shadow
Diocese de Dili > NOTÍCIAS > LETURA DIÁRIA > III Domingo da Páscoa

III Domingo da Páscoa

ANO B

 

Primeira Leitura                                                                             Act. 3, 13-15. 17-19

Lia housi Livro haktuir Apóstolo sira nia hahalok :

Iha loron hirak nebá, Pedro lia tun ba povo, dehan: “Abraão, Isaac no Jacob sira nia Maromak, ita nia bei-ala sira nia Maromak, hahí tiha ona Nia atan Jesus. Jesus nebé imi saran ba mate, ida be imi hakribit iha Pilatos oin, maski Pilatos hakarak husik tiha Nia. Imi hakribit tiha ema santo, ema di’ak tebes; imi fó tiha perdua ba ema liman mean ida, imi fó mate ba Ema moris na’in lós. Maibé, Na’i Maromak halo Nia moris hias tiha ona, sai ona housi mate sira leet. Ami rasik mak sasin ida ne’e ba imi. Maun-alin sira: oras ne’e ha’u hatene katak, imi halo ida ne’e tan imi beik; imi na’i-ulun sira mos hanesan. Nune’e mak Maromak halo, sai tuir lia nebé, houri uluk kedas profeta sira hotu fó sai, katak, Maromak nia Maksoyn sei hetan terus. Ne’e duni, hakribit ho laran moras imi salan, fila imi neon ba Maromak, atu imi bele hetan perdua ba imi salan”.

Maromak Futar Lia

 

Salmo Responsorial                                                                                                                                                                                        Sal. 4, 2. 4. 7. 9

Refrão :     Na’i, hatudu Ita oin naroman mai ami! Refrão

Ou                Aleluia. Repete-se

 

Maromak ha’u kbiit, rona ha’u,

wainhira ha’u harohan;

Ita be soy ha’u housi susar laran,

rona ho laran luak ha’u oração. Refrão

 

Imi hatene katak Na’i

halo buat foun mai ha’u,

Nia rona ha’u,

wainhira ha’u bolu. Refrão

 

Ema balu dehan: “Ema sê fó ksolok ita?”

Hatudu Ita oin naroman mai ami! Refrão

 

Ha’u latan, ha’u toba hakmatek.

Na’i, Ita Boot mesak

bele halo ha’u moris hakmatek. Refrão

 

Segunda Leitura                                                                                                                                                                                                      1 Jo. 2, 1-5a

Lia housi São João nia surat :

Oan doben sira: Ha’u hakerek surat ida ne’e atu imi keta sala. Maibé, ema ruma sala karik, ita iha Ema ida atu tulun ita iha Aman Maromak futar oin: Ema ne’e mak Jesus Cristo, Ema Santo tebes. Jesus Cristo mak mate tan ita nia salan. Nia la mate ba ita nia salan de’it, maibé, Nia mate ba ema tomak nia salan. Atu ita bele hatene katak, ita hatene Nia, lolós ita tuir nia Ukun-fuan. Ema ruma dehan karik: “Ha’u hatene Nia!” Maibé, la moris tuir nia Ukun-fuan, ema ne’e bosok-ten, lia lós la iha, iha nia. Maibé, ema nebé moris tuir Ninia hanourin, Maromak nia domin mosu lolós iha ema ne’e.

Maromak Futar Lia.

 

Aclamação                                                                                                                                                                                                                   Lc. 24, 32

Refrão : Aleluia, Aleluia!!! Repete-se

                  Na’i Jesus, loke livro santo mai ami;

                  Hatún lia mai ami hodi hamanas ami fuan. Refrão

 

Evagenlho                                                                                                                                                                                                               Lc. 24, 35-48

+ Na’i Jesus Cristo nia Evangelho nu’udar São Lucas haktuir :

Iha tempo nebá, Jesus nia Escolante na’in rua nebé ba knua Emaús, haktuir sai ba maluk sira, buat hotu nebé mosu iha dalan ba Emaús; sira na’in rua haktuir mos, oin sá mak sira matan nakloke atu hatene Jesus, wainhira Jesus silu fahe pão. Sira sei ko’alia hela , Jesus mosu iha sira leet hodi dehan: “Dame hela ho imi!” Sira hakfodak no ta’uk; sira hanoin katak, sira haré rai-na’in ruma. Jesus lia tun ba sira dehan: “Tan sá imi fuan taridu? Tan sá imi hanoin nune’e iha imi laran? Imi haré Ha’u liman no Ha’u ain ba:  Ha’u duni mak ne’e! Imi bele kaer Ha’u isin ba! Imi hatene katak mate-klamar isin no ruin la iha. Maibé, Ha’u lae. Ha’u iha isin no ruin!” Hafoin Jesus hatudu ba sira, nia liman no ain. Tan sira haksolok boot, no tan sira sei hakfodak hela, sira la fiar ida. Jesus husu ba sira: “Imi iha buat ruma atu han?” Sira fó ba Jesus ikan tunu baluk ida; Jesus simu daudaun hodi han iha sira oin. Hafoin, Jesus lia tun ba sira, dehan: “Uluk, wainhira Ha’u sei iha imi leet, Ha’u dehan ba imi, lia-fuan hirak ne’e: Lia hotu nebé Moisés, Profeta no Salmista sira hakerek kona ba Ha’u, sei sai tuir duni sira hakerek.” Nune’e, Jesus loke sira neon atu hatene lia Escritura. Jesus lia tun teni ba sira, dehan: “Tan ne’e mak ema hakerek tiha ona, katak: Messias sei hetan terus, sei moris hias, liu de’it loron tolu. Tan ne’e, ema hakerek tiha ona katak: hodi Nia ran, hahú housi Jerusalém, ema sei fó hatene ba rai-rai katak, hotu-hotu sei fila ba di’ak! Maromak sei fó perdua nafatin ba salan! Imi mak sei sasin lia hirak ne’e hotu!”

Lia Maksoyn.

Leave a Reply

Your email address will not be published. Required fields are marked *