shadow
Diocese de Dili > NOTÍCIAS > LETURA DIÁRIA > Terça-Feira, VII Semana Do Tempo Comum

Terça-Feira, VII Semana Do Tempo Comum

Ano B

 

Primeira Leitura                                                                                     Tag. 4. 1-10 

Lia housi São Tiago nia Surat

Doben sira: Tan sá iha funu, tan sá imi istori malu? La’os tanba imi nia hakarak áat halo funu iha imi laran? Imi hakarak buat ida, maibe imi la iha buat ne’e; nune’e imi oho. Imi kaan buat ida, maibe imi la hetan nia, tan ne’e imi halo funu. Imi la iha, basá imi la husu. Imi husu, maibe imi la simu, basá imi husu la lós: atu usa nia ba imi nia hakarak áat.

Ema laran áat! Imi la hatene katak uainhira imi habelun ho mundo, imi halo funu hasouru Maromak? Ne’e duni, ema nebe hakarak habelun mundo halo nia an Maromak nia funu baluk. Imi hanoin katak Escritura hateten leet de’it uainhira nia dehan, “ Maromak hakarak ba Nia mesak de’it Espírito nebe nia tau iha nia laran”. Maibe nia fó graça barak liu, tan ne’e mak Escritura dehan,”Maromak la gosta ema loko an, maibé fó graça ba ema nebe haraik an”. Ne’e duni, hakru’uk ba Maromak. Halo funu hasouru diabo no nia sei halai dook housi imi. Hakbesik ba Maromak, no Nia sei hakbesik imi. Hamós imi nia liman, imi ema maksalak sira; hamós imi nia fuan, imi laran makerek sira. Hakribi imi nia sala hodi tanis ba. Halo imi nia hamnasa nakfila ba mataben, no imi nia laran haksolok ba laran nakraik. Haraik an ba iha Maromak futar oin; Nia sei foti imi.

Maromak Futar Lia.

 

Salmo Responsorial                                                                                                                               Sal. 54(55). 7-8-9-10a, 10b-11ª, 23 (R. 23a)    

Refrão : Saran ba Na’i, ó nia lalaok sira no Nia sei tulun ó!!!  Repete-se 

 Ha’u dehan: Ha’u iha karik liras,

Hanesan manu falur sira

Atu semo no hasouru hakmatek,

Ha’u sei halai ba to’o dook

Hodi hela iha rai fuik maran. Refrão

 

Ha’u sei halai hasouru heli-an fatin,

Housi anin fuik no laloran boot.

Na’i, halo sira sai rungu-ranga,

Halo sira lian hafahe malu. Refrão

 

Basá ha’u haré de’it iha cidade,

Lia la tuir malu no oho malu;

Loron kalan sira hale’u muro sira,

Iha laran ukun injustiça no laran makerek. Refrão

 

Saran ba Na’i, ó nia hahalok sira:

Nia sei tulun ó,

Basá, Nia la husik ema laran lós

La’o sala dalan ba nafatin. Refrão   

 

Aclamação                                                                                                                                                                                                                   Gal. 6. 14

Refrão : Aleluia, Aleluia! Repete- se

                   Ha’u gaba-an de’it iha Na’i Jesus Cristo Nia cruz. Housi Na’i nia cruz,

                   mundo mate ona mai ha’u, no ha’u mate ona ba mundo. Refrão                                            

 

Evangelho                                                                                                                                                                                                                Mc. 9. 30-37

+ Na’i Jesus Cristo nia Evangelho nuda’ar São Marcos haktuir :

Iha tempo neba, Jesus ho Nia escolante sira hákat liu ba Galeleia sorin. Nia lakohi ema ruma atu hatene, basá, Nia hakarak hanourin Nia escolante sira. Nia lia tun ba sira, dehan: “Ema sei saran Mane Maksoin ba ema áat sira liman. Ema áat sira sei oho Nia, maibe, Nia mate tiha, liu loron tolu, sei moris hi’as”. Jesus nia escolante sira la hatene lia hirak ne’e katak sá, maibe, sira táuk hela atu husu Nia.

To’o tiha iha Cafarnaum, tama iha uma laran,  Jesus husu ba sira: “ Imi haksesuk malu kona ba saída iha dalan?” Maibe,  sira nonok hela, basá, sira haksesuk malu kona sira ida nebe boot liu. Nune’e, Jesus tuir tiha, bolu sira na’in sanulu resin rua hodi dehan ba sira: “ Sé hakarak boot liu sira seluk, sei sai ikus liu hotu, sei sai hot-hotu nia atan”. Jesus káer tiha labarik oan ida, tau tiha nia iha sira nia klaran, hako’ak tiha nia hodi dehan ba sira: “ Ema nebe simu labarik oan ida hanesan ida ne’e hodi Ha’u Nia naran, nia simu Ha’u An rasik. Ema nebe simu Ha’u, nia la simu Ha’u, maibe, simu ida nebe haruka Ha’u mai”.

Lia maksoyn.

Leave a Reply

Your email address will not be published. Required fields are marked *