shadow
Diocese de Dili > NOTÍCIAS > Notícias > CARTA PASTORAL BA ELEIÇÕES ANTECIPADAS 2018

CARTA PASTORAL BA ELEIÇÕES ANTECIPADAS 2018


Introdução

Iha tinan 2017, Timor-Leste celebra nia tinan 15 nu’udar Estado Independente iha comunidade internacional nia le’et. Estado nebé hari’i nia-an iha milénio foun ida História Universal nian. Proclama tiha independência iha tinan 1975, maibé wainhira Comunidade Internacional reconhece ita nia estatuto ida ne’e iha 20 de Maio de 2002, maka ita foin hari’i ita-an nu’udar Estado Independente no soberano, hanesan Nação hot-hotu iha mundo.

Tinan ida ne’e mós, Timor-Leste sei halao nia exercício democrático liu husi eleições ba dala tolu, kona ba eleições ba Presidente da República, no ba eleições parlamentares ka legislativas. Katak ita sei hili iha tinan ida ne’e, ema ida nebé povo Timor-Leste sei fo kbiit atu kaer kuda talin Estado nian; no mós ita sei hili força política ka força política sira nebé povo Timor-Leste sei hili atu fo kbiit ba sira hodi ukun no halo lei sira nebé Estado Timor-Leste precisa atu halao nia moris nu’udar, estado, sociedade no cidadão.

Iha biban ida ne’e, ami Bispo sira Timor-Leste nian, nu’udar ulun Kreda Católica nian iha rai ida ne’e, hakarak mós hato’ó no fahe ami nia hanoin balu hodi convida povo tomak atu hanoin, haklean, reflecte, considera no mós participa iha tempo ne’e no iha acontecimento sira nebé sei tuir mai ne’e, wainhira hakerek daudaun hela ita nia história rasik iha tempo moderno.

Ami nia hanoin no hakarak ne’e atu convida Estado Timor-Leste atu heteke ba nia-an rasik, nu’udar Estado. Laos deit hateke ba Timor-Leste, liu husi perspectiva candidato presidencial ida nian; laos deit hanesan força politico-partidária ida nebé esforça-an atu apresenta nia programa partidário hodi buka manan votos; laos deit hanesan militante partidário nebé empenha nia-an maka’as atu nia partido bele hetan cadeira barak liu; laos deit hanesan votante nebé iha loron votação nian ba tau nia voto, hafoin hein tan tinan lima mai oin atu ba vota hikas fali. Hafoin durante tinan lima mai oin ne’e nia laran, rai ne’é atu lao oinsa-oinsa deit, nia la interessa.

Ami nia hanoin no hakarak ne’e, convida Timor oan ida-idak, atu, halao daudaun nia militância política-partidária, nia ideologia rasik, nia hakarak no mehi rasik atu hetan dalan nebé diak liu ba ita nia rai, maibé fo hanoin ba cidadão ida-idak atu tau nia-an iha estado nia laran. Haré liu ba interesse estado nian, nebé bo’ot no a’as liu ida-idak ninian.

 

  1. Consciência Histórica

Baibain matenek nain sira considera ita nia rai no nação ida ne’e hanesan ponto ida nebe hatudu mundo rua fahe malu eh fatin nebé halo mundo rua hasoru malu. Haré husi Continente, dehan katak Timor-Leste halo continente rua fahe malu eh hasoru malu: Ásia no Oceania; haré husi taci, dehan katak Timor-Leste rai nebé halo Oceano Pacífico no Oceano Índico fahe malu eh hasoru malu; haré husi religião, Timor-Leste, rai nebé hakotu religião ida (Cristianismo, liliu Catolicismo) nia influência no hamosu religião bo’ot sira seluk Ásia nian iha rai sira nebé haleu ita nia rai kiik-oan ida ne’e. Ita bele haré tan ba ita nia rai ida ne’e husi sikun seluk, ângulo seluk no perspectiva seluk tan.

Hanesan povo ida nebé, maioria sarani no católico, ita tenki haré ba pormenor oan ida nebé bolu mundo tomak nia atenção no interrogação : HALO NUSA MAKA RAI OAN IDA BELE SAI CENTRO IDA CRISTIANISMO NIAN, NO LILIU CATOLICISMO NIAN IHA ÁSIA BO’OT IDA NE’E NIA LE’ET NO IHA RAI SIKUN OAN IDA NE’E, DO’OK HUSI CENTRO HOT-HOTU NEBÉ HALEKAR CRISTO NIA EVANGELHO BA MUNDO IHA TEMPO LIU BA? PROPORCIONALMENTE, TIMOR-LESTE RECONHECIDO NU’UDAR PAÍS CATÓLICO NEBÉ BO’OT LIU IHA MUNDO, BIAR NUMÉRICAMENTE ITA NIA POPULAÇÃO SEI UITOAN HELA DEIT.

Baibain ita considera hodi dehan katak ne’e Maromak nia plano. Iha biban ida ne’e, ami Bispo sira hakarak convida Estado Timor-Leste atu hateke ba nia-an, no hateke ba contexto nebé haleu ita nia rai nu’udar nação católica ida. Para além de desenvolvimento nebé ita hotu hakarak no mehi, ita tenki considera katak nu’udar Estado, ita buka ocupa ita nia fatin iha mundo, maibé mós nu’udar sarani ita hola consciência katak ita halao mós Maromak nia plano ida iha mundo sikun ida ne’e. Ita koko to’ok hanoin hamutuk Nai Maromak nia plano ba Estado kiik-oan ida ne’e maka ida nebé? Desde Candidatos Presidenciais no Força partidária sira, ita hotu koko hanoin kona ba ita nia particularidade ida ne’e. Haré tuir influência religião nian, ita hatene deit katak religião bo’ot sira Ásia nian la iha influência kona ba ita nia cultura, usos no costumes, comportamentos, etc… Biar, felizmente, ohin loron Timor-Leste hetan contacto barak ho rai liur nebé hetan influência husi religião sel-seluk, maibé base cristianismo nian sai nafatin referência hodi sukat Timor oan sira nia moris lor-loron nian. Ita nia património histórico no cultural hetan nia hun husi Cristianismo-Catolicismo. Biar ita nia prática sarani sei kahur hela buat barak ho ita nia base animista. Maibé animismo ida ne’e duni maka sai fatin atu Cristianismo no Catolicismo haburas-an iha Timor-Leste.

Amo Papa Francisco, wainhira hasoru malu ho Bispo Timor oan sira dehan: “estes sinais ao mesmo tempo que exprimem a radicação da Igreja em Timor, convidam os seus filhos e filhas a um testemunho alto de vida cristã e a um redobrado esforço de evangelização para levarem a Boa Nova a todos os estratos da sociedade, transformando-os a partir de dentro”. (visita ad limina, 17/3/14)

Amo Papa S. João Paulo II, iha 12 de Outubro de 1989, wainhira visita rai Timor, iha Taci-Tolu actualiza Jesus Cristo nia lia fuan iha Evangelho S. Mateus “Imi masin, imi naroman mundo nian”. (Mt. 5, 13-16) Nato’on ne’e loron libertação sei do’ok. Biar iha opressão, susar no terus nia laran, S. João Paulo II fo hanoin ba sarani Timor oan sira nia obrigação nu’udar sasin ba Evangelho. Ami hanoin katak iha tempo nebé ita atu celebra dadaun tinan 15 nudar Estado livre , independente no soberano, S. João Paulo II nia liafuan hirak ne’e mai fanu ita kona ba Timor-Leste nia vocação nu’udar Nação Católica iha mundo sikun ida ne’e. Baibain mós wainhira mundo internacional refere ba ita nia estado temi bebeik katak Timor-Leste Estado nebé moris wainhira 3o Milénio hahú. Ami hakarak bolu atenção ba ita nia particularidade tolu ne’e, nebé ita ladauk fo valor klean karik: Nação Católica, moris iha Milénio foun, hela iha mundo rua nia le’et. Se ita haré ba História kotuk wainhira ita haré acontecimentos, Nação sira nebé fo influência bo’ot ba milénio ida, no actores hirak nebé muda história mundo nian, iha tinan rihun ida nia laran, ita bele husu ba ita-an: nu’udar Estado, Timor-Leste, nebé hahú moris iha tempo foun ida ne’e, nia iha vocação ruma atu fo influência ba mundo ne’e, liliu iha mundo sikun nebé nia hela ba? Haré ba uma laran, liu husi acção balu nebé ita nia ukun nain sira halao ona iha mundo, ami hanoin Timor-Leste marca ona pontos balu nebé halo mundo admira. Hanoin liliu CAPACIDADE DE RECONCILIAÇÃO NACIONAL, GESTÃO FUNDO PETROLÍFERO NIAN HO NIA CONSELHO NEBÉ COMPOSTO HUSI EIS TITULARES ÓRGÃO SOBERANO SIRA NAÇÃO NIAN, LIDERANÇA IHA G7 PLUS, no ikus-ikus ne’e NEGOCIAÇÃO KONA BA FRONTEIRA MARÍTIMA nebé ema haré hanesan luta entre David no Golias, maibé obriga Golias rona David nia lian, aspirações no direitos. Ne’e sai hanesan pontos balu nebé contribui ona ba ita nia orgulho nudar povo no Estado. Maibé ita precisa hetan causas nacionais nebé motiva ita nia consenso no movimenta ita nia consciência no orgulho nacional. Ita sente hanesan hetan tiha libertação, falta motivação nacional nebé bele fanu no halibur povo no Estado Timor-Leste tuir ideal nacional ida hodi coordena no movimenta dinamismo hot-hotu.

 

  1. Consciência Nacional no Clima Pré-Eleitoral

Atu halao dadaun ita nia eleição ba dala tolu iha rai Timor, hanoin no haré kona ba hahalok ida ne’e, nu’udar tomada de consciência nacional, ami regista ho laran haksolok tebes, evolução nebé acontece iha ita rai. Wainhira ita haré ba kotuk, iha tinan 15 ne’e nia laran, ita hotu sei hanoin tempo susar no tensão nebé ita koko no moris wainhira ita hahú ita nia vida democrática nudar Estado. Hahú kedan 2002 to’o 2008, ita nia experiência democrática hetan dificuldades oi-oin, no dala barak ameaça instabilidade quase tinan-tinan. Ita hotu sei hanoin clima de tensão nebé ita hetan iha eleição 2007. Clima eleitoral iha tempo nebá ita bele dehan clima manas. Eleição 2007 liu tiha, ita continua moris iha situação política no social ida nebé la hakmatek, tan nato’on ne’e ita hotu ladauk hetan biban atu moris cultura política ho diversidade de ideologias e opiniões, ho maturidade emocional. Situação difícil liu maka 2008 wainhira Sr. Presidente da República ho Sr. Primeiro-Ministro hetan atentado. Maibé situação ida ne’e duni maka fanu povo Timor-Leste atu hola consciência kona ba perigo nebé bele kona ita: katak ita halimar resin ho ahi. Maka ahi lakan fila fali iha ita nia rai karik, la iha tan ema ida, liliu comunidade internacional, atu lalin be hodi mai hamete ahi nebé ita rasik maka sunu iha ita nia uma laran nu’udar maun-alin.

Parece contradição, maibé hahú tinan 2008 mai oin, sente hanesan povo Timor-Leste hola consciência kona ba responsabilidade nacional no moris ho maturidade política no emocional. Maturidade ida ne’e duni maka halo katak clima pré-eleitoral 2012 la dun lao ona ho tensão hanesan iha 2005 no 2007; no mós ami regista katak maturidade ida ne’e duni maka fo kbiit atu povo ohin loron bele hatene observa no analisa assunto sira nebé kona ba interesse nacional, no assunto sira nebé kona ba interesse partidário no assuntos ka desentendimentos pessoais. Maibé ohin loron sente hanesan povo hatene tau nia-an iha acontecimento sira nia le’et, biar acontecimento balu bele fo biban atu hamoris emoção maka’as hanesan uluk. Tan ne’e haré ba situação ohin loron, ami sente haksolok, tan ita bele moris iha clima pré-eleitoral ida nebé hakmatek. Contexto ida la moris mesak, maibé sai consequência situação sira uluk nian nebé halo ita aprende hodi halo’os atu hetan dalan nebé diak liu no proveitoso ba ita nia estado. (Matenek nain sira lian Latim nian dehan: “errando discitur”- katak ita aprende ho ita nia hahalok naksalak sira). Husu atu ita mantém nafatin maturidade emocional ida ne’e ho capacidade adulta (néon tasak) iha eleição antecipada nebé atu halao daudaun iha fulan Maio 2018. Se ita consegue aprende ho ita nia hahalok naksalak sira, Parabéns ba ita hotu nia aprendizagem democrática no moris democrático.

  1. Actividade Política nu’udar Vocação

O nosso mundo começa o novo milénio carregado de contradições dum crescimento económico, cultural e tecnológico que oferece a poucos afortunados grandes possibilidades e deixa milhões e milhões de pessoas não só à margem do progresso, mas a braços com condições de vida muito inferiores ao mínimo que é devido à dignidade humana”. (“Novo Millenio IneunteNo Início do Novo Milénio”, no . 50).

João Paulo II iha nia Carta Pastoral ne’e, hakarak bolu atenção ba situação rua. Dala barak desenvolvimento haré liu ba sistema político no financeiro, haré liu ba máquina administrativa no haluhan tiha criatura ema, pessoa humana. Desenvolvimento hotu nebé la considera pessoa humana hanesan objecto principal desenvolvimento nian, desenvolvimento ne’e sai hahalok mamuk ida, hanesan ai sira nebé matak no buras tinan bai-loron, maibé fuan la iha. Atu hatutan S. João Paulo II nia observação, maka ami hakarak halo reflexão balu kona ba actividade política administrativa hanesan vocação ida. Tuir Kreda nia perspectiva no hanorin, wainhira koalia kona ba “vocação”, katak Nai Maromak hato’o nia bolu ba ema ida atu hatán ba situação concreta ida, tan situação ida ne’e husu resposta ida. Wainhira Nai Maromak hatan directamente ba ita nia necessidade ita bolu ne’e milagre. Maibé baibain Nai Maromak hatán ba situação concreta sira liu husi ita ema nia colaboração. Por exemplo, Jesus Cristo atu fo han ema rihun lima precisa labarik ida disponibiliza nia “paun fuan lima no ikan rua”. (Mt. 14, 13-21)

Profeta Isaías no S. Paulo nia liafuan sei mai fo naroman liu tan atu ita ema ida-idak compreende ita nia actividade no responsabilidade sira hotu nu’udar vocação ida: “Israel, ó hau nia atan; husi ó, hau hatudu hau nia glória … então Nia dehan mai hau: laos deit atu sai hau nia atan, atu hafoun hikas fali Jacob nia tribu sira no hatudu dalan ba mate resto sira Israel nian: Hau sei halo ó sai naroman Nação hot-hotu nian, atu hau nia moris rohan laek bele to’o ba rai sikun hot-hotu”. (Is. 49, 3, 6)

… Há diversidade de dons, mas o Espírito é o mesmo; há diversidade de ministérios mas o Senhor é o mesmo. Há diferentes actividades, mas é o mesmo Deus que realiza tudo em todos. A cada um é dada a manifestção do Espírito, em vista do bem de todos.(1a Cor. 12, 4-8)

Ba eleição antecipada tinan 2018, ami hakarak convida mós forças politico-partidárias sira hotu atu haré ba actividade no missão politica hanesan vocação ida. Katak ba sarani ida, nia actividade política bele sai hanesan resposta nebé actor político ida ne’e bele fo ba Maromak nia “chamamento” atu nia bele serbí nia maun-alin sira liu husi dalan política nian. S. João Paulo II iha nia Carta Apostólica “No Início do Novo Milénio” (no 50), convida ema hotu, liliu sarani sira atu hateke ba mundo nebé habo’ot-an ba daudaun ho virtudes, evolução, progresso no desenvolvimento sira hotu, maibé mundo ida nebé parece que haluha tiha pessoa humana. Haluha tiha katak progresso no desenvolvimento sira hotu nia objectivo no finalidade maka serbí ba pessoa humana. Rai ida nia riku soin bo’ot liu no rai ida nia klamar maka nia oan sira rasik, nia cidadão sira. Tan ne’e wainhira ita hakbesik-an daudaun ba campanha eleitoral ami convida responsáveis político sira atu fo atenção ba Estado Timor-Leste nia situação; liliu necessidades sira nebé precisa líderes políticos sira nia intervenção atu halo Timor oan ida-idak nia moris no mós Estado no sociedade nia moris, sai diak liu tan. Quanto mais ita conhece no identifica situação real sira, ita bele hetan liu facilidade atu fo resposta ba situação hirak ne’e duni.

Iha contexto de leitura de situação ne’e, maka ami sugere kaer profeta Isaías nia liafuan hodi compreende Maromak nia diálogo ho vocacionado ida-idak. Iha diálogo ne’e Nai Maromak interpela vocacionado ida-idak de modo directo: “ Ó HAU NIA ATAN; HUSI Ó HAU HATUDU HAU NIA GLÓRIA; HAU SEI HALO Ó SAI NAROMAN NAÇÃO ISRAEL NIAN”. (Is. 49) Convida líderes responsáveis sira hotu atu, iha tempo eleições antecipada nebé mai daudaun, tau ida-idak nia an hanesan “Ó” ida ne’e iha Maromak nia oin, atu rona mos Nai Maromak nia interpelação ba líderes ida-idak no força política sira tomak. Completa ho S. Paulo nia recomendação no exortação: “Buat hotu nebé ita simu, ita simu ba ema hotu nia diak”. (1a Cor. 12, 7)

 

  1. Considerações balu Hanesan Reflexão ba Futuro

Hakarak ka lakohi, período 2018-2023, sai hanesan tempo ida nebé merece ita hotu nia atenção no reflexão. Sei sai tempo mudança, maibé mudança ida ne’e bele halo ho continuidade ou halo ho descontinuidade. Ita tenki halo prevenção atu mudança ne’e halo iha continuidade nia laran hodi evita descontinuidade. To’o oras ne’e ita koalia hela kona ba GERAÇÃO TUAN NO GERAÇÃO FOUN. Ita bele muda naran atu temi GERAÇÃO DOS FUNDADORES E GERAÇÃO DOS CONTINUADORES. Ou então bele hanaran tan GERAÇÃO DOS HISTÓRICOS E GERAÇÃO DOS EMERGENTES. Naran sira ne’e hotu hakarak apresenta situação hanesan. Situação nebé husu ita hotu nia atenção, maka oin sá geração rua ne’e halo continuidade ba malu?

Tempo marca ita hotu nia moris no nunca lao ba kotuk. Natureza humana iha nia regra de evolução no nia regra atu remata nia moris. Iha tempo atu moris, tempo atu bo’ot, atu desenvolve-an, tempo atu moris iha plenitude, no tempo atu lakon força, tempo atu sai husi palco da vida, tempo atu reza deit ona Vésperas da morte, no tempo atu fila ba Nai nia kadunan santo. Haré ba ita nia realidade, liliu ba ita nia modelo de sociedade política, ita nia referência maka geração rua ne’e, ho naran sira hotu nebé temi ona iha kotuk. Tuir lei da Natureza e da Vida, Geração de Fundadores haré loron tun daudaun ona, iha curva loron atu monu. Iha 2023, Geração ida ne’e iha tan tinan lima iha sira nia vida. Geração de Continuadores ka Geração de Emergente, to’o oras ne’e iha dificuldade atu hatudu-an. Maibé iha tempo balu, no tuir Sociedade ida-idak nia moris no tradição cultural, ita precisa ema nebé bele halo consenso iha Sociedade ida. Tan ne’e maka ema hanaran sira líder. Hakarak ka lakohi, tinan lima mai ne’e sai tempo ida importante teb-tebes ba passagem de testemunho ou tempo de transição entre gerações iha ita nia rai Timor-Leste. Ami nia hanoin, período ida ne’e tenki sai hanesan período intermédio ida no tempo atu hamosu actores políticos intermédios. Timor-Leste precisa hamosu figuras, líderes políticos no mós sistemas políticos seluk karik, nebé bele fo continuidade ba futuro wainhira Geração de Fundadores, liliu figuras carismáticas no consensuais nia força hamenos-an ba daudaun. Iha lian Português ita bele dehan katak 2018-2023 sai “PERÍODO CRUCIAL” ba História Timor-Leste no período crucial ba democracia iha ita rain.

Desafio ba Estado, ba Sociedade Timorense, ba Geração de Fundadores no Geração de Emergente, maka oin sá bele assegura passagem de testemunho ida ne’e sem descontinuidade? Sistema político nebé ita usa no tuir to’o oras ne’e facilita ka dificulta passagem de testemunho ida ne’e? Iha contexto ida ne’e ita bele considera mós possibilidade seluk ka lae?

Por exemplo, ita nia sistema democrático iha nia regras rasik kona ba funcionamento, no tenki fiel ba Constituição, maibé bele ka la’e integra elemento balu ita nia cultura local nian de organização social. Hatama côr cultural local iha ita nia sistema de governação. Pelo menos considera hanesan possibilidade de estudo e reflexão. Iha cultura local iha elemento rua nebé merece atenção: Katuas Lia-na’in sira nia fatin iha ita nia sociedade, no consideração ba ema ida-idak nia fatin. Baibain wainhira Katuas Lia-na’in sira koalia foin sa’e sira la foti lia hasoru, maibé ne’e laos katak Katuas Lia-na’in sira iha beibeik razão. Tan modelo de sociedade ida ne’e duni, dala barak Katuas Lia-na’in sira la rona foin sa’e sira nia hanoin, tan considera katak ema nurak sira ladauk iha capacidade atu resolve problema sociedade nian. Ita nia mentalidade maka ne’e duni no dala balu bele condiciona ita nia relacionamento entre gerações, biar iha contexto democrático nia laran. Risco nebé ita bele enfrenta maka ita moris iha democracia formal ida maibé ho mentalidade bei ala sira nian nafatin, biar inconsciente, katak la halo hodi hakarak. História hanorin katak Reino ho Império lubuk ida lakon le’et deit, no Estado lubuk ida moris ain kudeik hela, biar independente kleur ona, tan la prepara passagem de poder entre geração sira: geração de fundadores e geração de continuadores.

Atu remata ami hato’o consideração rua ne’e, laos hanesan proposta maibé hanesan pontos de reflexão.

  1. Oin sá geração rua hanoin atu prepara passagem de testemunho ida ne’e iha tinan lima mai ne’e nia laran? Iha fatin no biban atu integra mós côr cultural local iha sistema democrático nebé mundo tomak tuir ona ka lae? Se bele, ita usa dalan ida nebé?
  2. Bele ka lae halo “Pacto de Regime” ida entre forças Político-Partidárias sira hotu atu mobiliza no concentra energia no força sira hotu durante tempo ida atu lalika fahe no desconcentra atençao no força sira hotu nebé disponível atu serbi Estado ida ne’e, agora no iha futuro? Ita percisa Timor oan hot-hotu nia capacidade atu realiza Estadu ida ne’e nia mehi.

Ikus liu, ami convida Timor oan ida-idak no povo Timor-Leste tomak atu halo buat hotu nebé depende ba ita nia capacidade nu’udar ema; kona ba buat sira nebé ita la iha kbiit atu halo, ita husik iha Na’i Maromak nia liman. Husu ba sarani sira hotu harohan ba Na’i Maromak atu Nia tau matan ba ita nia rai iha tempo eleição Antecipada ida ne’e.

Ho esperança no consideração tomak ami hato’o votos de plano sucesso ba exercício democrático liu husi eleições antecipada nebé ita hotu sei participa.

 

Leave a Reply

Your email address will not be published. Required fields are marked *