shadow

SABADO SANTO

ANO B

 

Primeira Leitura                                                                                  Gén. 1, 1. 26-31ª

Lia housi Livro Génesis :

Uluk nana’in, Maromak halo lalehan no rai. Tuir, Maromak dehan: “Ita halo ema nu’udar Ita ilas, tuir Ita klalatak, atu nia ukun ikan iha tasi laran, manu sira iha aas, balada dian no sira be fuik, samean no buat nain hotu nebe dolar iha rai”. Maromak halo duni ema tuir Nia ilas; halo tebes ema tuir Nia klalatak. Maromak halo ema mane ho feto. Maromak haraik rahun-diak ba sira, dehan: “Imi sai buras no wa’in ba, moris nakonu iha rai, hodi ukun rai-klaran! Imi ukun ikan iha tasi laran, ukun manu sira semo iha lalehan! Imi ukun mos balada sira hotu moris iha rai-klaran”. Maromak dehan teni: “Ha’u fó mos ba imi ai-horis  nebé nafuan no moris iha rai-klaran. Ha’u fó ba imi ai-horis nebé fó fuan ho musan, nu’udar imi nia ai-han. Ba balada fuik sira hotu, ba manu sira semo iha lalehan, ba buat nain sira tomak nebé moris iha rai-klaran, Ha’u fó aihoris matak nu’udar sira ai-han”. Lia hirak ne’e lao tuir duni nune’e. Hafoin, Maromak haré buat hotu Nia halo, Nia haré katak sasan tomak mesak kmanek! Loro-kraik ida mai! Dader ida mai! Loron neen ona. Maromak halo sasan tomak ona iha lalehan no iha rai. Halo hotu tiha Nia knar, to’o loron hitu, Maromak hamahan-An.

Maromak Futar Lia.

 

Salmo Responsorial

Refrão :  Na’i Maromak besik ba sira be harohan!!! Repete-se

Na’i Maromak diak iha Nia hanoin,

Diak iha buat hotu Nia halo. Refrão

 

Nia besik ba sira be harohan,

Besik ba sira be harohan tebes. Refrão

 

Ba ema hadomi Nia Maromak tau matan

Maibé, ba ema laran Nia fó todan. Refrão

 

Segunda Leitura                                                                                                                                                                   Gén. 22, 1-2, 9ª, 10-13, 15-18

Lia housi Livro Génesis :

Iha loron hirak nebá, Maromak hakarak koko Abraão, hodi dehan: “Abraão!” Abraão hatán: “Ha’u mak ne’e, Na’i.” Maromak dehan: “Hola ó nia oan, ó oan mesak Isaac, nebé ó hadomi teb-tebes, lori ba rai Meribá. Iha nebá, ó sei hasa’e hanesan buat karan ida, iha foho nebé Ha’u sei hatudu.” Sira na’in rua ba lós fatin nebé Maromak hatudu. Iha nebá, Abraão foti Altar ida, hodi tau ai-maran ba leten. Hafoin lolo liman, kaer taha atu oho, hodi hasa’e nia oan. Maibé, Maromak nia Anjo bolu nia housi lalehan, dehan: “Abraão, Abraão!” Abraão hatán: “Na’i, ha’u mak ne’e. Anjo dehan ba nia. “Keta halo ó liman kona labarik ne’e, keta halo aat ba nia. Oras ne’e, Ha’u hatene ona katak ó hamtauk Maromak, tan ó la karak hasa’e mai Ha’u, ó nia oan mesak.” Abraão foti matan, haré bibi ida, kesi hela iha nia kotuk, iha ai-fuik oan ida. Nia ba kore tiha bibi ne’e hodi hasa’e hanesan buat karan, iha fali nia oan nia fatin. Maromak nia Anjo bolu teni Abraão housi lalehan, dehan: “Ha’u rasik dehan ba “o – Na’i liafuan – tan ó halo nune’e, la karak hasa’e ó nia oan mesak, Ha’u sei haraik kmanek wain ba ó; Ha’u sei halo ó nia bei-oan sira sai wain teb-tebes, hanesan fitun iha lalehan, hanesan rai-henek iha tasi ibun; Ó nia bei-oan sira sei manán hodi hasai cidade hotu-hotu hasouru ema aat sira liman. Tuir lia ne’e, tan ó halo tuir Ha’u lian, Ha’u sei fó bensa ba nasaun hotu-hotu iha rai-klaran.

Maromak Futar Lia.

 

Salmo Responsorial                                                                                                                                                                    Sal. 15(16), 5. 8. 9-10. 11

Refrão : Na’i, sadia ha’u, tan Ita ha’u kbiit!!! Repete-se

Na’i, ha’u nia liman rohan, ha’u nia beran,

Ha’u nia moris iha Ita liman.

Na’i hela nafatin iha ha’u oin,

Ho ha’u Nain ha’u sei la lakon. Refrão

 

Ha’u laran haksolok, ha’u klamar hawelok,

Ha’u isin moris hakmatek.

Na’i la husik ha’u klamar iha mate-bian fatin,

Sei la husik mos Nia atan, isin dodok. Refrão

 

Ita sei fó hatene mai ha’u dalan moris nian;

Haksolok boot iha Ita futar oin,

Ksolok rohan laek iha Ita sorin kwanan. Refrão

 

Terceira Leitura                                                                                                                                                                                           Êx. 14, 15 – 15, 1

Lia housi Livro Êxodo :

Iha loron hirak nebá, Maromak lia tun ba Moisés, dehan: “Tan sá ó hakilar mai Ha’u? Dehan ba Israel oan sira atu la’o ba daudaun! Foti ó nia óe, lolo liman ba tasi, fahe nia ba rua, atu Israel oan sira bele hákat liu ba sorin balu, hodi liu, ain la bokon. Ha’u sei hato’os Egipto sira laran, atu sira tama tuir Israel oan sira. Funu-na’in Faraó nian hotu ho sira nia kareta, kuda ho ema, sei hakfodak haré Ha’u nia kbiit. Faraó nia kareta, nia emar sira no kuda sira haré tiha Ha’u nia kbiit, Egipto sira sei hatene katak Ha’u deit mak Na’i lolós. Maromak nia Anjo, ida nebé la’o uluk iha Israel oan sira oin, fila fali mai hela iha kotuk. Kalohan nebé hela iha Israel oan sira oin, mai mos iha kotuk, haketak tiha Israel oan sira ho Egipto sira. Kalohan ida ne’e, sorin ida nakukun, sorin seluk naroman iha kalan. Nune’e, kalan tomak, sira la hakbesik ba malu. Moisés  lolo liman ba tasi iha kalan laran, Maromak huu tasi hodi anin maka’as mai housi loro-sa’e. Anin huu kalan tomak, hodi fahe Wé ba rua. Israel oan sira tama daudaun ba tasi, sira ain la bokon. Wé iha sorin-sorin, ita haré hanesan didin lolon ida. Egipto sira tama tuir sira. Faraó nia kuda, nia kareta no nia emar sira tama tuir tasi leet, atu kaer Israel oan sira. Rai hun mutin, Maromak mai housi anin no kalohan leet, hodi hateke ba Egipto sira nia ai-hun, halo sira beik, tuir malu la hatene. Sira nia kareta dulas ba, to’os la diak: nune’e, sira lao neineik hela. Nune’e Egipto sira, dehan: Ita halai housi Israel oan sira, tan Maromak housi sira hodi funu hasouru Egipto sira”. Maromak lia tun ba Moisés: “Lolo liman ba tasi, atu wé taka tiha Egipto sira, taka sira nia kareta, kuda no emar sira.”  Moisés lolo liman ba tasi. Molok loron matan nakfera, tasi nakonu tiha fali. Egipto sira halai fila, halai housi wé. Maromak hamout sira iha tasi laran. Tasi nakonu tiha fali, halakon tiha kareta, kuda no Faraó nia emar sira. Faraó nia funu-na’in sira nebé tama tuir Israel oan sira iha tasi, mout hotu iha tasi. Israel oan sira lao iha tasi klaran ho ain la bokon. Wé hanesan didin lolon, iha sorin karuk no sorin lós. Iha loron ne’e, Maromak hasai Israel oan sira housi Egipto sira liman. Israel haré hela iha tasi ibun, Egipto sira nia isin maten. Israel haré mós katak Maromak maka’as duni hasouru Egipto sira. Israel oan sira hamta’uk teb-tebes Maromak. Sira fiar duni Maromak no nia atan Moisés. Israel oan sira ho Moisés hananu ba Maromak nune’e: “Ita hotu hanai ba Maromak, tan Nia kbiit wa’in tebes! Nia hamout tiha iha tasi, kuda no kuda-nain!”

Maromak  Futar  Lia

 

Salmo Responsorial

Refrão : Ha’u sei fila fali ba, ba Maromak, ha’u Aman ha’u Nain!!! Repete-se

Na’i Maromak sée tilun mai ha’u atan,

Hatán ha’u lian, tan ha’u susar no kiak. Refrão

 

Tulun ha’u, Maromak hanoin ha’u, rona ha’u,

Tan ha’u bolu Ita loron tomak. Refrão

 

Fó ha’u klamar ksolok lalehan.

Tan ha’u klamar ha’u fó ba Ita. Refrão

 

Ita laran luak no diak tebes,

diak ba sira be harohan. Refrão

 

Quarta Leitura                                                                                                                                                                                                        Is. 54, 5-14

Lia housi Livro Profeta Isaías :

Jerusalém, Maromak mak ó nia káben. Nia naran mak “Rai tomak Na’in.” Ó nia Maksoin mak “Israel nia ema Santo,” naran “Rai tomak nia Maromak.” Tebes, Maromak bolu hikas ó, nu’udar nia káben hela mesak no laran susar. “Mane ida bele hakribit feto nebé nia hola, wainhira nia sei fetorá? – Ó nia Maromak dehan-Ha’u haluha ó la kleur. Ha’u sei buka fali ó hodi laran luak tebes. Tan deit Ha’u laran nakali mak Ha’u lakon housi ó oin. Maibé, tan Ha’u hadomi tebes ó, la kleur, ha’u sei sadia ó. Ó nia Maromak, ó nia Maksoin rasik mak hateten ida ne’e. Ohin, Ha’u hakotu lia hanesan iha Noé nia loron, katak, wé sei la taka tan rai. Nune’e mos, Ha’u hakotu lia katak Ha’u sei la hirus tan ó, Ha’u sei la halo tauk tan ó. Foho boot sira bele naksobu, foho kiik sira bele nakdoko: Ha’u nia moruk dame malu nian sei metin nafatin.” Ne’e, Maromak nebé sadia ó, mak dehan. Jerusalém, cidade kiak, anin baku halimar, buat diak ida mos la iha. Ha’u sei harí ó iha fatuk “Jaspe” leten! Ha’u sei harí ó iha ”Safira” fohon! Ha’u sei halo ó nia hafuhu-fatin hodi fatuk rubí. Ha’u sei halo ó nia odamatan hodi fatuk nabilan. Ha’u sei halo ó nia didin lolon hodi fatuk murak wain. Ha’u mak sei hanourin ó nia emar sira tomak! Sira sei moris, sei hetan kmanek wain tebes. Ó nia abut mak justiça. Ó sei la tauk, basá ema ida sei la hanesan tan ona ó. Ó laran sei la susar ona, tan ema ida la bele besik ó!.

Maromak Futar Lia.

 

Salmo Responsorial

Refrão :  Laran Metin ba Na’i Maromak, Ha’u moris Ita lian;

                   Ita lian mai nafatin ho Nia ha’u titu deit!!! Repete-se

Ba sira  klamar mos ksolok tebes,

Sira be tuir Maromak ukun-fuan.

Ba sira tuir Nia ukun, ksolok boot,

Buka Nia ho laran diak. Refrão

 

Ha’u hili dalan lós no diak nian

Tuir uluk Ita ukun no hakarak

Sei tuir dalan Na’i Maromak

Wainhira ha’u íis sei dauk kotu. Refrão

 

Quinta Leitura                                                                                                                                                                                                          Is. 55, 1-11

Lia housi Livro Profeta Isaías :

Na’i koalia dehan: “imi hotu nebé hamrook, mai buka wé, imi nia osan la iha karik, mai deit. Sosa hodi simu tua no susu-wen la ho osan, la ho kolen. Tan sá imi fó osan ba buat nebé laós ai-han? Tan sá imi tau imi nia kólen ba buat nebé la halo bosu? Buka rona Ha’u, imi sei simu buat nebé diak. Ha’u haksolok imi ho hahan mesa furak. Buka sê tilun mai ha’u, hodi mai buka Ha’u; rona mai, imi nia klamar sei moris. Ha’u sei halo moruk, moruk rohan laek ida ho imi ho nafatin kmanek nebé hakotu ona ba David. Imi haré katak Ha’u halo nia hanesan sasin ida iha povo sira leet, halo nia nu’udar ulun nai-ulun sira no liurai boot iha nação sira hotu leet. Imi sei bolu nação  sira nebé imi la hatene, povo sira nebé imi la hatene sai mai hasouru imi, tan Na’i ó nia Maromak; tan Israel nia Santo, nebé ha’u hakarak hahí. Buka imi Nain, wainhira sei bele; harohan ba Nia, wainhira sei hela besik. Ema aat sei husik nia dalan, ema laran aat sei husik sira nia hanoin. Fila nia laran ba Na’i, basá Na’i hanoin nia, Na’i ita nia Maromak nebé hadomi, perdua. Ha’u nia hanoin la hanesan imi nian – Na’i nia lia-fuan! Nu’udar lalehan hela iha rai leten, hanesan ne’e mos Ha’u dalan diak ba liu imi nian, Ha’u nia hanoin kmanek liu imi nian. Udan ho mahabén wainhira monu housi lalehan mai, la fila hikas, molok ladauk habokon rai, lalauk  halo rai buras, ladauk fó folin ba rai, atu fó folin ba ida nebé kuda, fó ai-han ba ida nebé han. Hanesan ne’e mos, lia-fuan nebé sai housi Ha’u ibun, la fila hikas, molok ladauk tuir nia lala’ok, seidauk tuir Ha’u nia hakaran, seidauk tuir nia knar!”.

Maromak Futar Lia.

 

Salmo Responsorial                                                                                                                                                                        Sal. 12, 2. 3. 4bde. 5-6

Refrão : Ema kiak sei hetan ksolok, sei hahí Maromak. Repete-se

Maromak ha’u nia Maksoin,

Ha’u laran metin, ha’u la tauk.

Na’i, ha’u nia kbiit, hau nia harohan,

Na’i, ha’u nia maksoin. Refrão

 

Agradece Maromak, hahí Nia naran!

Haklaken ba povo hotu Nai nia kbiit.

Haklaken Nia naran santo ba ema hotu. Refrão

 

Sexta Leitura                                                                                                                                                                                        Bar. 3, 9-15. 32 – 4, 4

Lia housi Livro Profeta Barúk :

Israel, rona ukun moris nian, sée tilun mai atu hatene doutrina. Israel, tan sá ó hela iha ema aat sira rain, katuas tan iha rai seluk, hafoér ó-an ho sira nebé mate, hodi tau ó naran hamutuk ho sira nebé tun ba rai okos? Ó soe tiha ona ba kotuk matenek nia hun: ó tuir karik Maromak nia dalan, ó sei moris iha hakmatek laran nafatin. Buka hatene doutrina iha nebé, iha nebé bele hetan kbiit no  matenek, atu ó bele hatene mos tinan naruk no moris iha nebé;  iha nebé ó bele hetan naroman ba matan no dame. Maibé, se mak hetan matenek nia fatin, se mak tama to’o iha nia murak laran? Ida nebé hatene buat hotu, nia mak hatene, nia mak tama ho nia matenek. Nia halo rai ba nafatin, hodi tau balada barak iha rai ne’e; Nia haruka roman nabelar nia naroman; bolu nia halo tuir ho hamta’uk. Fitun sira nabilan iha sira fatin, nabilan ho ksolok. Maromak bolu sira, sira hatán: “Ami mak ne’e”, hodi nabilan ho ksolok ba Ida nebé halo sira. Nia, ita nia Maromak, la iha ida hanesan ho Nia. Hatudu dalan ba matenek nian, hodi fó ba Nia atan Jacob no ba Israel, Nia oan dóben. Hafoin Nia mosu iha rai-klaran, hodi moris hamutuk ho ema. Fó sai Maromak nia ukun-fuan no lei nebé sei hela ba nafatin. Sira nebé tau sira laran iha ukun-fuan ne’e, sei hetan moris; maibé, sira nebé  hewai, sei mate. Jacob fila mai, hodi kaer metin lao ba dalan lós, iha naroman nia laran; keta fó ó nia kbiit ba ema seluk Israel, rahun-diak mai ita tan diak hotu nebé Nia hakarak, fó sai hotu mai ita.

Maromak Futar Lia.

 

Salmo Responsorial                                                                                                                                                                               Sal. 18, 8. 9. 10. 11

Refrão : Na’i, Ita iha lia-fuan moris rohan laek nian!!! Repete-se

Na’i nia ukun kmanek tebes

Haksolok klamar

Na’i nia hakarak metin duni,

Fó matenek ba ema kiik. Refrão

 

Na’i nia ukun lós tebes,

Haksolok ema fuan.

Nai nia ukun naroman duni,

Fó roman ba matan. Refrão

 

Na’i nia lisan la sala

Hela ba nafatin.

Na’i nia hanourin lós teb-tebes,

Tuir duni dalan lós. Refrão

 

Simu lia-fuan housi Ha’u ibun,

Halo ha’u hanoin nafatin Ita, iha ha’u laran

Na’i, Ita ha’u nia kbiit,

Ha’u nia Maksoyn. Refrão

 

Sétima Leitura                                                                                                                                                                                                    Ez. 36, 16-28

Lia housi Livro Profeta Ezequiel

Na’i lia tun mai hau nune’e: Oan mane, wainhira sira hela iha sira rain, Israel nia uma laran sira hafoér-an ho sira nia moris no hahalok. Iha Hau oin, sira nia moris lao hanesan ran aat. Ha’u foti Ha’u nia hirus hasouru sira,  tan ran nebé  sira fakar iha rai, tan lulik nebé sira hodi hafoér sira-an. Ha’u fahe tiha sira ba nação barak, sira namkari tiha ba rai seluk; Ha’u fó kastigu ba sira, tan sira nia moris no hahalok. To’o tiha iha rai nebé sira bá, sira hafoér  tiha Ha’u naran Santo, hanesan ema dehan kona ba sira: “Sira, Na’i nia povo: sira sai tiha housi sira rain.” Ha’u nia laran monu fali, tan Ha’u naran santo nebé Israel nia uma laran hafoér, iha nação sira nebé sira ba. Ne’e duni, dehan ba Israel nia uma laran: Na’i Maromak ko’alia nune’e: “Ha’u la rai hirus, laós tan Israel nia uma laran, maibé, tan Ha’u naran Santo, nebé imi hafoér iha rai sira nebé imi ba atu hela. Ha’u sei hatudu Ha’u nia naran Santo nia kbiit, hodi hatún nação sira nebé imi ba hafoér Ha’u naran: ‘Nação sira sei hatene katak Ha’u mak Na’i’ – Na’i Maromak dehan wainhira Ha’u hatudu Ha’u naran Santo, hodi hateten kona ba imi, iha imi nia oin rasik. Ne’e duni, Ha’u sei hasai imi housi nação sira leet, sei halibur hamutuk imi housi rai hotu, atu lori fila ba imi rain. Ha’u sei halo wé matan kmook ida, suli ba imi: imi sei hetan perdua ba imi nia hahalok tomak; Ha’u sei hamós imi housi imi nia lulik sira. Ha’u sei fó fuan foun ida ba imi, sei tau ilas foun ida ba imi nia moris. Ha’u sei hasai fuan to’os housi imi nia isin, hodi fó fuan isin ida ba imi. Ha’u sei huu Ha’u íis ba imi, hodi halo imi tuir Ha’u nia ukun-fuan atu imi halo tuir Ha’u nia ukun. Imi sei hela iha rai nebé Ha’u fó ba imi nia aman sira; imi sai Ha’u nia povo, Ha’u imi nia Maromak.

Maromak Futar Lia.

 

Salmo Responsorial                                                                                                                                                      Sal. 41(42), 2. 5bed; 42(43), 3. 4

Refrão : Hanesan rusa buka wé-lolon, nune’e mos hau klamar buka Ita Boot!!! Repete-se

Ha’u klamar hamrook Maromak,

Maromak moris nian.

Wainhira hau sei ba hela,

iha Maromak futar oin? Refrão

 

Ha’u klamar laran susar hanoin,

wainhira lao ba hasouru Na’i iha uma oração

Hodi haksolok hananu,

ho ema lubun boot iha festa. Refrão

 

Na’i, haraik Ita naroman no lialós;

Hatudu dalan mai ha’u ata

Lori ha’u ba Ita povo santo,

Ba Ita nia kadunan. Refrão

 

Ha’u sei ba Maromak nia kadunan,

Ba Maromak ba ha’i nia ksolok.

Ha’u sei hahí Maromak ho knananuk,

Hahí ha’u Na’in, ha’u nia Maromak. Refrão

 

Epístola                                                                                                                                                                                                                   Rom. 6, 3-11

Lia housi São Paulo nia surat ba sarani sira iha Roma :

Maun alin sira : Ita hotu simu wé Baptismo tan Jesus Cristo; Ita hotu simu wé Baptismo tan Nia mate. Tan wé Baptismo, ita hotu mate, hakoi-an hamutuk ho Nia. Nu’udar Cristo moris hias housi mate, tan Aman Maromak nia kbiit, nune’e mos, ita sei hetan moris foun ida. Ita neon no laran ida deit ho Cristo, tan ita mate mos nu’udar Nia mate; ita mos sei sai duni ida deit ho Nia, tan ita mos sei moris hias nu’udar Nia. Ita hatene katak: ita, ema uluk nian, hedi tiha ona iha cruz, hamutuk ho Cristo, atu halakon sala nia kbiit iha ita; atu nune’e, ita keta sai tan salan nia atan. Sê mate tiha ona, salan la kona tan nia. Ita mate tiha ona ho Cristo. Ne’e duni, it abele fiar mos katak ita sei moris hamutuk ho Nia. Tamba ita hatene katak Cristo moris hias tiha ona housi mate, Nia la bele mate fali: mate la ukun ona Nia. Hodi Nia mate, Cristo mate hodi oin ba salan. Maibé, hodi Nai moris,  Nia moris nafatin ona ba Maromak. Nune’e mos, ita sei hanoin katak, ita mate tiha ona ba salan, atu moris deit ba Maromak, tan Jesus Cristo.

Maromak Futar Lia.

 

Aclamação                                                                                                                                                                      Sal. 117(118), 1-2. 16ab-17. 22-23

Refrão : Aleluia, Aleluia !!! Repete-se

Hana’i Maromak tan nia di’ak!

Tan Nia laran luak ba ema hotu.

Dehan ba uma kain Israel:

Nia laran luak rohan laek. Refrão

 

Maromak halo di’ak ho Nia liman,

Ho laran kmanek tahan nafatin.

Ha’u la mate, maibé sei moris,

Atu haklaken Na’i lia-fuan. Refrão

 

Fatuk be ema hewai

Nakfilak ba fatuk inan.

Housi Na’i buat hotu mosu,

Kmanek liu iha ita oin. Refrão

 

Evagenlho                                                                                                                                                                                                                 Mc. 16, 1-8

+ Na’i Jesus nia Evangelho nu’udar São Marcos haktuir :

Liu tiha sábado, Maria Magdala, Maria, Tiago ho Salomé sira nian inan sosa mina-morin, atu ba tau ba Jesus. Iha loron uluk semana nian, foin dadersan, loro-matan mosu, sira ba rate. Sira dehan ba malu: “Sê lós mak sei duir fatuk housi odamatan rate nian?” Maibé, sira haré didi’ak tiha, fatuk ne’e ema duir tiha ona. Fatuk ne’e boot tebes duni. Sira tama iha rate, sira haré mane-klosan ida tur hela iha sorin lós, hatais mutin; sira hakfodak. Nia dehan ba sira: “Imi keta ta’uk. Imi buka Jesus Nazaré, nebé mate iha Cruz? Nia moris hias ona; Nia la iha ne’e. Fatin bé sira tau Nia, mak nebá. Ne’e duni, imi ba dehan ba nia Escolante sira ho Pedro: Nia ba uluk liu imi, iha Galileia. Iha nebá, imi sei haré Nia, nu’udar uluk dehan nanis. “Sira halai sai housi rate, nakdedar ho tau’k. Sira la dehan ba ema ida, basá sira ta’uk.

Lia Maksoyn.  

Leave a Reply

Your email address will not be published. Required fields are marked *