shadow
Diocese de Dili > NOTÍCIAS > REFLEXÃO > IMI, HAU BOLU BELUN

IMI, HAU BOLU BELUN

Leitura no Reflexão

Domingo Páscoa VI /Ano B/2018

 

Primeira Leitura                                                                                                                                                                   Act. 10, 25-26. 34-35. 44-48

Lia housi livro haktuir Apóstolo sira nia hahalok :

Iha loron hirak nebá, Pedro tama daudaun ba Cornélio uman, Cornélio mai simu nia. Hafoin, Cornélio hakneak iha Pedro oin, hakru’uk to’o rai. Maibé, Pedro foti Cornélio, hodi dehan: “Hamriik tiha! Ha’u mos ema ida hanesan ó!” Pedro hateten teni: “Tebes duni, Maromak la fihir ema ida! Maibé, iha fatin hotu-hotu, ema nebé moris ho hamta’uk hodi moris tuir dalan justiça, ema ida ne’e sei monu duni ba Maromak laran!” Pedro sei ko’alia hela nune’e, Espírito Santo tun ba sira hotu nebé rona daudaun lia foun. Sarani Judeu sira nebé mai hamutuk ho Pedro, hakfodak, tan haré Espírito Santo tun mos ba ema gentio sira. Tan sira rona ita ko’alia lia oi-oin hodi hahí Maromak. Nune’e, Pedro hahú dehan:  “Bele  ema  ruma  hewai  wé  Baptismo nian  ba sira nebé simu tiha ona Espírito Santo, hanesan ita? Nia haruka atu ema hotu simu Baptismo hodi Na’i Jesus Cristo nia naran. Nune’e, sira husu ba nia atu hela loron ruma ho sira.

Maromak Futar Lia.

 

Salmo Responsorial                                                                                                                                                                 Sal. 97(98), 1. 2-3ab. 3bc-4

Refrão : Iha povo sira oin, Maromak hatudu Maksoyn!!! Repete-se

 

Hananu ba Na’i knananuk foun ida,

tan Nia halo buat kmanek oi-oin.

Nia liman kwanan barani teb-tebes,

Nia liman kwanan asu-wa’in tebes. Refrão

 

Maromak haklaken nia naran ba ema tomak,

Maromak hatudu nia justiça ba ema tomak.

Maromak laran di’ak nafatin ba Israel,

Maromak hanoin nafatin Israel. Refrão

 

Rai hotu-hotu hatene no haré Maromak hahalok.

rai hotu sasin duni Maromak kbiit.

Rai hotu haksolok duni ho Maromak,

rai hotu haklalak duni ba Maromak. Refrão

 

Segunda Leitura                                                                                                                                                                                                   1 Jo. 4, 7-10

Lia housi São João nia surat :

Doben sira: Ita sei hadomi malu, tamba domin mai housi Maromak, basá, ema nebé hadomi, ema ne’e  mai housi Maromak, nia hatene duni Maromak. Ema nebé la hadomi, ema ne’e la dauk hatene Maromak, basá, Maromak katak domin na’in. Na’i Maromak hatudu nia domin mai ita nune’e: Nia haruka nia Oan Mane mesak mai mundo, atu ita bele hetan moris housi nia Oan. Domin Maromak nian  mak ida ne’e:  Laós ita mak hadomi uluk Maromak, maibé, Maromak mak hadomi uluk ita, hodi haruka nia Oan rasik mai, nu’udar Maksoyn, atu kasu ita salan.

Maromak Futar Lia.

 

Aclamação                                                                                                                                                                                                                    Jo. 14, 23

Refrão : Aleluia, Aleluia!!! Repete-se

                  Ema nebé hadomi Ha’u, sei halo tuir Ha’u lia-fuan;

                  Ha’u Aman sei hadomi nia, ami sei mai horik ho nia. Refrão

 

Evangelho                                                                                                                                                                                                                 Jo. 15, 9-17

+ Na’i Jesus Cristo nia Evangelho nu’udar São João haktuir :

Iha tempo nebá, Jesus lia tun ba Escolante sira dehan: “Nu’udar Aman Maromak hadomi Ha’u, nune’e mos Ha’u hadomi imi. Imi hadomi nafatin Ha’u ba. Imi halo tuir Ha’u nia ukun-fuan sira, mak imi bele hadomi nafatin Ha’u nu’udar Ha’u halo tuir Aman Maromak nia ukun-fuan, Ha’u hadomi Nia nafatin. Ha’u dehan sai ba imi, lia hirak ne’e, atu imi bele haksolok ho Ha’u, atu imi nia ksolok boot to’o rohan. Ha’u nia ukun-fuan mak ida ne’e: Imi sei hadomi malu hanesan Ha’u hadomi imi. Ema ida la bele hadomi liu ema nebé mate tan nia belun sira. Imi halo tuir Ha’u haruka, mak imi Ha’u nia belun tebes. Ha’u la bolu ona imi atan, tan atan sira la hatene sira na’in halo sá. Imi, Ha’u bolu belun, tan Ha’u dehan ona ba imi, lia hotu nebé Ha’u rona housi Ha’u Aman. Laós imi mak fihir Ha’u, maibé Ha’u mak fihir imi, haruka imi atu ba halo di’ak barak, atu imi nia hahalok di’ak horik nafatin. Nune’e, buat hotu nebé imi harohan ba Aman Maromak hodi Ha’u nia naran, Aman Maromak sei haraik tebes ba imi. Ida ne’e mak Ha’u haruka: Imi sei hadomi malu”.

Lia Maksoyn.

 

 

Reflexão :

IMI, HAU BOLU BELUN

               Iha loron 25 Desembro 2005 k liu ba, Papa Emérito Bento XVI publica Encíclica ida ho naran DEUS CARITAAS EST (Deus é Amor-Maromak mak Domin). Iha celebração litúrgica Domingo semana nee (Domingo VI tempo Páscoa). Conteudo reflexão tomak iha Domingo semana nee, sei lori ita ba compreende didiak sentido lolos husi Domin (Amor). Iha segunda leitura (São João nia Carta dahuluk) inclui mos Evangelho São João nian descreve klean didiak asssunto domin eh Amor nee. Domin (Amor) nebe refere iha nee laos Domin ema (criatura) nian maibé, Domin (amor) Maromak (Criador) nian. São João iha primeira Carta (Segunda Leitura) dehan;”se mak la hadomi, nia la conhece Maromak, basá, Maromak mak Domin (1Jo 4,8)”. Ho nota prévia nee, ita hotu hetan convite hodi rona no contempla ho fuan tomak kona ba sentido Domin/Amor Maromak nia iha leitura sira Domingo semana nee.

              Liu husi Sacramento Baptismo ita Cristão (Católico) sira sai Jesus nia escolante. Baptismo nee nudar graça kmanek ida no hanesan ba ema hotu mai husi Maromak. Ho baptismo ita nia dignidade criatura sai Cristão tanba fiar iha Jesus Cristo. Iha Jesus Cristo Maromak la halo diferença ba ema basea ba Raça, Cor, posição nem Género. Ita nia identidade Cristã la sukat husi ita nia prestação serviço maibé, sukat liu husi ita nia boa vontade hodi sai sarani diak nebe halo tuir Maromak nia Ukun Fuan iha Santa Creda Católica.

               Sasukat lolos husi ita nia fiar ba Maromak mak oinsa ita hatudu Domin Maromak nian ba ema seluk. Significa oinsa durante moris nudar sarani, ita aplica Jesus nia doutrina Domin (Amor). Jesus rasik tenik katak; “Hau la bolu tan imi atan, basá, atan la hatene saida mak nia Nai halo maibé, Hau bolu imi belun, tanba Hau fo hatene ba imi saida mak Hau rona husi Aman” (Jo 15,15). Buat nebe halo ita orgulho mak Jesus laos bolu ita atana maibé, bolu ita sai belun hodi hatene saida mak Maromak planea ba ita nia moris sarani nian iha Jesus Cristo.

               Padre Martinho Gusmão iha ninia reflexão ba Revista FINI (Fiar Ida Neon Ida), descreve katak; iha Jesus nia hanorin (Doutrina), lia fuan hadomi (Amor) laos refere ba sentimento maibé, refere liu ba Mandamento! Ida nee mak novidade nebe Jesus lori mai hodi muda mundo nia horizonte (wawasan) kloot kona ba sentido Hadomi Maromak nian. Ita nobun hatene ona katak; Ukun Fuan nebe boot liu mak:”Hadomi Maromak” no tuir fali mak:”Hadomi ema seluk”. (Mt 22, 37-39).

               Iha âmbito Igreja Católica, Mandamento hanesan “dever” nebe obriga sarani hodi cumpri eh moris tuir. Pergunta mak nee; oinsa Hadomi nee sai fali Obrigaao ida? Amu Martinho Gusmão haklean liu tan ninia reflexão hodi tenik katak; ohin loron lia fuan hadomi nee hanesan poesia, melodia no romântica. Ida nebe mak lori ema ba entusiasmo atu hadomi malu. Ema lakohi hatene kona ba dever ka obrigação. Maibé, depois de mosu laran moras no fuan kanek wainhira entusiasmo juventude hotu ona no obrigação ka dever matrimónio hahu hakesi ita.

              Maske moris matrimónio mos, “Domin” nee halo ema too nafatin iha nível espiritual. Tan domin lolos nee hanesan Dom da Vida no graça nebe Maromak haraik no hakerek iha ema nia fuan laran (consciência) (Jer 31,33). Nunee, laos ita mak hadomi uluk Maromak, maibé, Maromak mak hadomi uluk ita (1Jo 4,10). Nee duni, obrigação atu hadomi malu nee laos força ida nebe mai husi liur atu hahalo domin nee, maibé, graça ida nebe Maromak tau iha fuan laran (consciência) nebe naksulin ba liur hodi hatudu.

             Nee mak mensagem murak nebe it abele aprende husi conteudo tomak Evangelho Domingo semana nee nian (VI Domingo Tempo Pascoa nian). Hanoin ba Katak:”Hadomi Maromak liu sasan hothotu no hadomi ema seluk hanesan-an rasik”. Assim Seja e Bem Haja. (IgnasLopes)

Leave a Reply

Your email address will not be published. Required fields are marked *