shadow
Diocese de Dili > NOTÍCIAS > REFLEXÃO > DOMINGO SANTÍSSIMA TRINDADE

DOMINGO SANTÍSSIMA TRINDADE

íMaun alin sarani doben sira,

Ohin ita selebra mistério boot ita nia fiar nian kona ba Na’i Maromak be ita ema sarani sira fiar. Maromak mesak ida deit nain tolu ketak ketak nebe ita hanaran Misterio Santíssima Trindade. Misterio ida nebe ita labele comprende tomtomak iha ninia totalidade maibe ita bele comprende buat balun husi misterio ne’e ho ita nia fiar, ho roman razão nian no ho tulun Espirito Santo nian.

Mistério Santíssima trindade ne’e mos mak ohin loron sai hanesan materia de discussão boot entre ema seluk sira nebe laos sarani ho ema sarani sira rasik nebe moris iha misterio ida ne’e no bele comprende buat balun husi mistério ne’e tamba sira moris duni hamutuk ho Maromak Aman, Oan no Espirito Santo. Discussão sira hanesan ne’e ohin loron sai aumenta tan iha contexto realidade Timor nian ita hahu hare ona ema balu nebe la moris iha misterio ida ne’e mos lao tama uma sai uma ou hein ema iha dalan ninin sira hodi questiona no argumenta ho ema sarani sira kona ba misterio ida boot ne’e nebe sira la comprende, la moris no la sente iha sira nia moris loro loron.

 

Maun alin sarani doben sira, ita nia doutrina no fiar ka Credo sarani nian hanorin ita katak ita fiar ba MAROMAK MESAK IDA DEIT IHA NAIN TOLU KETAK KETAK; Maromak AMAN, OAN no ESPIRITO SANTO. MAROMAK IDA DEIT LAOS NAIN TOLU. Dala barak ema hanoin deit iha ninia numero simples no la hanoin iha Maromak ninia-an tomak. Numericamente mak ita dehan iha nain tolu ketak ketak no sira nebe la fiar no la koko moris ho Santíssima Trindade dehan IHA NAIN TOLU KEDAS. Enquanto substancialmente ita confessa iha ita nia Credo katak GERADO NÃO CRIADO-AMAN HAHORIS LA HALO NIA katak Mai husi AMAN laos AMAN cria ka halo nia, sira nebe la fiar no la koko moris ho Santíssima Trindade la dehan buat ida kona ba ne’e tamba sira la hanoin no la comprende iha forma substância no essencia ne’e.

 

Misterio tomak Santíssima trindade ne’e revela iha Biblia no Evangelho tomak hahu kedas iha revelação Maromak nian ba ema sira mai to’o iha presença real Maromak iha ita ema sira nia le’et nebe hatudu iha Nai Jesus Cristo Maromak Oan Mane mesak be mai moris iha mundo hodi soi ema ho criatura tomak.

 

Primeira leitura nebe hasai husi livro Deuteronómio nian hatudu dehan katak Maromak ne’e mesak ida deit. Maromak be iha Lalehan no rai iha fatin hotu hotu, laiha tan Maromak seluk. Ne’e hatudu katak laiha Maromak rua ka tolu, iha Maromak mesak Ida deit nebe halo ema, halo Lalehan no rai ho buat hotu. Maromak be bele halo hotu hotu. De facto Maromak ne’e iha ninia-AN nia ida deit, tamba nia Maromak nebe bele halo buat hotu Nia bele koalia no hatudu-an ba ita ema sira ho dalan no forma oioin. Tuir ita nia experiencia moris ema sarani sira nian ita hatene katak Maromak koalia no hatudu-an mai ita nudar AMAN, OAN NO ESPIRITO SANTO. Moises husu atu ita tau didiak verdade ka lialos ida ne’e iha ita nia fuan laran no fiar los deit ba Maromak mesak ida ne’e. Katak ita buka atu hametin ita nia fiar no moris los deit ba no hamutuk ho Maromak mesak ida deit ne’e.

 

Segunda leitura haktuir mai ita Nai Maromak be hatudu nia-an iha Espirito ida, Espírito Santo. Nia koalia no atua iha ita ema sarani sira nia moris nudar Maromak Espirito Santo, ida be halo ita iha kbiit hodi descobre no bolu Maromak nudar ita nia aman, MAROMAK AMAN. Nune’e nia halo ita sai Maromak nia oan sira nebe hetan direito tomak atu moris iha no hamutuk ho Maromak. Maromak Espirito Santo ne’e mak sai we matan ksolok nian, tulun nain nian, konsola nain nian ho tan virtude sira seluk nebe Maromak Espirito Santo haraik mai ita ema sira atu ita ema bele moris lolos nudar Maromak nia oan no hetan ksolok lolos, moris ksolok ida be nakonu no naksulin ba ema sira seluk.

 

Maun alin sira iha Evangelho ohin nian Nai Jesus revela no afirma misterio boot Santíssima Trindade nian mai ita hodi nia rasik dehan sai katak “Kbiit tomak  iha Lalehan no rai hau nian, tamba ne’e imi ba rai rai hodi halo ema hotu sai hau nia discipulo-hau nia oan sira hodi SARANI SIRA HODI AMAN, HODI OAN NO HODI ESPIRITO SANTO SIRA NIA NARAN, HAU SEI HAMUTUK HO IMI LORO LORON TO’O MUNDO NIA ROHAN”. Ita Nai Jesus Cristo la dehan imi ba halo rai no ema sira hotu sai hau nia escolante hodi sarani sira ho hau nia naran deit, maibe cristo dehan sarani ema sira hotu hodi SANTISSIMA TRINDADE NIA AN, ne’e mak HODI AMAN, OAN NO ESPIRITO SANTO NIA NARAN.

 

Maun alin sarani sira, husi ne’e hatudu mai ita katak mistério Santíssima Trindade ne’e laos invenção ita ema nian, maibe revelação Maromak nian. Cristo Maromak ninia oan revela no afirma lolos hela mai ita claramente maibe infelizmente ohin loron ema sira nebe la tuir lolos Cristo nia hanorin sira questiona Maromak Santíssima Trindade ninia-an. Questiona lialos sira kona ba Maromak Santíssima Trindade hanesan deit ho questiona Maromak be mesak ida deit ne’e ninia-AN, ida ne’e sala. Iha balun questiona tamba infantilmente hodi la buka compreende misterio ne’e iha ninia totalidade maibe comprende superficialmente iha ponto numerica nian, balun seluk la comprende tamba la moris iha misterio ida ne’e maibe sira buka atu comprende fali misterio ne’e literalmente iha liafuan SANTÍSSIMA TRINDADE. Sira dehan katak iha biblia no Evangelho la hetan liafuan Santisima Trindade. Maun alin sira Maromak la revela nia-an literalmente maibe nia revela-an concretamente iha buat nebe nia halo no hanorin ba ita ema sira. Tamba ida ne’e hau hanoin se ita buka comprende misterio Santíssima Trindade ne’e superficialmente deit iha forma numerica no literal to’o bainhira deit mos ita sei la comprende itoan kona ba miserio boot ida ne’e. Ita so bele comprende Misterio Santissima Trindade ne’e wainhira ita fiar lolos ba Maromak ne’e no moris concretamente ho Maromak ne’e iha ita nia moris loro loron. Moris hamutuk ho Maromak mesak ida deit be hatudu nini-an nudar, Aman ida, nudar Oan ida no nudar Espirito Santo ida.

 

Maun alin sarani doben sira, Ita nain Jesus Cristo revela no afirma lolos no claramente hela mai ita verdade ka lialos Santissima Trindade nian ne’e tamba sa nudar ema fiar nain ba Maromak ita questiona fali Maromak nia-an ne’e? Hau hanoin nudar ema fiar nain no sarani lolos ita nia atitude ida nebe los liu kona ba ne’e los liu mak moris tuir no moris iha verdade ka lialos be Jesus hatudu no dehan sai ona mai ita ne’e ho FE no ho CONFIANÇA tomak iha MAROMAK, Ho LARAN METIN Lolos ba nia be MATENEK NIA NAIN, ROMAN NIA NAIN NO MORIS NIA NAIN. Hodi halo nune’e deit mak ita bele conhece lolos Maromak hodi lao tuir nafatin nia iha tempo iha fatin hotu hotu nudar ita nia MAROMAK LOS MESAK IDA DEIT be hatudu an mai ita nudar MAROMAK AMAN, OAN NO ESPIRITO SANTO iha ita nia moris loro-loron. Amen.                                    

Bidau 29.05.2019 (VIII TC AB), Por: Pb.

Leave a Reply

Your email address will not be published. Required fields are marked *