shadow
Diocese de Dili > NOTÍCIAS > REFLEXÃO > Leitura no Reflexão

Leitura no Reflexão

ANO B

Primeira Leitura                                                                                    Act. 4, 32-35

Lia housi Livro haktuir Apóstolo sira nia hahalok

Iha loron hirak nebá, ema sira nebé fiar hodi simu Cristo nia doutrina, sira laran ho neon ida de’it, iha sira leet, ida la dehan: ne’e ha’u nian, ne’e ó nian! Ida-idak nia soin, sira hotu-hotu nian. Apóstolo sira, ho kbiit wa’in, fó sai katak Na’i Jesus moris hias duni. Apóstolo sira hotu ema hadomi. Iha sira leet, ema ki’ak la iha, tan maluk sira nebé iha toos ka uman, sira fa’an tiha hotu, hafoin, lori toos no uman folin ba tau iha Apóstolo sira ain. Tuir mai, fahe tuir ida-idak nia susar.

Maromak Futar Lia

 

Salmo Responsorial                                                                                                                                                     Sal. 117 (118), 2-4. 16ab-18, 22-24

Refrão :  Imi hahí Na’i, tan Nia laran di’ak; Nia domin rohan laek!!! Refrão

Ou             Aleluia. Repete-se

 

Israel uman dehan ba:

Nia laran luak nafatin!

Araão uman dehan ba;

Nia laran luak nafatin!

ema sira nebé hamta’uk Na’i, dehan ba:

Nia laran luak nafatin! Refrão

 

Na’i futar liman halo buat foun;

Na’i futar liman foti ha’u.

Ha’u sei la mate, maibé sei moris

hodi hahí buat hirak Na’i halo.

Na’i haterus duni ha’u,

maibé Nia la fó ha’u ba mate. Refrão

 

Fatuk nebé badaen sira hewai

sai fali fatuk uma-sikun.

Buat ne’e Na’i mak halo;

nu’udar buat foun ida ita haré.

Ne’e loron nebé Na’i halo;

ita haksolok iha Nia. Refrão

 

Segunda Leitura                                                                                                                                                                                                        1 Jo. 5, 1-6

Lia housi São João nia surat :

Doben sira: Ema nebé fiar katak Jesus mak Cristo, ema ne’e moris housi Maromak; ema hotu nebé hadomi Ida nebé hahoris, hadomi mós Ida nebé moris housi Nia. Ita hatene katak ita hadomi Maromak oan sira, wainhira ita hadomi Maromak, hodi halo tuir Ninia ukun-fuan; basá, hadomi Maromak katak, moris tuir Ninia ukun-fuan. Ninia ukun-fuan la todan, basá, buat hotu nebé moris housi Maromak, manán mundo. Hodi buat ida de’it mak manán mundo: ita nia fé. Ema nebé mak manán mundo? Laós ida nebé fiar katak Jesus Maromak oan? Nia mak mai housi wé no ran: Nia mak Jesus Cristo; Laós de’it ho wé, maibé wé no ran. Espírito mak fó testemunha, basá Espírito mak lialós.

Maromak Futar Lia

 

Evangelho                                                                                                                                                                                                                Jo. 20, 19-31

Na’i Jesus Cristo nia Evangelho nu’udar São João haktuir

Iha loron nebá, iha loro-kraik, loron uluk semana nian, odamatan uma nebé Apóstolo sira hela ba taka metin lós, tan sira ta’uk Judeu sira. Jesus mosu mai, hamríik iha sira leet, dehan: “Paz hela ho imi!” Dehan tiha nune’e, Jesus hatudu daudaun ba sira, nia liman no sorin kanek. Haré tiha Jesus, Apóstolo sira haksolok teb-tebes. Jesus lia tun teni ba sira: “Paz hela ho imi! Nu’udar Aman Maromak haruka Ha’u mai, nune’e mos Ha’u haruka daudaun imi.” Hotu tiha ne’e, Jesus huu íis ba sira, dehan: “Simu Espírito Santo ba! Sira nebé imi perdua sira salan; sira hetan duni perdua ba sira salan; sira nebé imi la perdua sira salan, sira la hetan duni perdua ba sira salan!” Tomé, sira sanulu resin rua ne’e ida, nebé ema hanaran Dídimo, nia la iha neba, wainhira Jesus mosu. Apóstolo sira seluk hateten ba nia: “Ami haré ona Na’i!” Maibé, Tomé hatán ba sira: “Ha’u la haré karik besi-kusan fatin iha Nia liman, ha’u la hatama karik ha’u liman iha Nia sorin kanek, ha’u sei la fiar!” Liu tiha loron walu, Apóstolo sira halibur-an hamutuk fali iha uma laran. Tomé mos hamutuk iha nebá. Odamatan sei taka metin hela, Jesus mosu mai; Jesus hamríik iha sira leet, dehan: “Paz hela ho imi!” Tuir mai Jesus lia tun ba Tomé: “Hakbesik ó liman-fuan mai, haré Ha’u liman! Hakbesik ó liman, hodi hatama ba Ha’u sorin kanek! Keta laran to’os, maibé, laran mamar atu fiar!” Tomé hasa’e lia ba Jesus, dehan: “Ha’u Na’i, ha’u nia Maromak!” Jesus lia tun teni ba nia: “Ó fiar tan ó haré Ha’u! Rahun di’ak ba sira nebé fiar maski matan la haré!” Iha Apóstolo sira leet, Jesus halo tan milagre oi-oin. Milagre hirak ne’e la hakerek iha livro ida ne’e. Ami hakerek milagre iha livro ne’e atu imi bele fiar katak, Jesus mak Maromak Oan-mane; atu nune’e, hodi imi nia fiar, imi bele hetan mos moris rahun di’ak, tan Jesus naran.

Lia Maksoyn.

 

Hanoin kona ba ó rasik nia fiar:  

Iha Evanjéliu ohin nian, ko’alia kona ba bainhira Jezus mate tiha, disípulu sira sente ta’uk no mes-mesak de’it. Sira subar, ta’uk katak Judas atu bá buka sira. Jezus mosu ba sira; tekitekir Jezus mosu iha sira nia klaran no fó hakmatek/damen ba sira. Bainhira sira haree kona Jezus sira sente haksolok teb-tebes. Tomás la iha nebá ho sira, nia la fiar bainhira disípulu sira konta tuir buat nebé mosu ba sira. Tomás hakarak haree no kona rasik ho liman. Jezus mai fali no hatudu Nia kanek atu Tomás bele fiar.     Tanbá sá ó fiar? Ó fiar saida iha Jesus? Ó muda ó nia fiar iha tinan nia laran? Oinsá mak ó muda? Ó husu ba Maromak atu haboot ó nia fiar?  

 

EVANGELHO – Jo 20,19-31 

Ita kontinua ho parte daruak Evanjellu João nian, iha ne’ebé aprezenta mai ita komunidade Aliansa Foun nian. Indikasaun katak ita iha “loron uluk semana uluk nian”, dala ida tan, halo referénsia ba tempu foun ne’ebé Jezús lori mai ho ninia moris-hi’as, tempu kriasaun foun nian. Komunidade ne’ebé moris husi Jezús nia obra halibur hela iha senákulu, iha Jerusalém. Komunidade ne’e laran-surar no ta’uk, haleu ho funu-balu sira. Sira-nia ta’uk ne’e tanba sira seidauk halo esperiénsia Kristu moris hi’as nian. 

 

MENSAGEN

Testu ne’ebé propoin mai ita fahe ba parte rua lahanesan. Parte dahuluk (vers. 19-23), haktuir Jezús nia “mamosuk”/aparisaun ba dixípulu sira, Haktuir tiha situasaun inseguransa no frajilidade komunidade nian (rai nakukun, odamatan taka metin, ta’uk), autór aprezenta Jezús iha komunidade nia “klaran” (vers. 19b). Hodi mosu “iha sira nia leet”, Jezús asume nu’udar pontu referénsia nian, fatór unidade nian, uvas-hun ne’ebé ho sanak sira. Komunidade haleu Jezús, basá Nia mak sentru no iha Nia mak hotu-hotu ba hemu moris ne’ebé halo sira manán “ta’uk” no mundu nia rai-kunan. Ba komunidade ne’ebé taka an, ho ta’uk, falun an iha nakukun mundu ida ne’ebé rai-kunan, Jezús tranzmite dame ba dala rua (vers. 19 no 21: ne’e mak “shalom” ebraiku, iha sentidu armonia nian, serenidade nian, hakmatek nian, konfiansa nian, moris nakonu nian). Dixípulu sira hori ohin ba oin sei la iha tan razaun atu ta’uk, tanba Jezús manán tiha buat ne’ebé sira ta’uk (mate, opresaun, mundu nia hirus). Hafoin (vers. 20a), Jezús hatudu ninia “identidade”: iha nia liman no iha nia sorin ne’ebé sona borus, ita hetan sinál sira nia domin no saran an nian. Iha sinál domin no saran an nian mak komunidade rekoñese Jezús moris no prezente iha nia leet. Haree “sinál” sira ne’ebé hela metin nafatin iha Jezús, hatudu Jezús nia domin ne’e hela metin nafatin: Nia mak Mesias ne’ebé hadomi no husi nia suli bee no raan ne’ebé harii no habiit komunidade. Tuirmai (vers. 22), Jezús “huu iis” ba dixípulu sira haleu Nia. Verbu uza iha-ne’e mak verbu hanesan ho testu gregu Gn 2,7 (bainhira hateten katak Jezús huu iis ba ema tahu nian, hodi fó ba nia Maromak nia moris). Ho “huu-iis” Gn 2,7 nian, ema sai ema moris; ho “huu-iis” ne’e, Jezús tranzmite ba dixípulu sira moris foun ne’ebé halo sira ema foun. Oras-ne’e, dixípulu sira soi ona Espíritu, Maromak nia moris, atu bele – hanesan Jezús – fó an ho laran-luak ba ema seluk. Espíritu ne’ebé harii no anima komunidade Jezús nian. Iha parte daruak(vers. 24-29), autór aprezenta katekeze ida kona-ba fiar. Oinsá mak ema to’o ba fiar iha Kristu ne’ebé moris hi’as? João hatán: ita bele halo esperiénsia fiar nian iha Kristu moris no moris-hi’as iha komunidade fiar-na’in sira-nian, katak fatin naturál iha-ne’ebé manifesta no naksira Jezús nia domin. Tomé reprezenta sira ne’ebé taka an rasik (iha li’ur) no la interese ba komunidade nia sasin, la haree mós sinál sira moris foun nian ne’ebé hatudu iha komunidade. Envezde integra an no partisipa esperiénsia hanesan, nia buka atu hetan demonstrasaun partikulár Maromak nian. Tomé, ikusmai, halo esperiénsia Kristu moris hi’as nian iha komunidade nia laran. Tanba sá? Tanba iha “Na’i nia loron” nia fila fali ba komunidade. Ne’e mak aluzaun momoos ida ba Domingu, loron ne’ebé komunidade halibur hamutuk atu selebra Eukaristia: iha enkontru ho domin fraternu, ho maun-lain sira nia perdaun, ho Liafuan ne’ebé haklaken, ho paun ne’ebé fahe ba malu, mak deskobre Jezús moris-hi’as. Esperiénsia Tomé nian la’ós eskluziva sasin dahuluk sira-nian; sarani hotu tempu hotu nian bele halo esperiénsia hanesan.  

Leave a Reply

Your email address will not be published. Required fields are marked *