shadow
Diocese de Dili > NOTÍCIAS > LETURA DIÁRIA > Quinta-Feira, VIII Semana do Tempo Comum

Quinta-Feira, VIII Semana do Tempo Comum

Ano B

 

Primeira Leitura                                                                                 1 Ped. 2.2-5, 9-12

 

Lia housi São Pedro nia Surat

Doben sira: Nu’udar kosok oan sira nebé foin moris, buka susuben klamar nian, atu imi bele sai boot dau-daun ba maksoyn. Basá imi koko ona Na’i Nia laran luak. Hakbesik ba Nia; hakbesik ba fatuk moris ne’e nebé ema hewai, maibé kmanek no folin liu iha Maromak futar oin; imi mós, nu’udar fatuk moris, sa’e ba uma espírito nian, atu sai nu’udar na’ilulik santo sira, hodi hasa’e sacrifício espírito nian nebé monu lós ba Maromak Nia laran, housi Jesus Cristo.

Maibé imi mak dersan nebé Maromak hili, na’ilulik ran liurai sira, imi nação santa ida, Maromak Nia povo rasik, atu imi bele haklaken Nia hahalok kmanek. Nia bolu imi housi nakukun laran ba roman nabilan. Uluk, imi la’os povo ida, maibé ohin imi Maromak Nia povo; uluk, imi la simu Maromak Nia laran luak, maibé ohin imi simu tiha ona nia.

Doben sira, ha’u husu ba imi nebé hanesan ema rai seluk nian no ema la’o rai, atu hadook an housi isin nia hakarak áat sira. Sira ne’e halo funu hasouru imi nia klamar. Hatudu hahalok di’ak de’it iha gentio sira leet, atu wainhira sira ko’alia kona ba imi nu’udar ema áat, sira sei haré imi nia hahalok di’ak hodi fó glória ba Maromak iha loron Nia mosu mai.

Maromak Futar Lia.

 

Salmo Responsorial                                                                                                                                                             Sal. 99(100). 2, 3, 4, 5 (R. 2c)

Refrão : Mai iha Na’i futar oin ho knananuk ksolok nian!!! Repete-se

 

Rai tomak hahi Na’i ba,

Serbí Na’i ho ksolok;

Mai to’o Nia ho kanananuk ksolok nian. Refrão

 

Hatene ba katak Na’i mak Maromak!

Nia hakiak ita, ita Ninian.

Ita, Nia povo, bibi sira Nia luhan nian. Refrão

 

Tama housi odamatan hodi agradece,

Tama ba Nia kadunan ho knananuk hahi nian.

Haliban Nia, hana’i Nian naran. Refrão

 

Tanba Na’i di’ak tebes!

Nia laran-luak rohan laek;

Nia fidelidade sei to’o bei-oan sira hotu. Refrão

 

Aclamação                                                                                                                                                                                                                     Jo. 8. 12

Refrão : Aleluia, Aleluia!!! Repete-se

                  Ha’u mundo nia roman, Na’i dehan; ema sé tuir Ha’u la

                  la’o iha nakukun, mai, Maibé, sei hetan roman moris nian. Refrão

 

Evangelho                                                                                                                                                                                                            Mc. 10. 46-52

+Na’i Jesus Cristo nia Evangelho nu’udar São Marcos haktuir:

Iha tempo neba, wainhira Jesus atu sai ona housi Jerico ho Nia escolante sira ho ema lubun boot ida, ema matan delek ida, Bartimeu, Timeu nia oan, tur iha dalan ninin, husu esmola. Wainhira nia rona katak Jesus Nazaré liu housi neba, nia hahu hakilar hodi dehan: “Jesus, David nia Oan, sadia ha’u!” Ema barak si’ak nia hodi haruka nia atu nonok, maibé nia hetok hakilar maka’as liu tan, “David nia Oan, sadia ha’u!” Jesus para hodi dehan: “Bolu nia mai.” Sira bolu nia dehan: “Aten barani ba, hamriik ba. Nia bolu ó.” Nia soe nia capa, hamriik kedas hodi la’o ba Jesus. Jesus lia tun ba nia dehan: “Ó hakarak Ha’u sei halo sá lós ba ó?” “Mestre,” ema matan delek ne’e hatan, “Halo ha’u haré!” Jesus lia tun dehan: “Ba, ó nia fiar soi ó!” Nia haré kedas hodi la’o hamutuk ho Jesus iha dalan.                                                                                        

Lia Maksoyn.

Leave a Reply

Your email address will not be published. Required fields are marked *