shadow
Diocese de Dili > NOTÍCIAS > LETURA DIÁRIA > Segunda-Feira da Oitava da Páscoa

Segunda-Feira da Oitava da Páscoa

ANO B

 

Primeira Leitura                                                                                 Act. 2. 14, 22-33

Lia  housi livro Apóstolo sira nia hahalok

Iha loron Pentecostes, Pedro hamriik ho Apóstolo sanulu resin ida, foti lian, hateten ba povo: “Israel sira, rona lia hirak ne’e: Maromak tau Jesus Nazaré iha imi leet hodi halo kmanek no ksolok oi-oin; kmanek nebé hodi Nia, Maromak halo ba imi, nu’udar imi hatene. Sarn tiha ba mate, tuir lia hakerek nanis no Maromak Nia hakarak; imi oho Nia; ema áat sira hedi Nia ba cruz. Maromak halo Nia moris hi’as; hasai Nia housi susar matebian sira tan mate la bele ukun Nia. Nune’e, David dehan kona ba Nia: ‘Ha’u haré nafatin Maromak iha ha’u oin; Nia hela iha ha’u nia kuanan atu ha’u keta hetan susar. Tan ne’e, ha’u klamar haksolok, ha’u ibun hananu ho ksolok, ha’u isin hein ho laran metin. Keta husik ha’u hela iha matebian sira fatin; keta halo Ita Nia Santo hetan áat ba isin. Ita hanourin dalan moris mai ha’u; Ita sei halo ha’u haksolok nafatin iha Ita nia futar oin’.

Maun-alin sira, husik atu ha’u ho laran mós tebes ko’alia ba imi kona ba patriarca David; Nia mate, ema hakoi nia; nia rate iha imi leet to’o ohin loron. Maibé, nu’udar profeta, nia hatene katak Maromak hakotu ba nia ho juramento atu housi nia oan sira ne’e, ida sei tur iha nia trono; nia haré nanis ona hodi haklaken tiha Messias nia moris hi’as; Nia la husik atu Nia isin hetan áat eh dodok.

Jesus ida ne’e mak Maromak halo moris hi’as, ami mak sasin kona ba buat ne’e. Foti tiha iha Maromak nia sorin kuana, Nia simu Espírito Santo housi Aman tuir promessa no fakar tiha Nia nu’udar imi haré no rona”. 

Maromak Futar Lia.

 

Salmo Responsorial                                                                                                                                                        Sal. 15(16). 5, 8, 9-10, 11 (R. 1ª)

Refrão : Na’i, tahan ha’u tan Ita ha’u heli-an-fatin. Repete-se

Ou           Aleluia!

 

Na’i, Ita ha’u nia liman-rohan no cálice,

Ha’u nia moris iha Ita futar liman.

Na’i iha nafatin ha’u matan nia oin,

Nia iha ha’u sorin kuana, ha’u sei la monu. Refrão

 

Tan ne’e, ha’u fuan haksolok,

Ha’u klamar hananu ho ksolok boot,

Ha’u isin toba hakmatek.

Tan Ita sei la saran ha’u ba hôrik fatin mate nian,

Sei la husik Nia atan nia isin dodok. Refrão

 

Na’i, hatudu dalan moris nian mai ha’u,

Haraik ksolok boot iha Ita futar oin,

Iha Ita sorin kuana, haksolok ba nafatin. Refrão

 

Aclamação                                                                                                                                                                                                      Sal. 117(118). 24

Refrão : Aleluia, Aleluia!!! Repete-se

                  Ida ne’e mak loron be Na’i halo;

                  Ita haksolok hananu iha loron ne’e. Refrão

 

Evangelho                                                                                                                                                                                                               Mt. 28. 8-15

+ Na’i Jesus Cristo nia Evangelho nu’udar São Mateus haktuir

Iha tempo nebá, feto sira husik kedas rate; ho laran ta’uk no ksolok boot, sira halai atu fo hatene ba escolante sira.

Teki-tekir Jesus mai hasouru sira dehan: “Haksolok bá!” Sira hakbesik, hakoak Nia ain hodi adora Nia. Jesus dehan ba sira: “Keta ta’uk; ba dehan ba Ha’u nia maun-alin sira atu ba Galileia; iha nebá sira sei haré Ha’u”.

Wainhira sira la’o ona, guarda balun ba cidade laran hodi fó hatene ba amlulik boot sira buat hotu nebé mosu. Sira ne’e halibur hamutuk ho katuas sira. Hafoin, sira lia tuir malu hotu tiha, sira fó osan mutin barak ba soldadu sira hodi dehan: “Imidehan katak Nia escolante sira mai iha kalan hodi na’uk Nia wainhira ami toba dau-daun. Emboot rona karik buat ne’e, ami sei ko’alia ho nia atu imi la bele hetan susar.” Simu tiha osan mutin, sira halo tuir nu’udar ema hanourin sira. Lia ne’e la’o iha judeu sira leet to’o ohin loron.

Lia maksoyn.

Leave a Reply

Your email address will not be published. Required fields are marked *