shadow
Diocese de Dili > NOTÍCIAS > HOMILIA DO BISPO > ITA LA SOI BA KNAR IDA NEE, MAIBE MAROMAK FIHIR ITA, HALULIK TIHA ONA ITA

ITA LA SOI BA KNAR IDA NEE, MAIBE MAROMAK FIHIR ITA, HALULIK TIHA ONA ITA

Hau lori sarani tomak Diocese Dili nia naran hakarak fo ita nia Parabes ba Amo sira hotu ba loron ida nee loron Amolulik sira nian no agradece ba servisu sira hotu nebe amo sira halo hodi serbi Maromak nia povo. Tan ne’e ohin sarani sira hotu ladun mai maibe iha nee Seminarista no madre sira iha nee ita agradece tanba sira em nome sarani sira nia fatin hodi mai iha atu reza ba amululik sira. Santa Teresa do Menino Jesus nia dehan hanesan ne’e; Mai ita reza ba amo lulik sira necessário tenke reza duni ba sira atu bele hadomi lolos Jesus, nunee sira mos bele quida Jesus hanesan Nain Feto Maria tau matan ba Kosok Oan iha presépio.

Loron ida ne’e laos atu harohan deit, maibe ita harohan hodi agradece; uluk nanain agradece ba dom sacerdócio nebe ami amolulik sira simu hanesan antífona iha missa nee nian dehan: Jesus Cristo halo ita sai reino ida Nailulik ninian, mas que los duni hanesan ita sempre dehan; Ita la soi ba knar ida nee, maibe Maromak fihir tiha ona ita, halulik ita atu ita mos bele halulik, ou ita mos tenke halulik Maromak nia povo e ba dom fidelidade ninian. Maromak laos bolu deit maibe Nia acompanha nafatin ita ho Ninia graça particularmente concretiza ita nia hakarak iha celebração ida ohin ita halibur hamutuk ne’e, iha ne’ebé tinan ida dala ida hetan oportunidade hodi celebra loron amululik sira nian. Momento ida nee mak atu apressia, atu admira buat diak oi-oin be ita simu, nune’e mos buat lobuk ida ne’ebé, hanesan desafio hotu ne’ebé ita hetan maibe momento ida atu renova ita nia fidelidade ba Maromak. E ita agradece mos ba dom comunhão nian ita hotu serviço no hela iha Diocese ida ne’e halibur hamutuk no hasae ita nia sacrifício hamutuk ba Maromak. Tan ne’e iha tinan ida ne’e nia laran ita nafatin husu atu amululik hotu nebe hela iha Diocese ida ne’e nia laran laos deit amu Diocesano sira maibé amu religioso sira mos, atu fisicamente laos epiritual no virtual deit. Maibé ita mos fisicamente halibur hamutuk hodi halo ita nia oração exepto sira nebe moras liu-liu mak amo João Fuelgeiras nebe ora-oras tan atu ba halo nia tratamento iha Malásya nebe precisa ita hotu ninia oração atu reza ba nia iha loron ida nee. Ida nee mak comunhão ida nebé ita dehan katak comunhão ida ne’ebé visíbel, trangível, hau nia comvicção wainhira ita hamutuk ita harohan ba malu no wainhira ita hamutuk ..ita nia apostulado mos bele sai fácil, ita nia apostulado bele fo fuan tan ita nia hamutuk tulun mos ita atu hatene mos lalaok orientaçã ruma nebe mai hosi Diocese. Dala barak ema dehan katak Diocese Dili ne’e nia Amululik barak, maibe tanba dala barak ita nia força nee ita la tau hamutuk ita labele hatene saida mak pastoral iha Diocese Dili nee nian iha. Tan ne’e ita nia comunhão liu-liu iha loron ida nee inportante teb-tebes ba ita atu bele reza atu nunee ita nia comunhão ne’e bele metin liutan.

Maluk doben sira Maromak la kole no la baruk ho ita atu metin nafatin, atu fiel nafatin ba Nia no ba Nia Creda. Saida mak Nia hein husi ita, Ninia presença hanesan cosntante moris iha ita sarani particularmente iha amululik sira nia vida. Durante horas 24 ita hamutuk iha Dare horikalan hau tun fila fali hanesan los iha Tabor ne’ebé amu pregador lori ita atu descobre ita nia an, beleza, ita nia vocação furak. E nia dehan se furak liutan se ita koko atu moris nu’udar Maromak nia oan lolos, moris ne’ebé santo. Ida ne’e fo hanoin ba ita los duni ita halo buat barak e keta haluha katak buat hotu nebe ita halo nee nia fim ida deit; lori ita atu bele tama iha Na’i Maromak nia fuan atu moris santo. Se ita halo buat barak maibé ikus mai buat ne’e hadok ita husi Maromak, ne’e karik buat ruma nebé ita precisa husu ba ita nia an.

Santidade ne’e laos instan. Ohin loron nee ita koalia ou hakarak deit baut nebé instan buat hotu hakarak lalais. Maibe ita exige ita nia esforço ida contínua. Wainhira hau hakas an atu lao ba oin ne’e dehan katak hau hakiduk. Se ita hakarak lao ba oin no ba kotuk, hanesan liafuan ne’ebé dehan nei-neik maibé bei-beik.

atu garante progresso gradual ida ne’e mak ita nia formação hanorin ita fiel ba nia projeto da vida, ita nia projeto da santidade.

Liturgia ohin nee nian oferece estrategia ida necessita iha óculo nebe foun ka precisa paradigma foun ida. Leitura sira ohin ita rona katak particularmente husi Primeiro Leitura profeta Isaías descreve ituan contexto povo nia deseperado nebe hein hela notícia foun ida no mosu duni mai profeta ida la lori osan, la lori poder, maibé nia mai ho liafuan esperança ninian ba sira nebe fuan desesperado, fuan sira nebe kanek. Profeta hanesan portador deit kona ba promessa ida nebe seguro tamba promessa ida laos liu hosi ema, maibé mai hosi Na’i Maromak rasik.  Ida ne’e novidade ne’ebé tinan liu ba haklaken kona ba tinan Laran Luak nian atu ema ida-idak fila fali ba nia fatin, momento ida ema sai husi nia miséria, recopera nia própria dignidade. Profeta haré ba situação uluk ninian ho maneira diferente, hatene atu descobre, hatene atu hatudu naroman foun ida, naroman nebé los, profeta nia liafuan atu encoraja laos atu desanima, ida ne’e mak profeta ida nia missão. Profeta sira hare ho matan ida fiar nian nebe metin ba Maromak katak Maromak sei liberta nia povo nebe terus no desesperado.

Maluk doben sira iha mundo nebe ohin loron ita moris obriga mos ita atu iha matan nebe foun, matan ida fiar nian, matan ida amululik ninian, ita hotu fila fali ba loron ordenacão nian ita mos koko tiha ona Maromak nebe fihir ita ida-idak, Maromak nebe hare ita ida-idak ho matan domin ninian, Maromak nia bolu ita ida idak, Maromak mak penetra ita nia fuan nudar ita ema ba Nia, hare ita nia fuan ho laran obriga ita atu hela nafatin iha domin ida nee nia laran. Ida nee mak fo sentido ba salvação ohin ninian.

Experiência domin Maromak ninia nebe ita koko ona obriga ita atu hafoun nafatin atu tama klean liu tan atu ita mos bele hetan capacidade hodi reflecte Olhar Amorosa de Deus ba ita nia maluk sira, ba ita nia destinitário sira. Ida nee laos atu exagera maibe atu dehan katak ita ALTER CRISTUS. Loron ida nee sadik duni ita hare buat nebe ideal. Ohin ita nafatin fiel tanba ita sente duni Jesus nia matan fihir hau, Nia domin mai kaer hau liman, Nia domin mak estimula nafatin hau atu buka, hanoin, fo sasin kona ba Cristo. Ida nee mak dalan ba ita amululik sira nia santidade.

Maluk doben sira, oinsa mak hau bele reflete duni Maromak nia domin iha hau nia matan, iha hau nia hare no iha hau nia moris ba ema seluk se hau rasik sidauk experiência Maromak nia domin. Livro Apocalipse iha segunda Leitura hatudu katak Jesus Nia mak Liurai liurai sira nia“Príncipe dos reis da terra”  basá convite ida atu avalia história uluk ninian ho matan foun ida. Celebração ohin loron nian convida ita amululik sira mos precisa hamatan foun, matan fiar nian, uluk nanain atu iha capacidade, atu hare ba hau nia-an oinsa hamoris hau sacerdócio. Masque desafio no dificuldade boot nebe hau enfrenta hau koko nafatin atu moris nudar Amululik lolos ida, fiel nafatin ba hau nia promessa iha loron ordenacão nian. Tan nee precisa duni matan fiar ninian mak ita ba hetan fali sentido hirak nee; matan ida unido, sincero no corazoso atu fo testamunho kona ba ita nia Sacerdócio. Ho matan fiar nian mak hau bele servisu hamutuk ho amululik sira seluk, ho matan haraikan nian mak hau hatene colabora, hau bele comfia maluk amululik sira seluk, reconhece mos ema seluk nia diak, ema seluk nia força nunee bele ajuda atu servisu hamutuk hodi promove nafatin harmonia iha Uma Creda laran.

Amululik ida oinsa nian mak sarani sira hein; amululik ida moris duni iha mundo, maibe la buka deit ksolok ba ninia an, ida nebe hakbesik ba ema hotu ferik e katuas, matenek e beik, ba partido hotu-hotu, família hotu, maibe la pertence ba ema ida, la pertence ba grupo ida no la pertence ba família ida. ida nebe partilha ema hotu nia terus, penetra ema hotu nia segredo atu nia bele kura ema ninia kanek, ida nebe hatene harohan ba nia povo, ida nebe hatene harohan ba Maromak atu nia povo bele hetan naftin perdão, atu nia povo bele hetan naftin esperança. Hau hanoin ida nee mak razão ba ita hotu nia halibur malu ba loron ida nee no comvida ema hotu be halibur hamutuk iha nee hodi hasae ita nia sacrifício mai atan amululik sira, tan nee mak sinal domin ita boot sira nian mai ami amululik sira e mos bele halibur hamutuk ho ami hodi reza ba ami

Leave a Reply

Your email address will not be published. Required fields are marked *