shadow
Diocese de Dili > NOTÍCIAS > LETURA DIÁRIA > Sexta-Feira da Oitava da Páscoa

Sexta-Feira da Oitava da Páscoa

ANO B

 

Primeira Leitura                                                                                     Act. 5. 34-42

Lia  housi livro Apóstolo sira nia hahalok

Iha loron hirak neba, membro ida iha Sinédio, ema fariseu ida naran Gamaliel, doutor lei nian, nebé povo tomak hamta’uk, hamriik hodi haruka hasai Apóstolo sira iha tempo ruma nia laran. Hafoin nia hateten ba ulun sira judeu nian: “Ema Israel sira, imi neon moris ba ho buat nebé imi hakarak atu halo kona ba ema hirak ne’e. Iha tempo uluk nian, mosu ema ida naran Teudas, nebé hahi-an hodi hateten katak nia mós ema ida be naran boot; ema besik atus háat mak tuir nia. Tuir mai, ema oho nia no sira hotu nebé tuir nia halai namkari no mate mohu. Tuir ida ne’e, iha tempo arolamento nian, mosu fali Judas, ema Galileu nebé lori povo tomak tuir nia. Nia mós mate no nia maluk sira hotu halai namkari. Oras ne’e ha’u fó lia meno ida ba imi: Imi keta bosok ema sira ne’e! Basá buat nebé sira hala’o mai housi ema karik, sei lakon mohu. Maibé, mai housi Maromak karik, imi keta halo áat ba sira, atu nune’e, imi la bele funu hasouru Maromak!” Sira simu hodi halo tuir doutor Gamaliel nia lia meno. Sira bolu Apóstolo sira mai iha sira oin; haruka baku tiha sira, hateten ba sira atu la bele haklaken tan hodi Jesus nia naran; hafoin, fó liberdade ba sira. Sira sai housi assembleia ho ksolok boot basá sira simu terus tan Jesus. Lor-loron iha templo, iha uma-uma, sira la descansa hodi hanourin Lia-Foun, be simu housi Jesus, Messias.

Maromak Futar Lia.

 

Salmo Responsorial                                                                                                                                                   Sal. 26(27). 1, 4, 13-14, (R. cf. 4ab)

Refrão : Buat ida de’it ha’u husu ba Na’i, Atu ha’u hôrik iha Nia kadunan!!! Repete-se

Ou            Aleluia!

 

Na’i Maromak, ha’u maksoyn;

Ha’u ta’uk fali sé?

Na’i tahan ha’u moris;

Sé bele halo ha’u nakdedar? Refrão

 

Buat ida de’it ha’u buka, ha’u husu ba Na’i

Iha ha’u nia moris tomak;

Hôrik iha Nia Kadunan;

Hodi haksolok ho Na’i nia tulun,

No fihir Nia Templo! Refrão

 

Ha’u hein atu haré Na’i nia laran-luak

Iha ema moris sira rain.

Aten barani! Laran metin iha Na’i,

Habuis an ba! Hein Maromak! Refrão

 

Aclamação                                                                                                                                                                                                                    Mt. 4. 4b

Refrão : Aleluia, Aleluia!!! Repete-se

                  Ema la moris de’it ho aihan, maibé ho liafuan sira nebé

                  Sai housi Maromak futar ibun. Refrão

 

Evangelho                                                                                                                                                                                                                   Jo. 6. 1-15

+ Na’i Jesus Cristo nia Evangelho nu’udar São João haktuir :

Iha tempo hirak neba, Jesus liu tiha ba tasi Galileia, katak tasi Tiberiades nia sorin balu ba. Ema lubun boot tuir Nia, tan sira haré milagre hirak Jesus halo ba ema moras. Jesus sa’e tiha ba foho leten hodi tur hamutuk ho Nia escolante sira iha neba. Pascoa, katak Judeu sira nia festa, besik dadaun ona.

Jesus haré katak ema lubun boot mai hasouru Nia, Nia lia tun ba Filipe, hodi dehan: “Ita sei sosa lós pão iha nebé hodi fó han ema sira ne’e?” Jesus ko’alia nune’e, atu koko nia, basá Nia hatene tiha ona atu halo sá. Filipe hatan, dehan: “Pão osan atus rua nia mós sei la to’o atu bele ida-idak simu baluk oan ida”. Andre, Simão Pedro nia alin, hateten ba Jesus: “Iha ne’e, labarik oan ida iha pão cevada fuan lima ho ikan kiikoan rua. Maibe, ne’e to’o oinsá ba ema sira ne’e hotu”. Jesus lia tun dehan: “Haruka ema sira ne’e tur tiha hotu”. Iha fatin neba du’ut barak. Ema sira tu’ur tiha hotu; mane de’it sura to’o besik rihun lima. Jesus káer tiha pão hirak ne’e, fó agreadece Maromak, hodi fahe ba ema sira. Ikan mos Jesus halo hanesan ne’e. Ema sira hotu han to’o bosu. Hafoin Jesus lia tun ba escolante sira: “Imi ba halibur baluk oan sira hotu be han la hotu, atu keta lakon rohan oan ida”. Escolante sira halibur duni pão cevada fuan lima nia rohan-rohan sira be ema han la hotu, hodi tau hamutuk ba luhu sanulu resin rua. Haré milagre nebe Jesus halo, ema hateten ba malu: “Tebes! Ida ne’e mak Profeta nebe atu mai iha mundo”. Maibe, Jesus hatene katak sira atu mai hola Nia hodi foti ba Liurai, Nia hadook-An mesa-mesak fali ba foho.

Lia maksoyn.

Leave a Reply

Your email address will not be published. Required fields are marked *