shadow
Diocese de Dili > NOTÍCIAS > REFLEXÃO > DEUS; UNO E TRINO

DEUS; UNO E TRINO

Reflexão &Leituras SOLENIDADE SANTÍSSIMA TRINDADE

Ano B 2018,

Deut 4,32-34.39-40   Rm 8,14-17   Mat 28:16-20

 

Primeira Leitura                                                                                                                                                                                   Deut.  4, 32-34. 39-40

Moises lia tun ba povo, nunee:”imi hare tok tempo uluk nian, hahu husi loron nebe Maromak halo ema mosu iha rai; husi Lorosae too loromonu: mosu ona buat ruma diak hanesan nee? Ema rona ona karik lia fuan ruma hanesan nee? Povo nebe mak rona hanesan o rona Maromak futar lia mai husi ahi, maibé la mate? Maromak nebe mak mai ona hili povo ida ba Nia, povo nebe hili husi povo sira seluk  nia leet, hodi terus, hodi funu, hodi milagre, halo tauk ho liman maka’as? O la hare ho matan katak, Nai, o nia Maromak, halo nunee ba o, iha Egipto? Nee duni, ohin o sei hatene buat ida nee, hodi rai didiak iha iha o laran: Iha lalehan ka iha rai klaran, o la hetan Maromak ida hanesan o nia Maromak. O sei halo tuir Nia ukun fuan, o sei moris tuir Nia hakaran nebe ohin hau sei fo hatene sai ba o. Nunee deit mak o, bele hetan rahun diak; nunee deit mak o ho o nia oan sira rahun diak. Nunee, deit mak o sei rahun diak duni, iha rai nebe Maromak, o nia Nain, sei haraik ba o, tinan ba tinan”.

Maromak Futar Lia.

 

Salmo Responsorial                                                                                                                                                      Sal 32(33), 4-56. 9, 18-19. 20. 22

Refrão : Maromak nia povo rahun diak tebes!!! Repete-se

 

Maromak futar lia, lialos tebes!

Maromak hahalok sai tuir tebes nia lia fuan

Maromak hadomi ema lialos,

Maromak hadomi ema tuir justiça. Refrão

 

Hodi Nia futar lia,

Maromak halo mosu lalehan;

Hodi Nia futar iis

Maromak haraik moris ba buat tomak iha rai-klaran

Maromak koalia deit,

Buat tomak mosu mai tebes. Refrão

 

Maromak hare rasik Nia emar sira;

Maromak tau rasik Nia matan ba sira be fiar,

Atu hasai sira husi mate,

Atu haraik ai-han ba sira iha tempo hamlaha.i Maromak tau rasik Nia matan ba sira be fiar,

Atu hasai sira husi mate,

Atu haraik ai-han ba sira iha tempo hamlaha. Refrão

 

Ita nia klamar titu iha Maromak,

Tanba Maromak ita nia tulun, ita nia kbiit,

Nai Maromak haraik netik Ita nia domin mai ami atan sira,

Tan ami laran metin ba Ita boot. Refrão

 

Segunda Leitura                                                                                                                                                                                                   Rm 8, 14-17

Lia housi São Paulo nia surat ba sarani sira iha Roma

Maun-alin sira: ema hotu nebe lao tuir Maromak nia roman, sira nee Maromak nia oan duni. Imi laos simu Espírito ida nebe atan sira nian; imi Laos simu Espírito ida nebe hatauk imi; maibé, imi simu Espírito nebe halo imi sai oan hakiak nian. Nee mak ita bele dehan:”ABBA! AMAN!” Espírito Santo rasik, hamutuk ho ita mak sasin katak, ita Maromak nia oan duni. Nudar oan, ita sei simu mos ita Aman nia riku soin; ita sei simu hamutuk ho Cristo; ita terus karik ho Cristo, Maromak sei hahi duni ita, hamutuk ho Cristo.

Maromak Futar Lia

 

Aclamação                                                                                                                                                                                                                   Apoc. 1, 8

Refrão : Aleluia, Aleluia!!! Repete-se

                  Glória ba Aman, ba Oan no ba Espírito Santo;

                  Ba Maromak ohin, uluk no aban-bain rua. Refrão

 

Evangelho:                                                                                                                                                                                                            Mt 28, 16-20

+ Nai Jesus Cristo nia Evangelho nudar São Mateus haktuir :

Iha tempo neba, Apóstolo sira sanulu resin ida, lao tiha ba Galileia, ba foho nebe Jesus hatudu hela ba sira. Sira hare tiha Jesus, sira tuku-tur ba rai hodi hanai Nia maibé, balun ladun fiar. Jesus besik ba sira, hodi dehan:”Hau simu ona kbiit hotu, lalehan no rai nian. Nee duni, imi sei ba fatin hotu-hotu atu hanorin reino-reino rai klaran nian, no sarani sira hodi Aman, hodi Oan no hodi Espírito Santo sira naran. Imi sei hanorin sira, atu tuir buat hotu nebe Hau haruka. Hau sei horik ho imi nafatin, tinan ba tinan”.

Lia Maksoyn

 

 

REFLEXÃO:

DEUS; UNO E TRINO

Haktuir katak; iha loron ida Agostinho (354-430), lao iha tasi ibun hodi hanoin mistério Santíssima Trindade (Tres Pessoas-Um só Deus). Lao tan oitoan ba oin, iha tasi ibun nee, Agostinhonia hare labarik kiik ida halimar hela tasi ben. Labarik nee kee daudaun rai kuak naton ida, hafoin nia lao ba tasi hodi kuru tasi bene ho ahu ruin hafoin lori mai enche ba rai kuak nee.

Hare lalaok estranho nee, Agostinho husu ba labarik nee:”hei labarik! o halo saida mak nee? Labarik nee hatan; hau hakarak kuru tasi ben hodi enche hotu ba rai kuak nee”. Tuir mai, Agostinho hanoin hodi descobre katak; hanesan labarik kiik nee nia lalaok, Agostinho mos halo daudaun saida mak labarik nee halo.

Mistério Santíssima Trindade hanesan mos ho tasi luan nebe ita hare hanesan la iha rohan. Nia hamriik daudaun iha tasi ibun nee hodi hatama hotu tasi luan boot nee ba nia kakutak nebe limitado. Nee significa katak; Mistério Santíssima Trindade sei la compatível (ingenua) wainhira ita liga ho lógica comum/convencional (raciocínio humano). Conceito Maromak ida deit iha Aman, Oan no Espírito Santo meramente hodi descreve doutrina Bíblica nebe ita bele confirma iha Evangelho São João 1,1-18; João10,29-30 no iha livro Actos dos Apóstolos  5, 3-4

Hodi tau fiar metin ba Maromak (Aman, Oan no Espírito Santo), ita hahu contempla didiak grandesa Maromak nian nudar Criador, Redentor no Paráclito, tuir sasukat fiar nian.

Relato Evangelho Mateus nian nebe badak, fo imagem balu ba ita katak Jesus nebe moris hias ona husi mate, hatudu-An ba Apóstolo sira iha Galileia. Iha ocasião nee, Jesus haruku Apóstolo sira ba rai rai hodi halo ema hotu sai Cristo nia escolante. Ordem ida nee, Jesus fo kedas ho kbiit atu fo sarani sira iha Aman, Oan no Espírito Santo naran no acrescenta liu tan katak sira precisa halo tuir Jesus ukun fuan sira. Atu fo laran metin ba Apóstolo sira halao missão, Jesus mos promete atu horik ho sira too tempo nia rohan (Mt 28,20).

Iha celebração solenidade Santíssima Trindade ida nee, São Paulo iha Segunda Leitura fo hanoin ita katak; tanba Espírito Santo mak, ita bele bolu Aman Maromak nudar “ABA/Aman” no hamutuk ho Cristo, Maromak Oan, ita sai liman rohan (Herdeiro/ahli waris) Maromak nian.

          Evangelho São Mateus Domingo semana nee, temi mos pessoa Aman, Oan no Espírito Santo. Ita nobun mos simu we Baptismo iha Aman, Oan no Espírito Santo naran hodi hola parte pesssoa hirak nee.       

Doutrina (Dogma) Igreja nian kona ba Santíssima Trindade desde Igreja hahu to ohin loron, sai hanesan mistério boot ida nebe ita ia kakutak racional la entende totalmente maibé, ita ita nia fiar (convicção) halo ita simu mistério Trindade ida nee. Hodi celebra solenidade Mistério Santíssima Trindade ida nee, ita agradece ba Maromak basá, desde simu we baptismo too oras nee, ita hetan graça no sente Domin Maromak nian iha Jesus Cristo tanba Espírito Santo nia kbiit. Nunee, pessoa Santíssima Trindade presente no serviço iha ita ida-idak nia moris.

Ita contempla Aman Maromak nudar Criador, nebe bolu ita hola parte iha Ninia domin providencial tan ita nobun sai Nia oan fudin.

Ita mos contempla Maromak Oan hanesan imagem concreta Aman Maromak nian. Jesus Cristo, Maromak Oan nebe mai iha rai klaran hodi moris no sente mos deastino eh natureza hanesan ema. Nia (Jesus) mak haklaken no concretisa segredo salvação, nebe pertence ba providência (Penyelenggaraan Ilahi-vontade Divina) Aman Maromak nian ba ita nobun. Liu husi Nia (Jesus) duni mak ita hola parte iha Santíssima Trindade nia moris nudar liman rohan.

Ita mos contempla Espírito Santo nudar graça Divina entre Aman no Oan. Espírito Santo ida nee mak liu husi Cristo mai hodi acompanha Cristo nia Igreja iha ema ida-idak nia fuan. Espírito ida neee mak sai mata dalan ba ita nia moris sarani nian tuir Jesus haruka ba moris rohan laek nian.

Nunee, ita conclui reflexão ida nee hodi entende ho matan fiar nian katak; Santíssima Trindade nee nudar mistério fiar nebe boot iha história Cristianismo nian. Entre hirak nee hotu, ita agradece nafatin ba Maromak; Aman, Oan no Espírito Santo tan, Nia domin be horik nafatin ho ita husi tempo ba tempo. Jesus rasik confirma lia fuan nee hodi fo laran metin (esperança) ba apóstolo sira katak; Hau sei horik ho imi too mundo nia rohan.

          Nunee, saida mak ita precisa halo hodi hola parte iha Santíssima Trindade nia moris? Buat nebe importante mak, ita nudar sarani Católico, precisa comporta didiak, halao moris tuir doutrina Trindade nudar Jesus hanorin nanis hodi tau fiar metin ba Maromak Santíssima Trindade sem condição.

Wainhira ita comporta didiak moris iha sociedade ida, nee significa katak ita indirectamente hola parte ona iha missão Jesus nian hodi dada ema wain liu tan fiar ba Maromak (Trindade) hodi hetan salvação. Atu hatudu lolos oinsa ita nia fiar no domin ba Maromak Trindade, ita precisa hatudu comportamento diak nudar sarani atu ema seluk bele haré presença Santíssima Trindade iha ita nia ser ema nian. Ikus liu, moris Trindade nebe kmanek liu mak moris missionário. Assim Seja (ILMBAFS)

 

Leave a Reply

Your email address will not be published. Required fields are marked *