shadow
Diocese de Dili > NOTÍCIAS > REFLEXÃO > VII DOMINGO PASCOA-DOMINGO ITA NAIN JESUS CRISTO SA’E BA LALEHAN (ANO B)

VII DOMINGO PASCOA-DOMINGO ITA NAIN JESUS CRISTO SA’E BA LALEHAN (ANO B)

Maun alin sarani doben sira mak hau hadomi iha ita nain Jesus Cristo. Paz no dame ba ita hotu. Ita halibur an hamutuk iha Nai nia loron ne’e hanesan domingo domingo hodi celebra ita nia moris. Moris ida nebe ita halao laos deit nudar ema ida, maibe nudar ema be iha ninia moris ne’e lao hamutuk nafatin ho Nai Maromak.

Maromak ninia futar liafuan domingo ida ohin nian lori ita ba hanoin hamutuk kona ba realidade Maromak oan ninia moris hamutuk ho ita. Moris hamutuk ida nebe hakerek iha historia katak Nia hit-an mai moris ho ita iha mundo ne’e hodi soi ita liu husi ninia terus, mate no moris hias. Moris hias tiha nia sa’e fali ba Lalehan tur iha Aman Maromak ninia sorin kuanan no iha neba nia tau matan no horik nafatin ho ita nudar ita nia ulun boot ka nudar ita nia liurai. Haktuir mai ita klean liu tan katak molok sae ba Lalehan Jesus prepara ninia apostolo sira ou bele dehan prepara ita ho buat nebe fundamental liu atu sira ou ita bele moris nafatin nudar nia hanorin ona. Preparação ne’e hahu kedas ho facto Cristo nia moris hias be hatudu katak mate folin laek, hatudu katak ho Cristo ita sei bele manan buat hotu, mai to’o iha promessa kona ba Espírito tulun nain be Nia sei haruka mai ita atu sai ita nia we matan no moris ba sasin moris ema sarani sira nian to’o mai mandamento atu ba halo rai hotu hotu sai Jesus ninia escolante.

Evangelho ohin nian haktuir mai ita katak molok atu sae ba Lalehan Jesus husik hela ninia mandamento nebe sai nudar knar ida ba ita hotu-hotu atu halao hodi bele fo sasin kona ba moris nudar ema sarani ida. Moris ida be hatudu Maromak ninia domin rohan laek tebes mai ita ema sira no hatudu Maromak nudar ema no rai hotu ninia Maksoin. Ita nia experiência pascoa nian mak sai fundamento ba ita nia sasin moris lolos ema sarani nian. Iha mandamento ne’e Jesus dehan “imi ba rai rai, hodi haklaken Lia Foun ba ema hotu-hotu. Ema nebe fiar, hodi simu Baptismo, ema nee hetan duni rahun diak; maibé, ema nebe la fiar, ema nee sei hetan rahun aat duni. Ema sira nebe fiar, sei bele halo buat foun hirak nee; housi Hau nia naran, sira sei duni sai diabo, sira sei koalia lia mesak foun, sira sei kaer samean sira, sira hemu karik buat moruk no lanuk ruma, sira sei la hetan susar ida. Sira sei tau liman ba ema moras sira, ema moras sira sei hetan fali isin diak!”

Tuir mandamento ne’e hatudu mai ita katak Cristo haruka ita ho Kbiit wain, laos haruka ita hanesan ema nebe lao mamuk. Kbiit ida be mai husi Cristo rasik, ita moris fo sasain kona ba Cristo ho kbiit atu koalia kona ba Cristo, atu duni sai diabo sira, atu resiste hasoru buat at, atu fo isin diak ba ema sira, atu hari paz, atu fo ksolok no seluk seluk tan. Kbiit sira ne’e hotu moris iha ita tamba fiar, nune mos sei moris iha maun alin sira hotu nebe sei fiar iha Cristo tamba ita nia sasin moris sarani nian.

Maun alin sira, concretamente oras ne’e dadaun ita nia moris be hatudu lori Cristo ba ema sira seluk ne’e hatudu iha saida? hau hanoin temque hatudu uluk nanain iha: hakiak paz no unidade, amizade no domin iha ita le’et hahu kedas iha ita ida idak nia-an ba ita nia familia no tama iha sociedade ka comunidade laran,  hadok tiha laran moras, rai odio no desunião husi ita le’et. Tuir fali mai hau hanoin katak mak buka tulun no tau matan ba malu lolos nudar ema sarani sira, liu liu ita halo nune’e ba maluk sira nebe percisa liu ita nia tulun. Tulun no tau matan lolos sai tiha ona nudar carateristica ita ema sarani sira nian nebe husi neba ema hatene katak ita fiar no lao tuir Jesus Cristo Maksoin mundo nian.

Maun alin sarani doben ita hotu experimenta ona katak dala wain tebes atu fo sasin moris ida hanesan ne’e susar tebes ba ita basa dala barak liu mak ita lao dook hela husi Cristo nia mandamento ne’e, pior liu tan wainhira ita temi dehan fiar iha Cristo maibe laran no hahalok la hatudu fiar ne’e. Cristo fo laran metin mai ita no hateten nanis ona mai ita dificuldade sira ne’e labele sai fali hanesan buat nebe halo ita desiste hodi lao dook husi Maromak nia dalan moris be Cristo husu ita atu fo sasin maibe buka fiar no laran metin nafatin basa Espirito Santo be Cristo haruka mai mak sai fonte no kbiit ba ita nia moris ida be hatudu lolos nudar Cristo nia escolante. Ita percisa deit hakbesik-an ba Espirito Santo hodi husik Nia mak ukun no lori ita basa husi nia mak sei suli sai mai ita kbiit tomak be bele halo ita hatene haklaken no fo sasin moris ida be lao tuir Maromak ninia hakarak nudar Cristo haraik no haruka ona mai ita. Amen.       

 

13 de Maio 2018, Por: Pb.

Leave a Reply

Your email address will not be published. Required fields are marked *