shadow
Diocese de Dili > NOTÍCIAS > LETURA DIÁRIA > X Domingo Tempo Comum

X Domingo Tempo Comum

Ano B

 

Primeira Leitura                                                                                      Gén. 3, 9-15

Lia Husi Livro Génesis:       

Wainhira Adão han liu tiha ai-fuan bandu, Na’i Maromak bolu nai, hodi dehan ba nia:” Ó iha nebé?” Nia hatán: “ Ha’u rona ita ain fatin tarutu iha jardim, ha’u laran ta’uk tebes, basá, ha’u isin tanan; tan ne’e ha’u haksumik-an tiha”. Maromak dehan: “ Ema sê mak fo hatene ba ó, katak ó isin tanan: ó keta han karik ai-fuan nebé ha’u bandu atu han?” Mane hatán: “ Feto nebé ita boot haraik mai ha’u, mak fo ai-fuan ne’e mai, ha’u han duni”. Na’i Maromak husu ba feto: “ Ó halo sá ne’e?”  Feto hatán: “ Samean bosok ha’u, ha’u han duni”. Nune’e Na’i Maromak lia tun ba samean: “ Tan ó halo ida ne’e, ó sei hetan malisan aat liu tiha balada dian sira no balada fuik sira leet. Ó sei dólar de’it, ó han de’it rai-rahun iha ó nia moris tomak. Ó Sei hirus malu ho feto. Ó oan sira no ninian luli malu. Feto ne’e sei sama hanehan ó nia ulun, ó sei buka hakanek nia ain tuban.

Maromak Futar Lia.            

 

Salmo Responsorial                                                                                                                                                     Sal. 129(130), 1-2. 3-4ab. 4c-6. 7-8

Refrão : Iha Nai hetan laran luak!

                 Iha Na’i hetan laran luak wa’in tebes! Repete-se

 

Housi ha’u neon tomak, ha’u hakilar ba ita Na’i,

Na’i, rona ha’u lian ba!

Sê didi’ak ita tilun,

Hodi rona ha’u  hakilar harohan nian. Refrão

 

Ita lori karik baa at ami salan,

Na’i, ema sê bele soy an?

Maibé, Na’i, iha ita, hetan mak perdão;

Tan ne,e, ami serbi ita ho haraik-an. Refrão

 

Ha’u klamar hein Na’i no tau laran metin iha nia lia-fuan.

Ha’u klamar hein hela Na’i

Liu fali sintinela ida

Hein hela loro-matan nakfera. Refrão

 

Nu’udar sintinela ida hein hela dader,

Nune’e mos Israel hein hela Na’i.

Tan iha Na’i hetan laran luak;

Iha nia bele hetan maksoyn wa’in;

Nia mak sei soy Israel, housi nia hahalok aat hotu. Refrão

 

Segunda Leitura                                                                                                                                                                                              2Cor. 4, 13-5, 1

Lia housi São Paulo nia surat ba sarani sira iha Corinto:

Maun alin sira Escritura dehan: “ Ha’u fiar, tan ne’e ha’u ko’alia”. Ho Espírito fiar nian ida ne’e duni mak ita iha fiar, tan ne’e ita ko’alia. Basá, nu’udar ita hatene, ida nebé halo Na’i Jesus moris hias, hanesan ne’e mos sei halo ita moris hias ho Jesus no  sei lori ita hamutuk ho imi ba nia sorin. Halo buat hirak ne’e hotu, tan imi, atu graça ida wa’in tebes, iha sarani lubun boot ne’e, bele haburas-an hodi hatene buka hahí ba glória Maromak nian. Tan ne’e mak ami  la lakon kbiit: buat nebé haré iha ami housi liur bele rahun ba dadaun, maibé, buat nebé iha ami laran, lor-loron hafoun-an nafatin. Basá, terus kman tempo ruma nian, hadi’a ami liu fali buat hotu no sasukat ruma, ba todan ida rohan-laek glória nian. Ami la haré ba buat hirak nebé bele haré, ami haré de’it ba buat nebé la bele haré hela ba nafatin. Ita hatene nanis katak, ita nia horik fatin rai ne’e nian monu karik, katak ita isin rai ninian, ita sei simu housi Maromak, isin seluk ida atu ita hela iha lalehan, horik fatin rohan laek nebé la halo ho liman ema nian.

Maromak Futar  Lia.

 

Aclamação                                                                                                                                                                                                                    Jo. 12, 31

Refrão : Aleluia! Repete-se

                  Na’i dehan oras ne’e, Ema atu soe sai liurai mundo ne’e  nian.

                  Maibé, Ha’u, ema harí tiha Ha’u housi rai, ha’u sei dada ema hotu mai Ha’u-an. Refrão

 

Evangelho                                                                                                                                                                                                               Mc. 3, 20-35

Na’i Jesus Cristo Nia Evangelho Nu’udar São Marcos Haktuir:

Iha tempo nebá, Jesus tama fila fali iha uma. Ema lubun boot  libur-an hamutuk fali tan, hodi la fo fatin atu han. Wainhira rona tiha buat ne’e, Jesus nia Parente sira ba kedas atu halo konta Nia, basá, ema sira dehan: “ Nia sai tiha housi nia-an”. Escriba sira nebé tun husi Jerusalém dehan: “ kbiit Belzebú nian iha Nia”, tan: “ Housi ulun boot demónio sira nian mak Nia duni sai demónio sira”. Maibé, Jesus bolu sira hotu, mai iha nia oin, hafoin Nia dehan ba sira, hodi aiknanoik: “ Oin Sá bele Satanás duni sai Satanás? Povo ida fahe tiha nia-an, hafunu karik hasoru nia-an rasik, povo ne’e la bele iha tan. Uma ida fahe-an tiha, hafunu hasouru karik nia-an rasik, uma ne’e la bele hala tan nu’udar uma. Tan ne’e, Satanás hamríik karik hasouru nia an rasik, hodi fahe-an, nia la bele iha tan: sei mohu. Maibé, ema la bele tama iha uma, ema forte ida nian, hodi hadau riku soin nebé nia iha, uluk la futu karik nia na’in: nune’e de’it mak bele na’ok nia uma. Ha’u dehan tebes ba imi: sala sira hotu no lia-fuan aat sira hotu nebé oan ema sira nian dehan, sei perdua hotu, maibé, ema nebé dehan lia-fuan aat hasouru Espírito Santo, nia sei la hetan liu perdão: sei hetan castigo rohan laek sala nian”. Dehan ida ne’e, tamba sira ko’alia sai: “Nia iha Espírito fo’er nian ida”.To’o dadaun mai Jesus nia inan ho nia maun-alin sira. Sira hela de’it iha liur, hodi haruka bolu Nia. Ema barak liu, tur haleu hela Nia, wainhira sira dehan ba Nia: Ó nia inan ho Ó nia Maun-alin sira iha liur, buka hela Ó”. Maibé, Jesus hatán ba sira: “ Sira  nebé mak Ha’u Inan ho Ha’u nia maun-alin?” Hateke hale’u hotu ba sira nebé tur hale’u hela Nia, Nia dehan: “ Sira ne’e mak Ha’u nia Inan ho Ha’u nia maun-alin sira. Ema nebé halo tuir Maromak nia hakarak, nia mak Ha’u nia alin, Ha’u nia Feton, Ha’u nia Inan”.

Lia Maksoyn.

Leave a Reply

Your email address will not be published. Required fields are marked *