shadow
Diocese de Dili > NOTÍCIAS > Notícias > Sorumutu ho Papa Francisco : Discernimento vocacional no formação permanente

Sorumutu ho Papa Francisco : Discernimento vocacional no formação permanente

Texto husi : Fr. WALDIMIRO AFONSO VIANA

 

Papa Francisco perante seminarista no sacerdote sira nebé estuda iha Roma.

 

Roma – Mai husi nação oi-oin seminarista, diácono no nailulik hamutuk rihun rua resin, diocesano no religioso husi instituição religiosa atus ida lima nulu nebé presente iha Roma participa iha sorumutu ida ho Sua Santidade Papa Francisco, Sexta-feira (16/03) foin lalais ne’e, iha Aula Paulo VI, Roma, Vaticano.

Sorumutu ne’e organiza husi Congregação para o Clero: dicastéro ida iha Cúria Romana nian nebé tulun no serviço hamutuk ho Papa iha kna’ar espiritual no material Uma Kreda Católica nian. Atualmente dicastéro ida ne’e iha departamento tolu: departamento Clero, Catequético no Administrativo. Departamento clero hala’o kna’ar atu recolhe, sugere no promove iniciativa em favor ba santidade no ba atualização intelectual no pastoral nailulik diocesano no diácono sira nian, nudar parte ida husi formação permanente. Departamento Catequético ninia kna’ar mak tau matan ba formação religiosa fiar-nain sira hotu nian husi idade no condição hotu-hotu. No departamento Administrativo ninia competência mak conserva no administra bens eclesiásticos.      

Iha sorumutu ida ne’e, Sua Eminência Cardeal Beniamino Stella, prefeito Congregação para o Clero fo biban ba participante sira atu halo pergunta diretamente ba Sua Santidade Papa Francisco relaciona ho conteúdo Ratio Fundamentalis Institusionis Sacerdotalis «O Dom da Vocação Presbiteral» nebé dicastéro ida ne’e publica tiha ona iha loron 8 fulan dezembro tinan 2016 liu ba.

Ho ksolok wain tebes, Papa Francisco disponibiliza-an hodi hatan ba pergunta lima nebé hato’o husi representante seminarista nain rua, diácono ida no nailulik nain rua.

Seminarista francese ida nebé representa continente Europa husu konaba oinsa mak hala’o ministério presbiteral ho haraik-an nudar discípulo no missionário. Santo Padre hatan katak sai nailulik significa sai ema nebé sempre prontu atu la’o (missionário), prontu atu rona (discípulo) no haraik-an atu bele la’o hamutuk ho ema seluk.

Hafoin, seminarista sudanese ida nebé representa continente África husu konaba oinsa mak halo discernimento. Papa Francisco haktuir katak buat fundamental iha discernimento mak hatene oinsa la’o ba oin, haré buat sá mak la’o lós ona no buat sá mak seidauk la’o lós. Nia explica liu tan katak iha condição rua atu halo discernimento didiak: halo oração iha Maromak futar oin no confronta ho maluk sira nebé iha capacidade atu guia no orienta. Basá wainhira laiha karik discernimento – Papa Francisco dehan – moris nailulik sei sai maran no maten. Santo Padre husu atu nailulik sira habelun an ho Espírito Santo. Halo Espírito Santo sai nudar belun iha dalan vocação.    

Iha pergunta datoluk, nailulik mexicano ida representa América latina husu konaba oinsa salvaguarda formação integral iha moris nailulik nian. Hatan ba questão ida ne’e, Papa Francisco sublinha iha formação humana. Maske sai tiha nailulik, ita ema humano nafatin. Nia hatete katak precisa sai ema normal, humano, haksolok ho ema seluk iha liafuan no hahalok, hakmatek  atu rona ema moras nia halerik, consola nia ho domin. Precisa sai aman nebé fo moris ba ema seluk. Sai nailulik katak sai nudar aman, laos sai funcionário sagrado ou empregado Maromak nian.

Ba religioso sira, ita bele hatene sira nia espiritualidade liu husi fundador nia moris no hanorin. Maibé oinsa ho padre diocesano? Ne’e mak pergunta daha’at nebé hato’o husi diácono ida nudar representante husi Estados Unidos América. Hau iha liafuan ida deit – tenik Papa Francisco – espiritualidade padre diocesano nian mak «diocesanità – língua italiana», diocesanidade. Significa saida? Diocesanidade significa báli didiak relação ho ninia Bispo rasik nudar aman, biar difícil karik ba, hakiak fraternidade ho maun-alin nailulik sira no hadomi sarani sira iha paróquia nudar imi ninia oan. Wainhira imi serbí karik ho hahalok hirak ne’e imi sei sai santo, tenik Papa Francisco.

Mai husi continente Ásia, nailulik filipino ida mak representa. Nia husu konaba formação permanente. Hatan ba pergunta ida ne’e, Papa Francisco recomenda atu ida-idak cuidado didiak ninia formação: humana, pastoral, espiritual no comunitária. Nia hatutan katak formação permanente mosu tamba ita rasik consciênte ho ita ninia fraqueza no conhece ita ninia limitação sira. Atu nune’e maske ita hatama an iha cultura contemporânea, ita hatene ona oinsa moris iha comunicação virtual, oinsa usa didiak telemóvel, preparado atu hasoru tentação castidade nian. Santo Padre mós husu atu hasai tiha ambição ba osan, ba poder no ba posição confortável.

Ikus liu, Papa Francisco hakotu sorumutu ida ne’e hodi haraik benção ba participante sira no nia husu atu labele haluha reza nafatin ba nia.**(Husi fonte oi-oin)

Leave a Reply

Your email address will not be published. Required fields are marked *