shadow
Diocese de Dili > NOTÍCIAS > LETURA DIÁRIA > Quinta-Feira da Semana Santa

Quinta-Feira da Semana Santa

ANO B

 

Primeira Leitura                                                                                  Ex. 12, 1-8. 11-14

Lia  housi livro Êxodo :

Iha loron hirak neba, Na’i Maromak lia tun ba Moises no Aarão, iha rai Egipto nune’e: “Fulan ida ne’e, fulan uluk nian ba imi, katak, fulan uluk tinan nian. Imi fó hatene sai ba povo Israel tomak, dehan: ‘Iha loron sanulu fulan ne’e nian, família ida-idak, uma ka’in ida-idak sei buka bibi-oan ida. Família ida ladun wain karik atu bele han hotu bibi-oan ne’e, família ne’e sei libur hamutuk ho família seluk, nebe tur besik nia, tuir ema hira iha uma laran. Imi sei hanoin didi’ak, ema na’in hira mak bele han bibi-oan ida, nu’udar ida-idak bele han. Bibi ne’e, bibi aman ksalak no kmanek, tinan ida nian. Imi bele fihir bibi-malae eh bibi-timur. Imi sei kesi hela bibi ne’e to’o loron sanulu resin haat, fulan ne’e nian. Iha loron ne’e, povo Israel tomak sei óhobibi ne’e iha loro-kraik. Imi sei hasai bibi ran hodi kose iha odamatan leten, iha uma houto-houto nebe imi han bibi ida ne’e. Iha kalan ne’e kedas, imi sei han bibi-oan ho pão no du’ut moruk; na’an sei tunu, pão sei la tau fermento. Imi sei han nune’e: hametin futu-kabun, tau sapatu iha ain no aitonka iha liman, nu’udar ema la’o rai ida. Imi sei han lalais, tan ne’e katak Maromak liu daudaun. Iha kalan ne’e duni, Ha’u sei liu housi rai Egipto; Ha’u sei óho ema oan kawa’ik tomak, no balada sira mós. Ha’u sei halo justiça ba rai Egiptonia lulik sira tomak. Ha’u de’it mak Na’i! Ran iha imi nia odamatan katak sinal ida. Haré tiha ran ne’e, Ha’u sei liu de’it. Imi sei la hetan susar áat ida ne’e, wainhira Ha’u hakanek Egipto tomak. Imi sei hanoin nafatin loron ida ne’e. Imi sei hamta’uk loron ida ne’e, nu’udar Na’i nia loron. Tinan-tinan, imi sei halo nafatin festa iha loron ne’e!”

Maromak Futar Lia.

 

Salmo Responsorial                                                                                                                                                 Sal. 115 (116), 12-13, 15-16bc. 17-18

Refrão : Ne’e Kális Santa, Comunhão Cristo futar Ran!!! Repete-se

 

Sei agradece ha’u Na’i oin sá

Tan di’ak hotu Nia fó?

Sei tane Kális Maksoyn

Hodi harohan Na’i nia naran. Refrão

 

Kmanek ba Na’i futar matan

Nia belun sira nia mate.

Ha’u Ita atan, Ita atan feto nia oan.

Ita hasai ha’u housi susar laran. Refrão

 

Has’ae ba Ita sarifício hahí,

Sei halo tuir lia nebe ha’u hakotu ba Na’i,

Iha povo tomak nia oin. Refrão

 

Segunda Leitura                                                                                                                                                                                             1 Cor. 11, 23-27

 Lia housi São Paulo nia surat ba sarani sira ina Corinto :

Maun-alin sira: Ha’u rasik simu housi Na’i, lian nebe ha’u hato’o ba imi. Iha kalan, molok Nia atu terus, Na’i kaer tiha pão, haraik bensa, silu hodi fahe tiha, dehan: “Ne’e Ha’u Nia Isin, nebe Ha’u saran ba imi! Imi sei halo tuir ida ne’e, hodi hanoin Ha’u!” Han hotu tiha, Jesus foti mós kális, dehan: “Ne’e Kális Ha’u Ran nian, Ran moruk foun nian. Wainhira imi hemu tua Kális ida ne’e, hemu hodi hanoin Ha’u.” Wainhira imi han Pão ida ne’e, imim hemu tua Kális ida ne’e, imi sei fó hatene sai ba rai-klaran loron Na’i Jesus mate, to’o loron nebe, Nia hiit-An fila hikas mai. Tan ne’e, sée han pão ida ne’e, sée hemu kális ida ne’e ho laran fo’er, sei monu iha Na’i Jesus Cristo nia Isin no Ran nia Justiça.

Maromak Futar Lia.

 

Aclamação                                                                                                                                                                                                                    Jo. 13, 14

Refrão : Cristo, Maromak futar Lia, ami hahí Ita!!! Repete-se

                   Na’i hateten : Ha’u fó ba imi mandamento foun :

                   imi sei hadomi malu nu’udar Ha’u hadomi imi.. Refrão

 

Evangelho                                                                                                                                                                                                                 Jo. 13, 1-15

+ Na’i Jesus Cristo nia Evangelho tuir São João

Molok tama ba festa Páscoa, Na’i Jesus hatene lós katak, to’o ona loron Nia atu husik daudaun rai-klaran hodi liu ba Aman Maromak; Tan Nia hadomi teb-tebes Nia emar sira nebe, moris hela iha rai-klaran, Nia hadomi sira to’o rohan. Sira sei tur hela hodi han, diabo hatatan Judas Iscariotes, Simão nia oan, nia ulun, atu saran Jesus ba mate. Hatene tiha ona katak, Aman Maromak tau iha Nia liman sasan tomak; hatene tiha mós katak, Nia mai housi Maromak, Nia atu fila hikas ba Maromak, Na’i Jesus Cristo hamriik, rai tiha Nia unuk, hola hena mutin naruk ida, kesi iha knotak. Fui bé iha bacia ida hahú fase Apóstolo sira ain, tuir mai, Jesus hamaran sira ain hodi hena mutin bobar hela iha Nia knotak. To’o Simão Pedro, Simão Pedro hasa’e lia ba Nia dehan: “Na’i Ita atu fase atan ha’u nia ain?” Jesus hatan ba nia: “Oras ne’e ó labele hatene lolós buat nebe Ha’u halo daudaun. Ikus mai ó sei hatene.” Simão Pedro simu fali dehan: “Lae! Ita labele fase ha’u ain!” Jesus lia tun hikas ba nia dehan: “Ha’u la fase ó ain karikó sei la hela hamutuk ho Ha’u!” Simão hasa’e fali lia ba Jesus, dehan: “Na’i, ne’e sá, fase ha’u ain, fase mós ha’u liman no oin.” Jesus lia tun hikas ba nia dehan: “Ema nebe haris ona, fase de’it ain, basá, nia isin mós ona. Imi, mós tiha ona; maibé, laós imi hotu!…” Jesus hatene, sée lós sei saran Nia ba mate. Tan ne’e Jesus dehan: “Imi balun mós, maibe balun lae.” Fase houtu sira ain, hola hikas nia unuk, hatodan-An fali iha Nia fatin, Jesus lia tun ba sira, dehan: “Imi hatene Ha’u halo sá ida mak ne’e? Imi halia Ha’u, imi nia mestre no imi Na’in. Imi dehan lós duni: bas’a Ha’u Mestre duni, Ha’u Na’i tebes. Maski Mestre, maski Na’i, Ha’u fase imi ain. Ne’e duni, imi mós sei halo henesan ne’e ba malu. Imi sei banati tuir nu’udar Ha’u foin halo.”

Lia maksoyn.

Leave a Reply

Your email address will not be published. Required fields are marked *