shadow
Diocese de Dili > NOTÍCIAS > LETURA DIÁRIA > Quarta-Feira, VII Semana da Páscoa

Quarta-Feira, VII Semana da Páscoa

Ano B

 

Primeira Leitura                                                                                    Act. 20. 28-38 

Lia housi livro Apóstolo sira nia hahalok    

Iha loron hirak neba,  Paulo hateten ba katuas sira housi Kreda Éfeso nian:”Imi sei neon moris hamutuk ho imi bibi sira, nebe Espírito Santo tau iha imi nia liman, hodi hamatan ba Maromak Nia kreda, Kreda nebe Maromak manan ba Nia hodi Nia ran rasik. Ha’u hatene katak, uainhira ha’u sai tiha ona housi ne’e, asu fuik siak sira sei mai iha imi leet, nebe sei han mós bibi oan sira housi bibi-luhan. Housi imi leet, sei mosu ema ho hahalok áat oi-oin, nebe hakarak dada escolante sira ba áat. Tan ne’e, imi neon moris ba! Imi sei hanoin hi’as katak iha tinan tolu nia laran, kalan eh loron, ha’u la descansa, hodi haklaken Lia- foun ba imi ida-idak ho matan-uen. Oras ne’e, Ha’u saran imi ba Maromak, ba lia fuan housi Nia graça; Nia iha biit atu perdua  imi salan no mós iha biit atu haraik prémio ba imi, nu’udar liman- rohan, hanesan ba ema sira be simu ona santidade.

Ha’u la kan ema nia sasan, hanesan osan mean, osan mutin eh hena hatais. Imi ida-idak hatene katak hodi Ha’u liman rasik ha’u halo serbisu atu ha’u bele han, fó han ha’u maluk sira nebe la’o ho ha’u. Ha’u hatudu ona ba imi katak hodi serbisu mak ita bele hetan buat ruma hodi fó tulun fali ba maun-alin sira be kiak no fraco. Ha’u hanoin hetan fali liafuan hirak nebe Na’i Jesus dehan: ‘ita hetan ksolok boot uainhira ita fó, liu fali uanhira ita simu’.”

Hateten tiha lia hirak ne’e, nia hakneak hodi harohan hamutuk ho sira hotu. Hafoin sira hotu hako’ak Paulo, hodi tanis no rei nia dala barak. Sira hotu neon sala, hanoin nia, tan nia hateten ba sira katak sira sei la haré tan ona nia oin. Tuir mai sira hotu ba ho nia hodi ba to’o ró.

Nai nia futar Lia

 

Salmo Responsorial                                                                                                                               Sal. 67(68). 29-30, 33-35a, 35b-36c (R. 33ª)

Refrão : Povo rai-klaran nian, hananu ba Na’i!!! Repete-se

Ou            Aleluia!    

 

Hatudu mai Na’i, ita biit,

Biit nebe fó ksolok mai ami!

Liurai rai hotu nian;

Iha templo Jerusalém

Liurai sira hasa’e sira buat -karan. Refrão

 

Liurai rai hotu nian, hananu ba Na’i,

Hananu hino ba Na’i,

Ba Nia be hôrik iha lalehan;

Halo ema rona Nia futar-lia. Refrão

 

Nia kmanek nabilan iha Israel nia leten,

Nia biit áas liu kalohan.

Israel nia Maromak fó biit ba Nia povo,

Rahun di’ak ba Maromak. Refrão

 

Aclamação                                                                                                                                                                                                             Jo. 17. 17b, a

Refrão : Aleluia, Aleluia! Repete-se

                  Ita liafuan, Na’i, mak lialós tebes;

                  hametin ami iha lialós. Refrão

 

Evangelho                                                                                                                                                                                                             Jo. 17. 11b-19

Na’i Jesus Cristo nia Evangelho tuir São João

Iha tempo neba, Jesus foti matan ba lalehan, harohan nune’e: “Aman Santo, hodi ita naran tau matan ba sira nebe Ita haraik mai Ha’u, atu sira sai ida de’it nu’udar ita mós ida de’it. Uainhira ha’u sei hôrik ho sira, Ha’u rasik tau matan ba sira hodi ita naran. Ha’u tau matan duni ba sira nebe Ita hara’ik mai Ha’u. Sira ida la lakon; lakon de’it mak ema-oan-áat; nune’e mak sai tuir lolós escritura. Maibe, oras ne’e, Ha’u atu fila dadaun ona ba ita. Sira sei iha mundo rai-klaran, Ha’u dehan sai ona ida ne’e, atu sira bele hetan Ha’u nia ksolok to’o rohan. Ha’u fó hatene sai ona ba sira ita liafuan. Mundo hakribi sira, tan sira la’os mundo nia emar. Ha’u la husu ita hasai sira housi mundo, maibe ha’u husu de’it atu soi netik sira housi áat na’in. Sira la’os mundo nia emar, nu’udar Ha’u mós la’os mundo ninian. Halulik sira iha lialós. Nu’udar ita haruka Ha’u mai iha mundo, nune’e mós Ha’u haruka sira ba mundo. No tanba sira mak ha’u halulik-An, atu sira mós bele halulik-an iha lialós”.

Lia maksoyn.

Leave a Reply

Your email address will not be published. Required fields are marked *