história ida iha imi nain 5 nia moris no iha família nia moris. Marca história foun ida ne’e ho liafuan ne’ebé imi hili nudar imi nia motto; HA’U MAI ATU SERVI. Ida ne’e mak identidade natureza Diácono ida nian, ida ne’e mak Espiritualidade Diácono ida nian basá liu husi consagração Diácono ida ukun ba Cristo ou Creda ninian ne’ebé tamba domin halo an sai kiik nune’e servi ema hotu, atu servi hodi Cristo halo an sai kiik atu nune’e bele hakbesik ba Maromak, husi ne’e mak Diácono ida sei sai diaconia iha liturgia iha Maromak nia futar laifuan iha hahalok diak.  Cristo deit mak knaar nia nain rex per excelence atu servi, laiha modelo ne’ebé as liu mai ita atu haré ne’e mak Cristo ne’e rasik. Tan ne’e exemplo ida ne’e mak hanoin imi nain lima atu fila fali ba haré uitoan kona ba São José, nain Feto ho Aman Maromak ita bele dehan katak Cinta segitiga. São José, Nain Feto ho Maromak, São José ema ne’ebé nonok, ema hakmatek tamba nia hatene no rona buat ne’ebé los iha mos laran luak, atu obdese, nia hatene obedece tan ne’e nia saran an tiha iha Maromak nia futar oin, São José ema ida nia conhece domin rohan laek hosi moris nain, katak husik Maromak tama iha nia vida fo an ba Maromak nia moris rohan laek iha nia vida tamba nia sai ema justo tamba nia fó fatin ba Maromak iha nia moris. Nia la sai obstâculo  ba Maromak nia projeto nia confia nia an ba Maromak. Husik Maromak hakerek nia história. Ha’u mai atu servi, servi nia povo ida ne’ebé as liu hotu, wainhira descobre buat hotu ne’e sei foun  no sai forte wainhira domin mak sai fundamento. Wainhira ita hadomi lolos ha’u sei goja nafatin rahun diak. Ha’u bele servisu hamutuk ho se deit katuas ka ferik, foin  sa’e no labarik  iha uma Creda buka ida ne’ebé diak iha uma Creda nia ksolok ba Maromak nia domin, ha’u mai duni atu servi laos buka ema nia servi, buka ha’u nia ksolok. Tan ne’e iha mak Matenek nain ida dehan Charick Jibran iha nia liafuan dehan wainhira quando ó hadomi, ema barak dehan Maromak iha ha’u nia fuan, diak liu ne’e dehan ha’u mak iha Maromak nia fuan, se Maromak mak iha ó nia fuan, ó obriga Maromak atu tuir fali ó, ita ema nia hanoin sira ne’e dala barak as liu. Maibé se karik ha’u mak tama iha Maromak nia fuan Maromak mak sei hakerek, Maromak mak sei uza ita atu sai instrumento ida atu servi ita nia maluk sira. 

Leave a Reply

Your email address will not be published. Required fields are marked *