shadow
Diocese de Dili > NOTÍCIAS > LETURA DIÁRIA > Sexta-Feira, VIII Semana do Tempo Comum

Sexta-Feira, VIII Semana do Tempo Comum

Ano B

 

Primeira Leitura                                                                                   1 Ped. 4. 7-13

 

Lia housi São Pedro nia primeira Surat

Doben sira: Buat hot-hotu nia rohan besik ona; ne’e duni, imi moris ho oin mós no neon na’in atu imi bele reza. Uluk liu, hadomi malu teb-tebes, basá domin kasu sala barak. Simu malu ho laran; imi ida-idak simu kmanek ruma, usa kmanek ne’e ba maluk sira, nu’udar atan di’ak Maromak Nia graça oi-oin nian. Ida nebé ko’alia, ko’alia ba nu’udar ema nebé hato’o Maromak nia liafuan; ema nebé fó tulun, nu’udar ema nebé halo nia ho kbiit nebé Maromak fó; atu nune’e, iha buat hotu ema bele hahi Maromak housi Jesus Cristo. Ba Nia glória no ukun tinan ba tinan Amen.

Doben sira, keta hakfodak kona ba terus boot nebé mai hasouru imi atu koko imi. Maibé, haksolok ba, basá imi halo parte iha Cristo nia terus. Wainhira nia kmanek sei mosu mai, imi bele haksolok liu tan.

Maromak Futar Lia.

 

Salmo Responsorial                                                                                                                                                       Sal. 95(96). 10, 11-12, 13 (R. 13b)

Refrão : Na’i tesi lia ba mundo ho justiça!!! Repete-se

 

Haklaken ba povo hot-hotu:

‘Na’i mak Liurai’.

Nia hari mundo metin, sei la nakdoko,

Na’i ukun povo hotu hanesan. Refrão

 

Lalehan haksolok ba, rai hananu ho ksolok ba,

Tasi no buat hotu iha tasi laran;

Rai luan ho buat moris tomak iha nia, haksolok,

Bidu ho ksolok ai sira iha ailaran. Refrão

 

Iha Na’i be sei mai Nia futar oin.

Nia mai atu tesi lia ba rai-klaran,

Nia sei tesi lia ba mundo ho justiça,

No ba povo sira hotu hanesan. Refrão

 

Aclamação                                                                                                                                                                                                                    Jo. 15. 16

Refrão : Aleluia, Aleluia! Repete-se

                  Ha’u hili imi housi mundo hodi haruka imi ba atu bele fó

                  Fuan no imi nia fuan bele hela ba nafatin. Refrão

 

Evangelho                                                                                                                                                                                                            Mc. 11. 11-25

+Na’i Jesus Cristo nia Evangelho nu’udar São Marcos haktuir:

Iha tempo neba, wainhira ema lubun boot hahi tiha Nia, Nia to’o tiha Jerusalém, Nia tama iha templo. Nia hateke hale’u ba buat hot-hotu iha neba, maibé anba kalan besik ona, Nia sai ba Betânia ho nia escolante sanulu resin rua.

Loron nebé tuir mai, wainhira sira sai housi Betânia, Nia hamlaha. Sira haré housi dook ai figueira ida ho tahan barak. Nia hakbesik atu haré Nia bele hetan fuan ruma ka lae. To’o tiha neba, Nia hetan tahan de’it, basá tempo atu ai figueira fó fuan seidauk to’o duni. Nia dehan: “Ema sei la han tan ó nia fuan tinan ba tinan.” Nia escolante sira rona buat sira ne’e hotu.

To’o tiha Jerusalém, Nia tama iha templo no hahu duni sai sira hotu nebé fa’an no sosa iha templo laran. Nia soe tun mesa sira ema nebé troka osan no kadeira sira ema fa’an manu falur nian. Nia la husik ema lori sasan sira liu housi templo laran. Nia hanourin hodi dehan ba sira, “La hakerek nanis, ‘Ha’u Nia uma ne’e, povo hot-hotu sei la bolu nia uma oração nian?’ Imi fali halo nia nakfila ba na’okten sira nia luhan!” Na’ilulik boot no escriba sira rona kona ba buat ne’e no sira buka oin sá sira bele oho Nia, basá sira ta’uk Nia; povo tomak hakfodak kona ba Nia hanourin.

Wainhira kalan tiha ona, sira husik cidade.

Iha dader, wainhira sira liu housi neba, sira haré ai figueira namlaik ona to’o abut. Pedro hanoin hetan hodi dehan ba Nia: “Mestre, haré ba ai figueira nebé Ita fó malisan namlaik ona.” Jesus hatan ba nia dehan: “Fiar Maromak ba! Tebes Ha’u dehan ba imi katak ema nebé hateten ba foho ne’e, ‘Sai housi ne’e no soe ó an ba tasi laran,’ hodi la’os laran rua-rua maibé hodi fiar katak buat nebé nia dehan ba imi: buat nebé imi husu hodi reza, fiar ba katak imi sei simu; nia sei mosu duni ba imi.

Wainhira imi reza, fó perdua ba ema nebé imi hirus atu imi nia Aman iha Lalehan sei perdua imi nia sala. Imi la fó perdua karik, imi nia Aman nebé iha Lalehan mós sei la fó perdua ba imi.

Lia Maksoyn.

Leave a Reply

Your email address will not be published. Required fields are marked *