shadow

Domingo Ramos

ANO B

 

Primeira Leitura                                                                                        Is 50. 4-7

Lia housi livro profeta isaías nian

Na’i haraik tulun, atu ha’u ko’alia nu’udar escolante ida, hodi hatene tulun ho lia fuan ida, ema sira be iha susar laran. Dadersan-dadersan, Nia loke Ha’u tilun atu Ha’u rona, hanesan escolante sira rona. Na’i Maromak loke Ha’u nia tilun, Ha’u la sees, Ha’u la hakiduk. Ha’u, see Ha’u kotuk ba ema sira be baku Ha’u; Ha’u see Ha’u hasan ba ema sira be fokit Ha’u hasanrahun; Ha’u la subar Ha’u oin ba lia aat no kaben tasak. Na’i Maromak mai tulun Ha’u, tan ne’e Ha’u la moe. Ha’u halo Ha’u oin to’os hanesan fatuk, Ha’u hatene katak Ha’u sei la hein leet.

Maromak Futar Lia.       

 

Salmo Responsorial                                                                                                                                               Sal 21 (22), 8-9, 17-18ª, 19-20, 23-24

Refrão : Ha’u nia Maromak, Ha’u nia Maromak tan sá hewai ha’u? Repete-se

  • Sira bé har’e ha’u, hamoe ha’u,

          Sira biu ibun, hodi doko ulun:

          “Nia fiar iha nia Na’i, Na’i nee sadia Nia ba!

          Sadia Nia, tan hakarak Nia di’ak!”. Refrão

 

  • Asu lubun boot haleu ha’u,

          Ema aat lubun boot hadulas ha’u.

          Sira hedi borus ha’u liman no ain,

          Ha’u bele sura ha’u ruin tomak. Refrão

 

  • Sira lees fahe Ha’u unuk ba sira,

          Sira har’e Ha’u tais atu monu ba sé.

          Maibé, Na’i, Ita keta hadook-An housi Ha’u;

          Ho kbiit, mai sadia Ha’u! Refrão

 

  • Ita naran Ha’u sei haklaken ba maun-alin sira,

           Ha’u sei hahii Ita iha ema sira leet.

           Imi be ta’uk Na’i, hahí Nia ba,

           Jacob oan sira houtu, imi fo glória ba Nia,

           Israel oan sira houtu, hanai Nia ba. Refrão

 

Segunda  Leitura                                                                                                                                                                                                    Flp. 2, 6-11

Lia housi São Paulo nia surat ba sarani sira iha Filipo

Maun-alin sira : Jesus Cristo maski Maromak los, Nia la hatudu Nia ilas nu’udar Maromak, maibé, Nia haraik-An nu’udar atan, hodi mosu mai nu’udar mane los. Nu’udar mane los, Nia haraik-An liu atan, wainhira Nia halo tuir deit too mate, hodi mate iha Cruz! Tamba nee, Maromak hahí Nia, hodi haraik naran boot ida ba Nia, naran ida boot liu naran hotu hotu iha rai-klaran. Tan ne’e, ema hotu-hotu rona tiha Jesus nia naran, sei tuku tur hanai Nia iha lalehan, ka iha rai-klaran, ka iha inferno laran! Nunee mak povo houtu sei hatene katak Jesus Cristo mak Na’i, hodi fo glória ba Aman Maromak.

Maromak Futar Lia.

 

Aclamação                                                                                                                                                                                                                  Flp. 2, 8-9

Refrão : Liurai, glória rohan laek, ami hahí Ita!!! Repete-se

Cristo halo tuir de’it to’o mate, mate iha cruz

Tan ne’e, Maromak hahí Nia,

Hodi fó naran ida ba Nia,

Boot liu naran houtu. Refrão

 

Evangelho                                                                                                                                                                                                               MC 11, 1-10

Nai Jesus Cristo nia Evangelho nudar São Marcos haktuir

Iha tempo nebá, besik daudaun ona ba Jerusalém , besik rai Betfagé ho Betânia, iha foho ai oliveiras laran, Jesus haruka nia escolante na’in rua ba, hodi dehan:”imi ba iha knua nebá, hela iha imi oin; imi tama ba, imi sei haré kedas kuda burro oan ida, kesi hela, ema ida seidauk sae. Imi kore tiha nia, lori mai. Ema ruma husu karik imi, tan sá imi halo nee, imi dehan: Na’i hakarak nia, maibé, la kleur sei haruka lori fali mai iha ne’e. Sira ba, sira hetan kuda burro oan ida kesi hela iha odamatan ida, iha liur, besik luron; sira kore tiha nia. Ema balun be hela iha nebá, husu ba sira: tan s’a, imi kore kuda burro oan?” Sira hatan tuir Jesus hanourin, ema husik sira la’o. Sira lori kuda burro oan mai Jesus, tau tiha sira hena iha leten, Jesus sa’e ba nia. Ema barak nahe sira hena iha dalan, sira seluk nahe aisanak matak nebe sira tesi iha to’os. Sira be lao iha oin ho sira be lao iha kotuk, haklalak, dehan:”Hossana! Di’ak tebes ida be mai hodi Na’I nia naran! Di’ak tebes Aman David nia Reino nebé, to’o daudaun mai. Hossana áas ba!”.

Lia Maksoyn.

Leave a Reply

Your email address will not be published. Required fields are marked *