shadow
Diocese de Dili > NOTÍCIAS > LETURA DIÁRIA > Quarta-Feira, IV Semana da Páscoa

Quarta-Feira, IV Semana da Páscoa

ANO B

 

Primeira Leitura                                                                                  Act. 12. 24-13. 5ª

Lia  housi livro Apóstolo sira nia hahalok

Iha loron hirak neba, Maromak Nia lialós namkari lemo rai hodi buras liu no ba nafatin. Hala’o liu tiha sira nia  knaar, Barnabé ho Saulo fila housi Jerusalém, lori ho João, nebé hanaran Marcos.

Iha Kreda iha Antioquia, iha profeta no doutor sira: Barnabé, Simão be hanaran Negro, Lúcio housi rai Cirene, Manaen, maluk housi kiik mai be tetrarca Herodes nian no Saulo. Wainhira sira halo daudaun festa sacrifício Na’i nian no halo jejum, Espírito Santo lia tun ba sira: “Imi hasai housi imi leet Barnabé ho Saulo; haruka sira mai iha Ha’u, basá, Ha’u iha serbisu ba sira rua atu halo”. Sira halo tiha jejum no oração, tau tiha liman sira leten, hafoin haruka sira ba. Nune’e, Espírito Santo haruka Barnabé ho Saulo tun ba Selêucia, no housi neba, sira ho ró ba to’o Chipre to’o iha Salamina. Sira hahu hanourin Na’i Maromak Nia liafuan ba judeu sira iha sira nia sinagoga.

Maromak Futar Lia.

 

Salmo Responsorial                                                                                                                                                               Sal. 66(67). 2-3, 5, 7-8 (R. 4)

Refrão : Na’i, povo rai-klaran tomak hahi Ita!!! Repete-se

Ou           Aleluia!

 

Maromak hanoin ita, haraik bensa mai ita;

Hatudu mai ita, Nia Futar oin nabilan.

Iha rai-klaran, ema sei hatene Nia dalan;

Iha povo sira leet, ema sei hatene Nia maksoyn. Refrão

 

Reino hot-hotu sei haksolok,

Tan Itaboot tesi lia ho justiça,

Hodi ukun reino sira hotu iha rai-klaran. Refrão

 

Povo sira hahí Itaboot, Maromak;

Povo hot-hotu hawélok Ita.

Na’i haraik bensa mai ita;

Hahi Nia to’o rai-ikun rai-ulun. Refrão

 

Aclamação                                                                                                                                                                                                                       Jo. 8. 12

Refrão : Aleluia, Aleluia!!! Repete-se

                  Na’i dehan: “Ha’u mundo nia roman; ema sé tuir Ha’u,

                  Sei hetan roman moris nian”. Refrão

 

Evangelho                                                                                                                                                                                                               Jo. 12. 44-50

+ Na’i Jesus Cristo nia Evangelho nu’udar São João haktuir

Iha tempo neba, Jesus hasa’e lia, dehan: “Ema nebé fiar iha Ha’u, nia la’os fiar Ha’u, maibé nia fiar Ida nebé haruka Ha’u mai; ida nebé haré Ha’u, nia haré Ida nebé haruka Ha’u mai. Ha’u mai nu’udar Roman ba mundo, atu la bele hela iha nakukun laran ida nebé fiar iha Ha’u. Ema ruma rona karik Ha’u Nia liafuan hodi la halo tuir, la’os Ha’u mak sei castigo nia, basá Ha’u la mai atu fó castigo ba mundo, maibé atu soi mundo. Ema ida nebé fila kotuk ba Ha’u, hodi la tuir Ha’u Nia liafuan sira, hetan castigo: Liafuan nebé Ha’u haklaken mak sei fó castigo ba nia iha loron ikus. Ha’u la hateten kona ba Ha’u-An rasik; Aman nebé haruka Ha’u mai, Nia rasik mak fó ordem nebé Ha’u haklaken hodi hateten ba ema tomak. Ha’u hatene katak Ninia ordem mak moris rohan laek! Nune’e, liafuan hirak nebé Ha’u hateten, hanesan Aman rasik mak hateten ba imi, nu’udar Nia hateten mai Ha’u”.

Lia maksoyn.

Leave a Reply

Your email address will not be published. Required fields are marked *