shadow
Diocese de Dili > NOTÍCIAS > Notícias > MENSAGEM HOUSI BISPO DE DILI D. VIRGILIO DO CARMO DA SILVA, SDB. KONA BA ELEIÇÃO ANTECIPADA

MENSAGEM HOUSI BISPO DE DILI D. VIRGILIO DO CARMO DA SILVA, SDB. KONA BA ELEIÇÃO ANTECIPADA

DCDD 19 de Março de 2018, Uluk nanain ita haré katak povo nafatin hakmatek. Ne’e duni ita fó parabéns ba ita nia povo. Quase tinan ida ho resin ona, mak ita moris iha situação ne’ebé ita dehan katak incerteza nia laran, maibé povo continua hakmatek to’o agora. Ne’e duni, ita fo parabéns, no aprecia katak  povo compreende ona democracia, povo compreende dau-daun ona buat ne’ebé dehan: iha maturidade ida kona ba valor democracia ninian.

Ita atu hakat ba eleição antecipada nebe monu iha loron 12 fulan Maio 2018. Molok atu ba iha eleição, Partido Político no coligação sira sei tama ba iha campanha eleitoral hodi hakbesik-an ba povo ho respeito atu explica didiak no fó hatene sira nia programa no medida saida mak sira sei foti atu hadia qualidade educação no saúde, dalan ida nebe mak sira sei tuir atu hadia povo nia moris, povo nia economia, oinsá los maka sira hakarak ukun povo, oinsá sira nia hanoin kona ba povo ninia participação hodi ukun nação Timor-Leste ida ne’e.

Ita Timor ne’e, maioria Católico. Ne’e duni, molok semana rua antes de campanha ita tama hela ba Páscoa, tempo ida nebe ita hanoin kona ba Jesus nia terus, mate no nia moris hias. Ida ne’e fo hanoin ba ita  sarani hotu katak, durante tempo ida ne’e nia laran ita la’o hamutuk ho Jesus iha ninia Cruz, dalan ida diak mos ba ita sarani hodi hanoin kona ba Jesus nia missão iha ita nia leet. Jesus hakarak kuda nafatin iha ita nia leet, buat nebe nakonu ho paz no buat nebe nakonu ho domin.

Sarani sira, los duni katak, ita atu hakat ba eleição, tan ne’e iha quaresma no semana santa ba to’o Pascoa ita ida-idak buka atu hare kona ba ita nia an, labele deit kona ba ita nia interesse, ita nia diak, maibe, ita hare ba ema hotu-hotu nia diak. Páscoa ne’e hanorin ita atu hatene mate ba ita nia an, mate ba ita nia hahalok nebe la diak, mate ba ita nia gosto sira, atu nune’e mak bele haburas paz. Tan ne’e buat furak ida mai ita mak nee: mai ita moris didiak quaresma, mai ita celebra didiak Semana Santa, atu nune’e iha Páscoa ita moris hias duni ho Cristo ba moris foun.

Ita tama ba iha campanha, tama ba iha Páscoa ninian ne’e, tama ho Espírito foun, Espírito Jesus moris hias ninian, Espírito badinas no Espírito ksolok ninian. Tan ne’e, ohin hau dehan, iha Páscoa ne’e ita hanoin kona ba unidade, harmonia no dame nebe hahú husi ita nia família, ita nia comunidade no ita nia nação. Buat nebe sobu ita nia família mak saida? Wainhira ita hanoin deit kona ba ita nia an, ita nia arogância no hanoin deit lakohi hakruk. Jesus hanorin chave ba ita nia sucesso mak buka atu aprende haraik an ba malu, rona malu, buka dalan atu promove no hametin nafatin ba malu.

Ne’e duni, haré ba ida ne’e, ita fiar no ita continua apela ba povo atu liu-liu buka atu bele compreende, buka atu conhece partido sira ne’ebé atu tun dau-daun ba halo campanha. No atu hatene didiak sira nia compromisso político, programa cada partido ninian, mak ita bele hili buat ne’ebe los. Hau convida atu ema hotu hakaas-an atu bele participa iha festa Democracia ne’e, tamba nação ne’e depende teb-tebes ba ita hotu nia votu. Tan ne’e, destino nação nian depende mai ita hotu. Tur no rona didiak atu nune’e, ita bele ba fo ita ninia voto. Ita fiar katak liu hosi ida ne’e, bele ajuda liu-liu ba iha contribuição ba paz no estabilidade iha ita nia rai laran nian.

Dala  ida tan ita fó parabéns ba Timor ninia maturidade no ita encoraja nafatin povo Timor tomak atu promove nafatin paz no tau ba kotuk buat ne’ebé violência. Promove nafatin paz, liu-liu iha tempo Páscoa nebe mak ita atu tama dau-daun ne’e, momento nebe diak ida mos ba sarani sira atu cultiva diak liutan Espírito paz nian. (Alin/Ceko/Rela)

Leave a Reply

Your email address will not be published. Required fields are marked *