shadow
Diocese de Dili > NOTÍCIAS > LETURA DIÁRIA > Sexta-Feira, III Semana da Páscoa

Sexta-Feira, III Semana da Páscoa

ANO B

 

Primeira Leitura                                                                                     Act. 9. 1-20

Lia housi Livro Apóstolo sira nia hahalok

Iha loron hira neba, Saulo hanoin nafatin atu oho Na’i nia escolante sira. Nia ba hasouru sacerdote boot hodi husu surat atu ba sinagoga iha Damasco. Iha neba nia hetan karik feto eh mane, nia sei káer no futu metin hodi lori ba Jerusalém.

Tuir dalan, wainhira besik ona Damasco, naroman boot ida housi lalehan mai lakan hale’u tiha nia. Nia monu ba rai no rona lian ida be dehan: “Saulo, Saulo, tansá halo áat mai Ha’u?” Nia hatan: “Na’i, Ita sé lós?” Na’i hatan ba nia dehan: “Ha’u mak Jesus nebé ó hakarak halo áat. Maibé ó hamriik ba hodi tama iha cidade; iha neba, ema sei dehan ba ó sá mak ó sei halo”. Saulo nia maluk sira hamriik, ibun to’os, rona liafuan, maibé la haré hetan buat ida. Saulo hamriik housi rai, maski ho matan nakloke, la haré buat ida. Sira káer nia liman hodi lori nia tama iha Damasco. Iha loron tolu nia laran, Saulo la haré, la han no la hemu buat ida.

Iha Damasco, iha hela escolante ida naran Ananias, nebé iha nia mehi Na’i dehan ba nia: “Ananias!” Nia hatan ba Na’i: “Na’i, ha’u mak ne’e”. Na’i lia tun teni ba nia: “Ó ba iha luron naran Direita; buka iha Judas nia uma, ema ida naran Saulo housi Tarso mai, nebé oras ne’e nia harohan daudaun hela”. Iha oras ne’e kedas, Saulo haré hanesan iha mehi, ema ida naran Ananias, nebé tau liman iha nia atu nia bele haré fali.

Ananias hatan ba Na’i: “Na’i, ema barak hateten mai ha’u, katak, ema ne’e halo ona buat áat oi-oin hasouru Ita Nia sarani sira iha Jerusalém. Nia hodi força housi na’ilulik boot sira atu káer hodi fó castigo ema hotu nebé haklaken Na’i nia naran”. Na’i lia tun fali ba nia, dehan: “Ó ba, basá ema ne’e hanesan mata-dalan nebé Ha’u fihir atu lori Ha’u Nia naran ba ema gentio sira, ba liurai sira no Israel nia oan sira. Ha’u sei hatudu ba nia oinsá nia sei terus tan Ha’u Nia naran”. Nune’e, Ananias ba, tama iha uma, tau liman iha Saulo hodi dehan: “Saulo, ha’u maun, Na’i Jesus nebé mosu ba ó iha dalan wainhira ómai, Nia haruka ha’u atu halo ó haré fali no Espírito Santo sei nakonu iha ó”. Tekir-tekir, hanesan ikan kulit ida monu sai housi Saulo nia matan no nia haré fali kedas. Hafoin, nia hamriik, simu baptismo, hahu han no hetan hi’as fali kbiit iha nia isin.

Saulo hela ho Na’i nia escolante sira iha Damasco iha loron balu nia laran no hahu kedas haklaken iha sinagoga sira, hodi hanourin katak, Jesus ne’e, Na’i Maromak Nia Oan.

Maromak Futar Lia.

 

Salmo Responsorial                                                                                                                                                        Sal. 116(117). 1, 2 (R. Mc. 16. 15)

Refrão : Imi ba mundo tomak hodi haklaken Evangelho!!! Repete-se

Ou            Aleluia!

 

Nação rai-klaran tomak hahi Na’i!

Povo tomak rai-klaran hawélok Na’i! Refrão

 

Nia domin ba ita, boot tebes;

Nia domin hela metin ba nafatin! Refrão

 

Aclamação                                                                                                                                                                                                                       Jo. 6. 56

Refrão : Aleluia, Aleluia!!! Repete-se

                  Na’i lia tun, “Sé han Ha’u Isin, hemu Ha’u Ran,

                  Nia Hôrik ho Ha’u, Ha’u ho nia!”. Refrão

 

Evangelho                                                                                                                                                                                                                  Jo. 6. 52-59

+ Na’i Jesus Cristo Nia Evangelho nudar São João haktuir

Iha tempo neba, ema judeu sira hahu haksesuk malu, dehan: “Oinsá Jesus bele fó Nia Isin ita atu han?” Jesus lia tun ba sira dehan: “Ha’u dehan tebes ba imi: imi la han karik Mane Maksoyn Nia Isin, imi la hemu karik Nia Ran, imi sei la hetan moris. Ema nebé han Ha’u Nia Isin no hemu Ha’u Nia Ran, nia hetan moris rohan laek. Ha’u sei halo nia moris hi’as duni iha loron ikus.

Basá, Ha’u Isin Ai-han tebes ida; Ha’u Ran tua tebes ida. Sé han Ha’u Isin, hemu Ha’u Ran, nia hôrik ho Ha’u, Ha’u ho nia. Nu’udar Ha’u Aman, Moris Hun, haruka Ha’u mai, Ha’u moris tanba Ha’u Aman; nune’e mós, ema nebé han Ha’u, nia sei moris tanba Ha’u. Ida ne’e mak Ai-han tun housi Lalehan Ai-han ne’e la hanesan ida nebé imi nia aman sira han, hafoin mate hotu. Ema nebé han Ai-han ida ne’e, nia sei moris nafatin”. Lia hirak ne’e Jesus fó hatene sai ba sira, wainhira Nia hanourin hela sira iha sinagoga Cafarnaum nian.

Lia Maksoyn.

Leave a Reply

Your email address will not be published. Required fields are marked *