shadow
Diocese de Dili > NOTÍCIAS > LETURA DIÁRIA > Terça-Feira, VIII Semana do Tempo Comum

Terça-Feira, VIII Semana do Tempo Comum

Ano B

 

Primeira Leitura                                                                                  1 Ped. 1. 10-16

Lia  housi São Pedro nia Surat

Doben sira: Profeta sira nebé ko’alia kona ba graça nebé imi sei hetan buka no husu kona ba maksoyn ida ne’e. Sira husu sá tempo eh situação Cristo nia Espírito, nebé hôrik iha sira laran, marka; sira fó hatene nanis Cristo nia terus, no mós nia glória nebé sei mosu mai. Maromak fó hatene ba sira katak sira serbi la’os ba sira  an rasik maibé ba imi iha buat hirak sira nebé ohin imi simu ona housi sira nebé haklaken liafuan di’ak ba imi housi Espírito Santo nebé mai housi Lalehan. Buat hirak ne’e Anjo sira hakarak man’manas atu haré.

Ne’e duni, matan moris neon na’in ba, tau imi nia esperança tomak ba graça nebé sei mosu ba imi wainhira Jesus Cristo mosu mai. Nu’udar oan di’ak, imi keta halo tuir hakarak áat sira nebé uluk imi tuir wainhira imi sei beik, maibé, nu’udar Ida nebé bolu imi mak Santo, imi mós haka’as an atu sai santo iha imi nia hahalok tomak; basá hakerek nanis ona, “Imi sai santo ba, basá Ha’u santo.”

Maromak Futar Lia.

 

Salmo Responsorial                                                                                                                                                     Sal. 97(98). 1, 2-3ab, 3c-4 (R. 2ª)

Refrão : Na’i hatudu Nia maksoyn!!! Repete-se

 

Hananu ba Na’i knananuk foun ida,

Basá Nia halo buat mesak kmanek.

Nia futar liman lós manan funu;

Manan ho Nia futar liman santo. Refrão

 

Na’i fó hatene Nia maksoyn;

Nia hatudu justiça ba nação sira hotu.

Nia hanoin Nia domin no laran lós,

Ba Israel uman. Refrão

 

Rai-ikun rai-ulun sasin

Maksoyn Ita Maromak Nian.

Rai tomak haklaken Na’i,

Haklalak ho ksolok no hananu. Refrão

 

Aclamação                                                                                                                                                                                                                   Mt. 11. 25

Refrão : Aleluia, Aleluia!!! Repete-se

                  Rahun di’ak ba Ita, Aman, Na’i lalehan no rai nian, tan

                  Ita hatudu mistério reino lalehan nian ba kiik sira. Refrão

 

Evangelho                                                                                                                                                                                                            Mc. 10. 28-31

+Na’i Jesus Cristo nia Evangelho nu’udar São Marcos haktuir :

Iha tempo neba, Pedro hahu ko’alia ba Jesus dehan: “Ami husik buat hotu hodi tuir Ita”. Jesus simu hodi dehan: “Tebes, Ha’u dehan ba imi: Ema nebé husik uman, husik feton-naan, husik maun-alin, inan, aman, oan ka to’os, tan ba Ha’u no tan ba Lia-Foun iha oras ne’e, nia simu uma, simu maun-alin, feton-naan, inan, oan no to’os sira, atus ida liu fali uluk nian; maibé ema sei duni, hodi fó terus mós nia. Aban bain-rua, nia sei hetan moris rohan laek. Sira wa’in be uluk, balun sei ikus, sira be ikus sei uluk fali”.

Lia Maksoyn.

Leave a Reply

Your email address will not be published. Required fields are marked *