shadow
Diocese de Dili > NOTÍCIAS > LETURA DIÁRIA > Segunda-Feira, da II Semana da Páscoa

Segunda-Feira, da II Semana da Páscoa

ANO B

 

Primeira Leitura                                                                                      Act. 4. 23-31

Lia  housi livro Apóstolo sira nia hahalok

Iha loron hirak neba, Pedro ho João nebé ulu sira judeu nian fó tiha liberdade, sira fila ba hamutuk sira nia maluk hodi hato’o ba sira buat hotu nebé sacerdote ulun sira no katuas sira dehan ba sira. Wainhira maluk sira rona tiha, ho neon no fuan ida de’it, sira hasae lia ba Maromak hodi dehan: “Na’i, Ita mak halo lalehan, rai, tasi no buat hotu nebé moris; Ita mak hato’o Ita lian housi Espírito Santo no housi Ita atan, ami aman David nia ibun: ‘Tansá nação sira hatudu sira loko-an no povo sira halo buat kmanek oi-oin be folin laek? Liurai sira nian mai no ulun sira halibur-an hamutuk hodi hasouru Na’i no nia emar santo.

Tebes duni, Herodes no Pôncio Pilatos halibur-an iha cidade ne’e, ho nação sira gentio nian no povo sira Israel nian hodi hasouru Ita atan Santo, Jesus, ba Ida nebé Ita tau tiha mina ba ulun. Halo tuir lolós tiha duni buat hotu nebé Ita kbiit no Ita hanoin hakotu nanis ona atu hala’o. Oras ne’e, Na’i, tau matan ba sira nia lia todan; haraik tulun ba Ita atan sira atu bele haklaken ho barani tomak Ita futar lia; halolo Ita futar liman atu bele halo isin di’ak; halo milagre no kmanek oi-oin hodi Ita Santo, Jesus, Nia naran’. Wainhira sira harohan hotu tiha, fatin nebé sira hodi halibur malu ne’e nakdoko tiha. Sira hotu hakonu tiha ho Espírito Santo ho aten barani hahu haklaken Maromak nia futar lia.

Maromak Futar Lia.

 

Salmo Responsorial                                                                                                                                                             Sal. 2. 1-3, 4-6,7-9 (R. cf. 12d)

Refrão : Rahun di’ak ba sira nebé tau neon iha Na’i!!! Repete-se

Ou            Aleluia!!! Repete-se

 

Tansá nação sira hamriik?

Tansá povo sira be folin laek buka dalan?

Liurai sira rai nian habelun malu,

Liurai oan sira buka atu oho Na’i no Nia emar santo;

“Ami sei harahun Nia kadeia sira,

Ami sei liki Nia ukun!”. Refrão

 

Maibé Ida be hôrik iha Lalehan ne’e

Hamnasa hela; Na’I halo sira folin laek.

Loron ida sei halo ba sira ho laran hirus,

Sei hakoi sira ho Nia laran manas wa’in.

Na’i sei dehan “Ha’u mak harí tiha Ha’u liurai iha

Ha’u foho santo Sião nia leten”. Refrão

 

Ha’u haklaken Na’i nia lia hakotu.

Nia dehan mai ha’u “Ó mak Ha’u Oan,

Ohin Ha’u halo moris Ó!

Ó husu mai Ha’u, Ha’u sei fó ba Ó

Nação sira hanesan riku-soi,

Hodi ukun to’o rai nia rohan.

Ó sei ukun sira ho ai-tonka besi nian;

Ó sei hafera sira hanesan vaso tahu nian ida”. Refrão

 

Aclamação                                                                                                                                                                                                                       Col. 3. 1

Refrão : Aleluia, Aleluia!!! Repete-se

                  Imi moris hi’as ona ho Cristo; imi sei tau matan de’it ba sasan iha

                  Lalehan iha nebé Cristo tur iha Aman Maromak Nia sorin kuana. Refrão

 

Evangelho                                                                                                                                                                                                                      Jo. 3. 1-8

+ Na’i Jesus Cristo nia Evangelho nu’udar São João haktuir

Iha tempo neba, iha fariseu sira leet, iha ema ida naran Nicodemos, judeu sira nia boot ida. Nia ba hasouru Jesus iha kalan hodi dehan: “Rabi, ami hatene katak ó mai housi Maromak nu’udar mestre, basá ema ida la bele halo sinal hirak nebé ó halo, Maromak la hela ho nia karik”. Jesus hatan ba nia: “Tebes, tebes duni, Ha’u dehan ba ó: ema nebé la moris fali, nia la bele haré Maromak Nia reino”. Nicodemos husu ba Jesus: “Oinsá mak ema katuas ida bele moris fali? Bele tama hikas fali iha nia inan nia knotak hodi moris fali?” Jesus hatan ba Nia: “Tebes, tebes duni Ha’u dehan ba ó: ema nebé la moris housi wé no Espírito Santo, nia la bele tama iha Maromak nia reino. Buat nebé moris housi isin nian ne’e isin no buat nebé moris housi espírito nian ne’e espírito. Ó keta hakfodak tan ha’u dehan ba ó: imi tenki moris fali. Anin huu housi fatin nebé nia hakarak, ó rona nia lian; maibé ó la hatene nia mai housi nebé no mós la hatene atu ba nebé. Nune’e mós ba ida nebé moris housi Espírito”.

Lia maksoyn.

Leave a Reply

Your email address will not be published. Required fields are marked *