shadow
Diocese de Dili > NOTÍCIAS > LETURA DIÁRIA > Terça-Feira, IV Semana da Páscoa

Terça-Feira, IV Semana da Páscoa

ANO B

 

Primeira Leitura                                                                                    Act. 11. 19-26

Lia  housi livro Apóstolo sira nia hahalok

Iha loron hirak neba, maun-alin sira nebé halai namkari tan hahalok nebé ema áat sira halo ba Estêvão, sira ba to’o iha Fenícia, Chipre no Antioquia. Sira la haklaken Na’i Maromak Nia liafuan ba ema seluk, se la’e, ba judeu sira de’it. Maibé, iha ema balu nebé housi Chipre no Cirene, wainhira sira to’o iha Antioquia, sira haklaken mós Na’i Jesus Cristo Nia doutrina ba grego sira. Maromak Nia kbiit no Nia tulun la’o hamutuk nafatin ho sira, nune’e ema wa’in liu mós mak simu fiar, hodi tuir Na’i nia dalan.

Buat di’ak hirak ne’e hotu, la kle’ur de’it, to’o iha Kreda nia tilun iha Jerusalém. Nune’e housi Jerusalém haruka Barnabé ba Antioquia. Wainhira nia to’o, nia haré Na’i Maromak nia kmanek nebé halo iha neba. Ho ksolok wa’in, nia hanourin sira hotu fiar iha Na’i ho fuan no laran tomak. Tan Bernabé ema ida nebé di’ak teb-tebes no Espírito Santo hakonu iha nia, nia iha fiar maka’as. Ema wa’in lós mak tuir Na’i nia doutrina.

Barnabé ba iha Tarso, buka Saulo, hetan tiha no lori nia ba Antioquia. Sira hela hamutuk iha Kreda ne’e iha tinan ida nia laran; Sira hanourin ema wa’in tebes. Iha Antioquia mak fó ba dala uluk, naran “Sarani”, ba escolante sira.

Maromak Futar Lia.

 

Salmo Responsorial                                                                                                                                           Sal. 86(87). 1-3, 4-5, 6-7 (R. Sal. 116. 1ª)

Refrão : Ema hotu hahi Na’i ba!!! Repete-se

Ou            Aleluia!

 

Na’i hadomi cidade be hari iha foho santo;

Nia hakarak tebes Sião nia odamatan

Liu fali Jacob nia uma sira.

Ne’e mak hahalok kmanek ida ba ó,

Maromak Nia cidade. Refrão

 

Ha’u sei conta Egypto no Babilónia

Iha sira leet be hatene Ha’u;

Filistea, Tiro no Etiópia mesak ó nia oan hotu.

Sira sei hanaran Sião, inan basá sira hotu moris iha neba;

Na’i be Áas liu mak hari tiha. Refrão

 

Na’i sei hakerek iha povo nia livro;

“Ne’e mak Ha’u oan sira, sira moris iha neba”.

Iha ksolok nia laran, sira hotu sei halo iha ó

Sira hôrik fatin. Refrão

 

Aclamação                                                                                                                                                                                                                    Jo. 10. 27

Refrão : Aleluia, Aleluia!!! Repete-se

                  Na’i lia tun: “Ha’u Nia bibi sira rona ha’u lian;

                  Ha’u hatene sira, sira mai tuir Ha’u”. Refrão

 

Evangelho                                                                                                                                                                                                               Jo. 10. 22-30

+ Na’i Jesus Cristo nia Evangelho nu’udar São João haktuir

Iha tempo neba, iha Jerusalém hala’o festa Dedicação nian. Iha tempo udan, Jesus la’o hela iha templo nia laran no iha odamatan boot Salomão nian. Nune’e, judeu sira hale’u tiha Jesus hodi husu ba Nia: “Ó sei halo ami moris ho neon namlele to’o wainhira lós? Ó mak Messias karik, ne’e sá, dehan lós ona mai ami”!

Jesus hatan ba sira: “Ha’u dehan ona ba imi, maibé imi la fiar! Buat hotu nebé Ha’u halo hodi Ha’u Aman Nia naran mak fó sasin ba Ha’u. imi la fiar iha Ha’u tanba imi la mai housi Ha’u bibi sira. Ha’u Nia bibi sira rona ha’u lian; Ha’u hatene sira, sira mai tuir Ha’u. Ha’u fó ba sira moris rohan laek. Sira sei la mate; ema ida sei la bele hasai sira housi Ha’u liman. Ha’u Nia Aman, Ida be haraik sira mai Ha’u, Nia mak boot liu hot-hotu. La iha ema id abele hasai sira housi Ha’u Aman Nia liman. Ha’u ho Ha’u Aman, Ami ida de’it.

Lia maksoyn.

Leave a Reply

Your email address will not be published. Required fields are marked *