shadow
Diocese de Dili > NOTÍCIAS > LETURA DIÁRIA > Terça-Feira da Semana Santa

Terça-Feira da Semana Santa

ANO B

 

Primeira Leitura                                                                                       Is. 49. 1-6

Lia  housi livro Isaías nian

Rai hotu tasi balu ba, imi rona ha’u ba! Povo sira housi dook, imi sée tilun didi’ak! Na’i bolu ha’u molok ha’u moris; Nia temi ha’u nia naran wainhira ha’u sei iha ha’u inan nia knotak. Nia halo ha’u nia nanal sai nu’udar surik kro’at; Nia hamahan ha’u ho nia futar liman. Nia halo ha’u sai rama isin meik; nia tau ha’u iha rama fatin. Nia dehan mai ha’u: “Israel, ó Ha’u nia atan; housi ó Ha’u sei hatudu Ha’u nia biit”. Ha’u dehan: “Ha’u kole leet de’it, ha’u biit la folin biit ida!” Maibe ha’u riku-soi hamutuk iha Na’i; ha’u kolen iha Maromak futar liman. Oras ne’e, Na’i hateten mai ha’u, Nia be halo ha’u iha ha’u inan nia knotak atu halo ha’u sai nia atan, hodi halibur Jacob; hodi halibur Israel besik ba Nia. Tan ha’u hetan kmanek iha Na’i nia oin; Maromak mak ha’u nia biit. Ne’e duni, Na’i dehan mai ha’u: “la to’o sai de’it Ha’u atan, atu hari Jacob nia knua, atu halibur Israel Oan sira be sei moris; Ha’u sei halo ó hanesan naroman ba nação hot-hotu atu Ha’u nia maksoin to’o ba rai hot-hotu”.

Maromak Futar Lia.

 

Salmo Responsorial                                                                                                                                 Sal. 70(71). 1-2, 3-4a, 5-6b, 15, 17 (cf. 15ab)

Refrão : Ha’u ibun haklaken Itaboot Nia salvação!!! Repete-se

 

Na’I, ba Ita, ha’u neon metin;

Keta husik ha’u moe ba nafatin!

Ita be di’ak, sadi’a ha’u, tahan ha’u! Refrão

 

Tahan ha’u iha fatin metin,

Ha’u beran, maksoi!

Nu’udar fatuk-inan soi ha’u

Sadi’a ha’u housi ema áat. Refrão

 

Na’i, ba Ita, ha’u laran metin,

Ha’u nia mahein houri sei klosan;

Houri ha’u sei kiik, Ita mak tahan,

Ha’u inan kô’ous, Ita ha’u beran. Refrão

 

Ha’u ibun haklaken Ita nia kamenek,

Haklaken nafatin Ita Nia Maksoi.

Houri ha’u sei kiik, Ita hala’o ha’u;

To’o ohin loron haklaken nafatin

Ita Nia kmanek. Refrão

 

Aclamação                                                                                         

Refrão : Glória ba Ita, Jesus Cristo, Aman Nia Matenek!!! Repete-se

                  Tabe Na’i! Ami liurai. Ita halo tuir de’it Aman Nia hakarak no

                  Ita be ema lori ba mate iha cruz hanesan bibi malae oan laran maus tebes. Refrão

 

Evangelho                                                                                                                                                                                                Jo. 13. 21-33, 36-38

+ Na’i Jesus Cristo nia Evangelho tuir São João

Iha tempo neba, Jesus tur iha mesa hamutuk ho escolante sira. Nia laran susar hodi dehan: “Tebes, tebes duni, Ha’u dehan ba imi: Imi ida sei saran Ha’u”. Escolante sira hateke ba malu; la hatene Nia ko’alia lós kona ba sé. Escolante sira ida, ida nebe Jesus hadomi, tur iha mesa besik lós Jesus. Tan ne’e Simão Pedro fó sinal hodi dehan ba nia: “Husu to’ok ba Nia, koa’lia kona ba sé ne’e?” Nia hakru’uk ba Jesus nia hirus matan hodi husu ba Nia: “sé lós, Na’i?” Jesus hatan ba nia; “mak ida nebe Ha’u sei habokon pão baluk hodi fó ba nia”. Habokon tiha duni pão baluk, Nia káer fó ba Judas, Simão Iscariotes nia oan. Iha oras ne’e dunik mak tuir pão baluk ne’e demónio mós tama iha nia. Jesus dehan ba nia: “Buat nebe ó atu halo, halo lalais ona ba”. Maibe, sira nebe tur iha mesa la hatene tansá mak Nia dehan buat ne’e ba nia. Tan Judas mak lori bolsa, balu hanoin katak Jesus dehan ba nia: ‘Ba sosa buat hirak nebe hodi halo festa eh atu fó karik esmola ruma ba ema kiak sira’. Judas simu tiha pão baluk ne’e, ba kedas. Kalan ona! Wainhira nia sai tiha, Jesus dehan: “Oras ne’e Mane Maksoi simu hahi, Maromak mós simu hahi iha Nia, tan Maromak simu hahí iha Nia, Maromak mós sei hahí Nia iha Nia An rasik; sei hahí Nia la kle’ur oan de’it ona. Imi sei buka Ha’u, maibe, nu’udar Ha’u dehan ona ba judeu sira: ‘Imi la bele ba fatin nebe Ha’u ba; oras ne’e, Ha’u dehan mós ba imi’”. Simão Pedro hatan ba Nia: “Na’i, Ita ba nebe?” Jesus hatan ba nia: “ ba fatin nebe Ha’u ba, ó la bele tuir Ha’u iha oras ne’e; liu tiha, ó sei tuir Ha’u” Pedro dehan ba Nia: “Na’i tansá oras ne’e ha’u la bele tuir Ita? Ha’u bele mate tamba Ita?” Jesus hatan ba nia: “Ó bele mate tamba Ha’u? Tebes, tebes duni, Ha’u dehan ba ó: manu seida’uk kokoréek, ó sei nega Ha’u dala tolu”!

Lia Maksoyn.

Leave a Reply

Your email address will not be published. Required fields are marked *