shadow
Diocese de Dili > NOTÍCIAS > REFLEXÃO > ESPÍRITO SANTO FO LARAN METIN

ESPÍRITO SANTO FO LARAN METIN

REFLEXÃO & LEITURA DOMINGO PENTECOSTE/Ano B/2018

Act 2,1-11   Gal 5,16-25  Jo 15,26-27; 16,12-15

 

Primeira Leitura:

Lia housi Livro haktuir Apóstolo sira nia hahalok (Act 2, 1-11)

Too tiha loron Pentecoste, Apóstolo sira hamutuk hela iha fatin ida deit. Teki-tekil housi lalehan, sira rona tarutu boot ida, hanesan anin aat, tama too uma laran nebe sira hela ba. Sei nunee hela, sira haré buat ida mosu mai hanesan ahi lakan, fahe an hodi tuun daudaun ba sira ida-idak. Sira hotu simu Espírito Santo hodi hahu koalia lian oi-oin deit, nudar Espírito Santo haraik ba sira, atu sira bele koalia. Tuur mos iha Jerusalém, judeus oan diak balu mai housi nação hotu-hotu raiklaran nian. Rona tiha tarutu boot ida nee, ema lubun boot ho hakfodak halibur malu, tan sira ida-idak rona sira lian rasik. Hodi hakfodak no hamtauk, sira dehan: sá los mak ida nee? Ema sira be koalia daudaun nee laos ema Galileia nian deit? Oinsa los mak ita rona sira koalia ita ida-idak nia lian rasik? Ema partus, Medos, Elamitas, ema husi rai Messopotâmia, Judeia no Capadocia, ema husi rai pontu no Ásia, Frigia no Panfilia, ema husi rai Egipto, husi rai Líbia, besik Cirene, ema husi Roma, ema husi Judeu no ema povu seluk, ema Cretense no Àrabe, ita ne’e hotu ida-idak rona ema hirak ne’e haklaken Maromak nia hahalok wa’in, hodi ita nia lian rasik”.

Maromak futar Lian.

 

Salmo Resposorial, (sal. 103 (104), lab. 24ac. 29bc-30. 31. 34).

Refrão:  Na’i, haraik Espírito Santo mai ami atu hafoun hikas rai. Repete-se

 

Ha’u klamar hahi Maromak,

hau nia Maromak kmanek tebes!

Ita nia hahalok sura labele,

rai-klaran belar ho ita nia criatura. Refrão

 

Ami moris iha ita nia liman,

ami sei mate sei fila fali ba rai rahun.

Maibe ita sei haraik mori hias,

rai-klaran sei hetan iilas foun. Refrão

 

Hahi nafatin Maromak Maromak,

Maromak haksolok ho nia criatura.

Maromak see tilun mai ha’u nia hananu,

ha’u sei hksolok ho Maromak. Refrão

 

 Segunda Leitura:  (1 cor. 12,3b-7. 12-13.)

Lia husi São Paul nia surat ba sarani sira iha Corinto:

Maun Alin sira: La ho Espírito Santo nia kbiit, ema ida la bele hateten: “Jesus mak Nai.” Tebes duni, Espírito nia diak oi-oin, maibe Espírito ida de’it. Knaar iha oi-oin, maibé, Na’i ida de’it. Hahalok iha oi-oin, maibé Maromak ida de’it. Nia mak halo buat tomak iha ema hot-hotu. Ida-idak simu Espírito Santo nia di’ak atu bela hlo di’ak ba maluk hot-hotu. Nu’udar ita ema ida, isin ida de’it; isin ida, maibé baluk barak. Baluk sira hotu maski barak, sira halo isin lolon  ida de’it; nune’e mos Cristo. Tebes duni, ita hotu sarani hodi Espírito Santo ida de’it atu sai ema ida de’it, maski ita balun Judeu, balun Grego, balun atan, balun laos atan. Ita hotu simu Espírito Santo ida de’it.

Maromak futar lian.

 

Aclamaҫão

Refrão:  Espirito. Repete-se

Espírito Santo hiit-an mai! Haksolok ita emar sira,

hakmanek sira neon no laran hodi ita nia kmanek. Refrão

 

Evangelho

Nai Jesus Cristo nia Evangelho nu’udar São João haktuir:

Iha loron neba, katak iha loro kraik, loron uluk semana nian, uma nebe Apóstolo sira hela ba, odamatan taka metin, tan sira ta’uk Judeu sira. Sei nune’e hela, Jesus mosu mai hamrik iha sira le’et, dehan: “Hakmatek hela ho imi!” dehan tiha nune’e, Jesus hatudu ba sira, nia liman no sorin kanek. Haré tiha Jesus Apóstolo sira  haksolok teb-tebes. Jesus lia tun tenik ba sira: hakmatek hela ho imi! Nu’udar Aman Maromak haruka Hau mai, nune’e mos, Ha’u  haruka imi ba!” ne’e hotu tiha, Jesus hu’u iis ba sira, dehan: “simu Espírito Santo ba! Ba ida nebe’e imi perdua nia salan, nia sei hetan perdua ba nia salan; ba ida nebe’e imi la perdua nia salan, nia sei la hetan perdua ba imi nia salan!”

Lia Maksoyn.

 

Reflexão:

ESPÍRITO SANTO FO LARAN METIN

Iha Domingo 13 de Maio 2018, wainhira Cristão Católico mundo tomak celebra loron aparição de Nossa Senhora, iha momento nee duni sarani sira (Católico-protestante) husi Surabaya-Indonésia hetan ataque bomba nebe causa ema lobuk mate. Buat nebe extra ordinário husi acontecimento nee mak; Cristão iha mundo tomak condena ataque terror nee maibé, la halo ação violento ruma hasoru terrorista hirak nee.

Iha relato Evangelho São João ba Domingo Pentecoste nee, Jesus koalia kona ba consolador (paráclito/Parakleetos). Lia fuan consoladora Jesus nian nee, foti husi lia menon ikus iha momento han kalan ikus nian (última cheia). Iha conteúdo lia fuan hirak nee, Jesus hameno hodi fo laran metin (esperança) ba escolante sira hodi unidade nafatin hamutuk Nia (le; Jesus) nudar ai uvas nia hun ho sanak sira (Jo 5,1-8). Jesus consola apóstolo sira atu hamutuk hadomi malu (Jo 15, 9-17). Reflecte ba acontecimento iha Surabaya-Indonésia nee, Jesus nia mensagem Evangélica mos bolu ita atu hakmatek nafatin maske ita enfrenta dificuldade oioin basá, Jesus rasik enfrenta ona desafio wain nebe sosa ho Nia (le; Jesus) nia vida rasik. 

Fila mai rai laran, povo Tim

or Leste tomak sucesso ona participa iha Eleição Anticipada hodi hakotu impasse política rai laran nebe la hetan solução. Povo mak soberana, Democracia lori povo nia direito soberana nee hodi atribui cadeira Parlamentar ba Partido 4 hanesan AMP (cadeira 34), Fertilin (cadeira 23), PD (cadeira 5) no FDD (cadeira 3), inclui mos partido & Coligação partidária hirak nebe la consegue lia barreira hanesan; PR, MSD, MDN no PEP.

 Atribuição cadeira nee nudar resultado ikus husi decisão povo nian nebe la fo ukun mesak ba partido ida. Ho resultado idus ida nee, povo Timor Leste tomak iha  esperança boot ba partido vencedor (mais votado) nebe sei hamoris governo dawalau (Oitavo Governo Constitucional) nebe kore povo tomak husi mukit no kiak.

Santo Padre Francisco iha ninia Homília Loron Pentecoste hatete:”ita contempla no hamoris hikas iha ita nia liturgia kona ba efusão eh Maromak

haraik Espírito Santo liu husi Cristo be Moris hias iha Uma Kreda nia história. Momento ida nebe graça Maromak nian hakonu cenáculo Jerusalém hodi halekar ba mundo tomak. Nunee, buat nebe acontece iha momento neba hanesan mos acontece mai ita iha momento ida nee, besik los iha ita nia fuan. São Lucas fo ita resposta iha passagem Actos dos Apóstolos nebe ita rona ona iha primeira leitura” (Act 2, 1-11).

Evangelista São João lori ita ba iha andar leten uma Jerusalém, fatin nebe apóstolo sira libur hamutuk. Lalaok nebe dada ita nia atenção mak; buat nebe tun mai husi lalehan. Buat ida hanesan anin boot nebe mosu teki-tekil hodi hakonu iha uma nebe sira hamutuk ba, molok ahi Espírito Santo tun ba sira idaidak. Teki-teki husi Lalehan, sira rona tarutu boot ida, hanesan anin aat, tama too uma laran, nebe sira hela ba. Sei nune’e hla, sira hare buat ida mosu mai hanesan ahi-lakan, fahe-an, hodi tun daudaun ba sira ida-idak. Sira hotu simu Espiritu Santo, hodi hahu ko’alia  lia oi-oin de’it, nudar Espírito  Santu haraik ba sira atu sira bele ko’alia.

Anin no ahi lakan nudar sinal lolos no concreto, nebe kona no tun ba apóstolo sira. Ahi lakan nee laos sinal liur deit maibé, refere mos ba intimidade ema nian; iha neon no fuan. Nudar consequência husi nee, sira hotu nakonu ho Espírito Santo, halekar nia dinamismo irresistível ho efeito nebe halo hakfodak ema barak; haktuir iha leitura sira katak; simu tiha Espírito Santo, apóstolo sira bele koalia língua oioin tuir graça eh carisma nebe haraik ba sira.

Ho ida nee, nakloke ona ba ita nobun nia matan kona ba cenário ida nebe ita hotu la espera maibé, acontece duni nunee. Iha nebe, ema lubun boot ho hakfodak no hamtauk, sira dehan: “sa los mak ida ne’e? ema sira koali daudaun ne’e laos ema Galileia nian deit? Oinsa los mak ita rona sira ko’alia, ita ida-idak nia lian rasik? Ema partus, Medos, Elamitas, ema husi rai Messopotâmia, Judei no Capadocia, emahusi rai pontu no Asia. Frigia no Panfilia, ema husi rai Egipto, husi rai Libia, besik Cirene, ema husi Roma, ema husi Judeu no ema povu seluk, ema Cretense no Arabe, ita ne’e hotu ida-idak rona ema hirak ne’e haklaken Maromak  nia hahalok wa’in, hodi ita nia lian rasik.”

Iha roman leitura Evangélica Domingo Pentecoste nian nee, ita bele haree ponto importante tolu (3) relaciona ho acção Espírito Santo mak hanesan; Novidade, harmonia no missão.

 

  • Novidade eh buat foun ida sempre hamosu/causa no sentimento laran taridu. Se ita hotu construi, programado, projecta ita nia moris tuir ita nia esquema, ita nia segurança no ita nia gosto sira, nunee mos wainhira ita liga ho Maromak, ita sente seguro liu basá, buat hotu controlado. Dala barak ita sente Maromak hamahan no tutuir ita maibé, too ponto ruma, ita sente Maromak sees-An husi ita maibé, ita iha nafatin esperança katak; Nia Espírito Santo horik nafatin ho ita. Espírito Santo mak mata dalan ba ita nia moris ho decisão sira. Ho Espírito Santo, ita sente Maromak nunca abandona ita, ita la sente tauk. Ita husik Espírito Santo sai ita nia klamar atu iha bebeik confiança ba Maromak.
  • Iha história salvação nian, wainhira Maromak revela Nia-An sempre lori mos ho buat foun oioin (Novidades). Muda ita nia moris hodi husik ita nia-an Maromak mak guia. Noe construi bero boot ida iha momento mundo atu naben dadaun maibé, nia hetan salva husi Maromak. Abrão sai husi nia rai lao ba rai dook hodi laran metin deit ba Maromak nia promessa. Moises enfrenta poder Farao nian maibé, consegue liberta povo Maromak nian. Apóstolo sira mos molok simu Espírito Santo, la iha aten brani. Simu tiha Espírito Santo sira hetan aten brani hodi haklaken Maromak nia lia fuan ba fatin-fatin. Novidade nebe Maromak fo los duni turi buat nebe realiza iha ita nia moris, ida nebe fo ksolok, fo serenidade basá, Maromak hanoin liu ita nia diak. Pergunta mak nee, ita loke ita nia fuan ba Maromak nia Espírito Santo kalae? Ita hatudu aten brani hodi moris tuir nividade nebe Maromak fo ka lae?
  • Pensamento ba dala rua nian mak; se haree liu deit, hanesan Espírito Santo cria desordem iha Igreja basá, Nia lori carisma oioin ba Igreja. Maibé, haree ho matan fiar nian carisma hirak nee hanesan Don sira nebe Maromak haraik no sai hanesan riqueza boot ida basá, Espírito Santo nudar Espírito unidade nian. Espírito Santo mak princípio harmonia. Ba ida nee, padre da Igreja ida expressa nia hanoin hodi dehan; o Espírito Santo «ipse harmonia est – Ele próprio é a harmonia». Só Ele pode suscitar a diversidade, a pluralidade, a multiplicidade e, ao mesmo tempo, realizar a unidade. Nunee mos, se ita hakarak halo diversidade, ita precisa taka ita nia particularismo, exclusivismo, divisão. Se ita hakarak cria unidade tuir ita nia natureza ema nian, precisa halakon tiha ita nia divisão sira, hafoin husik Espírito Santo guia ita iha diversidade ba comunhão Igreja Católica nian. Iha âmbito política Timor Leste nian, povo nia laran metin mak; atu ukun nain sira hanoin hamutuk oinsa lori Timor Leste ba futuro ida nabilan tuir espírito (semangat) Ukun rasik-an nian. Ukun nain sira nebe povo fo fiar la fo prioridade liu ba interce grupo/interece particular. Interece estado mak boot liu.
  • Ponto ikus liu; Teólogo antigo sira hateten katak; a alma é uma espécie de barca à vela; o Espírito Santo é o vento que sopra na vela, impelindo-a para a frente; ahi lakan nebe haktada Espírito Santo nee nudar don Espírito Santo nian. La ho impulso Espírito Santo nee, ita la bele hakat ba oin. Espírito Santo halo ita compreende no tama iha Maromak nia mistério. Impulso Espírito Santo nee halo ita laos sulan deit iha nia nia-an maibé, loke odamatan ba ema hotu hodi comunica Maromak nia graça nee iha Evangelho (Lia foun diak), encontro ho Cristo basá, O Espírito Santo é a alma da missão. Pentecostes iha Cenáculo Jerusalém nudar lalaok uluk nebe prolonga eh continua too agora basá, O Espírito Santo é o dom por excelência de Cristo ressuscitado aos seus Apóstolos, mas Ele quer que chegue a todos. Carisma hodi kaer ukun mos sai hanesan Dom ida nebe Maromak designa ba ukun nain sira hodi garante bem comum povo nian. Se espírito Bem Comum (Bonum Comune) nee la kuda iha governante sira nia fuan, então estado hanesan mate isin nebe klamar halai lakon. Ukun nain precisamente hakbesik an ba Maromak hodi hetan inspiração oinsa lori Povo Timor Leste ba moris diak.

 

Hanesan ita rona iha Evangelho, Jesus hateten: “Eu apelarei ao Pai e Ele vos dará outro Paráclito para que esteja sempre convosco” (Jo 14, 16).É o Espírito Paráclito, o “Consolador”, que dá a coragem de levar o Evangelho pelas estradas do mundo!

Liturgia Uma Kreda Domingo semana nee nian, ita husu ba Aman Maromak atu haraik Nia Espírito Santo hodi hafoun ita nia fiar , ita nia família, ita nia grupo, ita nia grupo movimento sira iha uma kreda laran. Nunee, Domingo Pentecoste nudar loron moris ba uma kreda Católica rasik. Ita mos la haluha hasae nafatin oração ba maluk sarani sira nebe mate iha Surabaya, 13 de Maio liu ba, atu sira nia klamar hakmatek iha Maromak nia kadunan. Sangue dos mártires são semente da Igreja de Cristo (são Justino)

Vinde, Espírito Santo, enchei os corações dos vossos fiéis e acendei neles o fogo do vosso amor”! Amém. (ILMBAFS).

 

Leave a Reply

Your email address will not be published. Required fields are marked *