shadow
Diocese de Dili > NOTÍCIAS > LETURA DIÁRIA > Segunda-Feira, IX Semana Tempo Comum

Segunda-Feira, IX Semana Tempo Comum

ANO B

 

Primeira Leitura                                                                                       2Ped. 1. 2-7

Lia husi São Pedro nia Surat

Doben sira: Graça no dame sai ua’in liu tan ba imi atu imi hatene Maromak no ita Na’i Jesus. Maromak nia biit haraik tiha mai ita Na’i Jesus. Maromak Nia biit haraik tiha mai ita buat hotu nebe moris iha Maromak, hodi hatene Nia nebe bolu ita ba Nia rasik nia glória no kmanek ua’in; housi buat hirak ne’e, Nia haraik mai ita promessa boot nebe folin liu, atu housi sira ne’e imi la bele hola parte iha mundo nebe sai dodok daudaun tanba hakarak áat, no atu imi bele hola parte iha Maromak nia moris. Tan ne’e duni, haka’as an atu halo boot liu tan imi nia fiar no hahalok di’ak sira; hahalok di’ak sira ne’e ho matenek; matenek ne’e ho imi nia ukun an; ukunn an ho laran metin; laran metin ho laran manas kona ba Maromak; no laran manas kona ba Maromak ho domin  ba malu nu’udar maun alin ho domin lolos.

Maromak Futar Lia.

           

Salmo Reponsorial                                                                                                                                            Sal. 90(91). 1-2, 14-15ab, 15c-16 (R. 2b)

Refrão : Na’i, ha’u Maromak, ha’u neon metin iha ita boot!!! Repete-se

 

Ó be hôrik  iha Leten Aas liu hotu Nia kadunan,

Ó be hôrik iha Bele buat tomak Nia mahan,

Dehan ba Na’i: ita boot ha’u nia mahein no ha’u maksoin.

Na’i ha’u Nia Maromak, ha’u fiar Itaboot. Refrão

 

“Tan nia tau neon metin iha Ha’u,

Ha’u sei soi nia tan hatene Ha’u naran;

Nia harohan mai ha’u, ha’u sei rona nia,

Iha susar laran, ha’u sei hamutuk ho nia. Refrão

 

Ha’u sei tulun nia no fó glória ba nia,

Ha’u sei haraik ba nia moris naruk,

Ha’u sei hatudu ba nia Ha’u maksoin”. Refrão

 

Aclamação                                                                                                                                                                                                                   Ap. 1. 5ab

Refrão : Aleluia, Aleluia! Repete-se

                  Jesus Cristo, sasin nebe laran metin,  Oan kaua’ik housi ema mate sira leet,

                  hadomi ita no hamós  ita housi ita nia sala sira ho Nia ran. Refrão

 

Evangelho                                                                                                                                                                                                                Mc. 12. 1-12

Na’i Jesus Cristo nia Evangelho nu’udar São Marcos haktuir:

Iha tempo neba, Jesus hahu ko’alia ba sira ho aiknanoik dehan. “Ema ida halo to’os uvas nian, hale’u nia ho lutu, ke’e kuak atu hanehan uvas no hari torre ida. Tuir mai, nia saran to’os ne’e ba ema fila rai sira , no la’o ba rai seluk. Uainhira tempo lós to’o ona, nia haruka nia emar ida ba ema fila rai sira atu husu aifuan sira nu’udar rai teen housi to’os. Maibe sira kaer emar ne’e, baku nia no haruka nia fila ho liman mamuk. Dala ida tan, nia haruka ema seluk ba sira. Nia mós sira baku no trata áat. Nia haruka tan ema seluk, maibe sira oho nia no mós ema barak seluk; balun sira baku, balun sira oho. Nia iha tan oan mane doben. Nia haruka nia ba sira hodi dehan: ‘Sira sei hamta’uk ha’u nia oan.’ Maibe ema fila rai sira dehan ba malu, ‘ Ida ne’e mak lima-rohan na’in! Mai, ita oho nia, hafoin soe nia ba liur. To’os na’in ne’e sei halo sá lós? Nia sei mai no halo lakon ema fila rai sira ne’e hodi saran to’os uvas nian ba ema seluk. Imi seidauk lê lia Escritura ne’e: buat ida ne’e Na’i mak halo. Housi nia mak buat kmanek liu ne’e mosu iha ita nia oin?” Sira buka atu kaér Nia; maibe sira tauk povo; sira hatene katak Nia haktuir aiknanoik ida ne’e ba sira. Sira ba hodi husik Nia.

Lia Maksoyn.

Leave a Reply

Your email address will not be published. Required fields are marked *