shadow
Diocese de Dili > NOTÍCIAS > LETURA DIÁRIA > Sábado, III Semana da Páscoa

Sábado, III Semana da Páscoa

ANO B

 

Primeira Leitura                                                                                   Act. 9. 31-42

Lia  housi livro Apóstolo sira nia hahalok

Iha loron hirak neba, Kreda  iha rai Judeia, Galileia no Samaria hetan ksolok wa’in no dame no halekar di’ak lós ho Espírito Santo Nia tulun.

Pedro nebé la’o ona rai barak tun ba hamutuk sarani sira nebé hela iha rai Lida. Iha neba, nia hetan ema moras, mane ida, nebé latan hela iha nia toba-fatin iha ona tinan ualu nia laran, be naran Eneias. Nia ema paralítico ida. Pedro dehan ba nia “Eneias, Na’i Jesus Cristo hakarak fó isin ba ó! Hamriik ba no hadi’a ó nia toba-fatin”. Eneias hetan kedas isin di’ak hodi hamriik kedas. Ema hot-hotu housi rai Lida no rai Saron nian haré buat foun ne’e; sira hotu fiar kedas Na’i Jesus.

Iha rai Jope, iha feto fiar na’in ida be hanaran Tabitá, nebé dehan katak ‘Gazela’. Nia sarani di’ak tan halo caridade. Iha loron hirak ne’e, nia hetan moras nebé halo nia mate kedas. Hamos tiha mate ne’e nia isin, sira tau nia iha sala ida be iha leten. Tan Lida besik rai Jope, escolante sira hatene katak Pedro iha neba. Sira haruka ema na’in rua ba bolu Pedro hodi hameno nune’e: “Mail lalais iha ami, keta demora”.

Pedro ba kedas wainhira to’o iha neba, sira lori liu nia ba iha sala áas. Sira haruka feto faluk sira mai hotu iha nia oin, nebé tanis no hatudu ba Pedro hena hatais sira oi-oin nebé Tabitá halo ba sira, wainhira nia sei moris no hela iha sira leet. Pedro haruka ema hot-hotu sai ba liur. Hafoin, nia hakneak hodi reza. Tuir mai, nia fila ba mate nia isin hodi dehan: “Tabitá, ó hamriik ba!” Tabitá loke matan, haré heta Pedro; nia tur tiha. Pedro káer iha nia liman hodi halo nia hamriik. Pedro bolu sarani no feto faluk sira hodi hatudu ba sira katak Tabitá moris fali ona. Buat foun ne’e la’o namkari tiha iha cidade Jope tomak, no ema wa’in fiar iha Na’i.

Maromak Futar Lia.

 

Salmo Responsorial                                                                                                                                     Sal. 115(116). 12-13, 14-15, 16-17 (R. cf. 12)

Refrão : Rahun di’ak ba Na’i, tan buat hotu nebé halo mai ha’u!!! Repete-se

Ou           Aleluia!

 

Oinsá ha’u sei agradece Na’i

Ba buat hotu nebé halo mai ha’u?

Ha’u sei foti kális Maksoyn,

Hodi harohan ba Na’i. Refrão

 

Ha’u sei halo tuir lolós ha’u lia hakotu

Iha Nia povo nia oin.

Iha folin liu ba Na’i nia futar matan,

Nia belun sira nia mate. Refrão

 

Na’i, Ita halo rahun korenti kadeia nian ba ha’u,

Ita atan, Ita atan feto nia oan.

Ha’u sei hasa’e sacrificio agradece nian

Hodi harohan ba Ita naran. Refrão

 

Aclamação                                                                                                                                                                                                            Jo. 6. 63c, 68c

Refrão : Aleluia, Aleluia!!! Repete-se

                  Na’i, Ita nia futar liafuan mak espírito no moris.

                  Ita mak iha liafuan moris rohan laek nian. Refrão

 

Evangelho                                                                                                                                                                                                                  Jo. 6. 60-69

+ Na’i Jesus Cristo nia Evangelho nu’udar São João haktuir

Iha tempo neba, wainhira sira rona tiha Jesus hateten: “Ha’u Nia isin aihan tebes, Ha’u Nia ran buat hemu tebes”, escolante barak dehan: “Liafuan hirak ne’e tós teb-tebes. Sé lós mak bele rona?” Jesus hatene tiha iha Nia laran katak Nia escolante sira hamúu kona ba ne’e, Nia lia tun ba sira: “Liafuan hirak ne’e la monu ba imi laran? Imi haré karik Mane Maksoyn sa’e ba fatin nebé uluk Nia hôrik ba, sei nu’u sá lós?” Espírito mak halo moris; isin la bele buat ida. Liafuan hirak nebé Ha’u dehan ba imi ne’e, liafuan klamar no moris nian.

Maibé, imi balu la fiar.” Tebes, houri uluk kedas Jesus hatene ema sé-sé mak la fiar; mós ema nebé mak atu saran Nia ba mate. Hafoin, Jesus hateten tan: “Tanba ne’e mak Ha’u dehan: Ema ida la bele mai Ha’u, Ha’u aman la dada karik nia”. Iha oras ne’e kedas Jesus nia escolante barak hadook-an tiha, la kohi la’o tan ona ho Nia. Tan ne’e, Jesus lia tun ba sira na’in sanulu resin rua: “Imi mós hakarak ba ona?” Simão Pedro hatan ba Nia: “Na’i, ami atu ba lós sé? Ita mak iha liafuan moris rohan laek nian! Ami fiar, ami hatene katak Ita mak Maromak Nia Santo:.

Lia maksoyn.

Leave a Reply

Your email address will not be published. Required fields are marked *