shadow
Diocese de Dili > NOTÍCIAS > LETURA DIÁRIA > Sexta-Feira, VII Semana da Páscoa

Sexta-Feira, VII Semana da Páscoa

Ano B

 

Primeira Leitura                                                                                    Act. 25. 13-21

Lia housi livro Apóstolo sira nia hahalok 

Iha loron hirak neba, liurai Agripa ho Berenice ba to’o iha Cesareia hodi hato’o cumprimentos ba embo’ot Festo. Tan sira hela loron barak iha neba, Festo haktuir ba liurai lia bobar be hasouru Paulo nia hahalok: “ Iha ne’e iha ema mane ida nebe embo’ot Félix castigo hela. Uainhira Ha’u sei iha Jerusalém, na’ilulik boot ho katuas sira judeu nian foti lia bobar hasouru nia hodi husu atu fó castigo ba nia. Maibe ha’u hatan ba sira katak Romano sira la iha lisan ida atu saran ema ida ba kadeia, uainhira sira be bobar lia la mosu mai iha nia oin, atu nia bele hateten buat ruma hodi soi nia-an. Tan ne’e, sira mai hamutuk ho ha’u to’o iha ne’e.

Iha loron tuir mai, lalais kedas ha’u hola fatin iha tribunal hodi haruka atu bele lori ema ne’e mai. Sira be bobar lia mai, maibe sira la hatudu sala ida hasouru nia nebe ha’u hakarak hatenee, sira foti lia hasouru nia tan de’it nia religião no tan ema ida naran Jesus nebe mate tiha ona, maibe Paulo hateten lolós katak Nia moris hela. Tan ha’u la barani atu tesi lia hirak ne’e, ha’u husu ba ema ne’e, nia hakarak ba Jerusalém, atu iha neba, sira bele tesi lia ba nia.  Nune’e Paulo halo tuir, atu sira hein oinsá imperador nia hanoin, ha’u tahan hela nia iha kadeia to’o loron nebe atu haruka nia ba César”.

Na’i nia futar lia.      

 

Salmo Responsorial                                                                                                                                      Sal. 102(103). 1-2, 11-12, 19-20ab (R. 19ª)

Refrão : Na’i hari Nia trono glória nian iha Lalehan!!! Repete-se

Ou            Aleluia!

 

Ha’u klamar hahi Na’i,

Ha’u neon no laran tomak

Hauélok Nia naran Santo.

Ha’u klamar hahi Na’i,

La haluha Nia kmanek sira. Refrão

 

Dook tebes hosi rai ba lalehan,

nune’e mós na’i nia laran-luak boot tebes

ba sira nebe hadomi Nia.

Nu’udar lorosa’e dook housi loro-monu,

Nune’e, nia hadook ita housi ita salan hotu. Refrão

 

Na’i hatur metin Nia trono iha lalehan;

Nia biit ukun rai-klaran.

Anjo sira hotu, hahi Na’i,

Sira laran metin iha Nia liafuan. Refrão

 

Aclamação                                                                                                                                                                                                                   Jo. 14. 26

Refrão : Aleluia, Aleluia!  Repete-se  

                  Na’i lia tun:” Ha’u sei haruka Espírito lialós nian mai.

                  Nia sei hanourin lialós hotu ba imi”. Refrão

 

Evangelho                                                                                                                                                                                                               Jo. 21. 15-19

+ Na’i Jesus Cristo Nia Evangelho tuir São João : 

Iha tempo neba, uainhira sira han hotu tiha, Jesus husu ba Simão Pedro: “Simão, João nia oan, ó hadomi Ha’u liu buat sira ne’e hotu? “Simão hatan: “Tebes duni, Na’i, ita hatene katak ha’u hadomi Ita”. Jesus dehan ba nia: “ ó tau matan ba ha’u nia bibi oan sira”. Jesus husu tan: “ Simão, João nia oan, ó hadomi Ha’u?” Simão hatan:“ Tebes duni, Na’i, Ita hatene katak ha’u hadomi Ita”. Jesus dehan ba nia: “Ó tau matan ba Ha’u nia bibi sira”. Dala ida tan Jesus husu ba Pedro: “ Simão, João nia oan, ó hadomi Ha’u?” Pedro neon sala, tan Jesus husu dala tolu ba nia ‘”Ó Hadomi Ha’u?’. Hafoin Pedro hatan: “ Na’i, Ita hatene hotu, ita hatene katak ha’u hadomi Ita”. Jesus dehan ba nia:” ó tau matan ba Ha’u nia bibi sira. Tebes Ha’u hateten lós ba ó: uainhira ó sei klosan, ó rasik hatais, ó sei foti liman atu ema seluk hatais ó, nia sei lori ó ba fatin nebe ó la kohi”. Jesus hateten nune’e, atu fó hatene sai oinsá Pedro sei fó glória ba Na’i Maromak. Ne’e hotu, Jesus dehan tan: “Ó tuir ha’u mai”.

Lia maksoyn.             

Leave a Reply

Your email address will not be published. Required fields are marked *